HRA ਦਾਅਵਿਆਂ ਲਈ ਕੀਤੀ ਜਾ ਰਹੀ ਹੈ PAN ਦੀ ਦੁਰਵਰਤੋਂ , ਹਜ਼ਾਰਾਂ ਮਾਮਲੇ ਆਏ ਸਾਹਮਣੇ
04/01/2024 6:25:14 PM
ਨਵੀਂ ਦਿੱਲੀ - ਪੈਨ ਕਾਰਡ ਦੀ ਵਰਤੋਂ ਹਾਊਸ ਰੈਂਟ ਅਲਾਉਂਸ ਯਾਨੀ HRA ਕਲੇਮ ਲਈ ਗਲਤ ਤਰੀਕੇ ਨਾਲ ਕੀਤੀ ਜਾ ਰਹੀ ਹੈ। ਦਰਅਸਲ, ਇਨਕਮ ਟੈਕਸ ਵਿਭਾਗ ਨੇ ਪੈਨ ਕਾਰਡ ਦੀ ਅਣਅਧਿਕਾਰਤ ਵਰਤੋਂ ਨਾਲ ਸਬੰਧਤ ਧੋਖਾਧੜੀ ਦਾ ਪਤਾ ਲਗਾਇਆ ਹੈ। ਇਨਕਮ ਟੈਕਸ ਵਿਭਾਗ ਅਨੁਸਾਰ, ਟੈਕਸਦਾਤਾਵਾਂ ਨੇ ਐਚਆਰਏ ਕਲੇਮ ਲਈ ਅਜਿਹੇ ਪੈਨ ਕਾਰਡਾਂ ਦੀ ਵਰਤੋਂ ਕੀਤੀ, ਜਿਨ੍ਹਾਂ ਦੇ ਉਹ ਕਿਰਾਏਦਾਰ ਵੀ ਨਹੀਂ ਸਨ। ਇਨਕਮ ਟੈਕਸ ਵਿਭਾਗ ਨੇ ਹੁਣ ਤੱਕ ਘੱਟੋ-ਘੱਟ 8,000-10,000 ਅਜਿਹੇ ਮਾਮਲਿਆਂ ਦਾ ਪਤਾ ਲਗਾਇਆ ਹੈ, ਜਿਨ੍ਹਾਂ ਵਿੱਚ 10 ਲੱਖ ਰੁਪਏ ਜਾਂ ਇਸ ਤੋਂ ਵੱਧ ਦੀ ਰਕਮ ਦਾ ਦਾਅਵਾ ਕੀਤਾ ਗਿਆ ਸੀ।
ਕਿਵੇਂ ਹੋਇਆ ਇਹ ਖ਼ੁਲਾਸਾ
ਅਜਿਹੇ ਮਾਮਲੇ ਪਹਿਲੀ ਵਾਰ ਉਦੋਂ ਸਾਹਮਣੇ ਆਏ ਜਦੋਂ ਅਧਿਕਾਰੀਆਂ ਨੂੰ ਇਕ ਵਿਅਕਤੀ ਤੋਂ ਲਗਭਗ 1 ਕਰੋੜ ਰੁਪਏ ਦੇ ਕਿਰਾਏ ਦੀਆਂ ਰਸੀਦਾਂ ਮਿਲੀਆਂ। ਜਦੋਂ ਆਮਦਨ ਕਰ ਵਿਭਾਗ ਦੇ ਅਧਿਕਾਰੀਆਂ ਨੇ ਜਾਂਚ ਸ਼ੁਰੂ ਕੀਤੀ ਤਾਂ ਪਤਾ ਲੱਗਾ ਕਿ ਜਿਸ ਵਿਅਕਤੀ ਦਾ ਪੈਨ ਕਾਰਡ ਵਰਤਿਆ ਗਿਆ ਸੀ, ਉਸ ਨੂੰ ਕਿਰਾਇਆ ਨਹੀਂ ਮਿਲਿਆ ਸੀ। ਇਸ ਮਾਮਲੇ ਦੇ ਖੁਲਾਸੇ ਤੋਂ ਬਾਅਦ ਇਨਕਮ ਟੈਕਸ ਵਿਭਾਗ ਨੇ ਜਾਂਚ ਦਾ ਘੇਰਾ ਵਧਾ ਦਿੱਤਾ ਅਤੇ ਪਤਾ ਲੱਗਾ ਕਿ ਅਜਿਹੇ ਕਈ ਲੋਕ ਹਨ ਜੋ ਐਚਆਰਏ ਦਾਅਵਿਆਂ ਲਈ ਵੱਡੇ ਪੱਧਰ 'ਤੇ ਪੈਨ ਕਾਰਡ ਦੀ ਦੁਰਵਰਤੋਂ ਕਰ ਰਹੇ ਹਨ। ਇੱਥੋਂ ਤੱਕ ਕਿ ਅਧਿਕਾਰੀਆਂ ਨੂੰ ਹੁਣ ਅਜਿਹੇ ਮਾਮਲੇ ਸਾਹਮਣੇ ਆਏ ਹਨ ਜਿੱਥੇ ਕੁਝ ਕੰਪਨੀਆਂ ਦੇ ਮੁਲਾਜ਼ਮਾਂ ਨੇ ਟੈਕਸ ਕਟੌਤੀ ਦਾ ਕਲੇਮ ਕਰਨ ਲਈ ਇਕ ਹੀ ਪੈਨ ਦਾ ਇਸਤੇਮਾਲ ਕੀਤਾ।
ਕੀ ਕਹਿਣਾ ਹੈ ਟੈਕਸ ਅਧਿਕਾਰੀਆਂ ਦਾ?
ਇਕ ਖਬਰ ਮੁਤਾਬਕ ਟੈਕਸ ਅਧਿਕਾਰੀਆਂ ਨੇ ਕਿਹਾ ਕਿ ਵਿਭਾਗ ਹੁਣ ਉਨ੍ਹਾਂ ਕਰਮਚਾਰੀਆਂ ਦਾ ਪਿੱਛਾ ਕਰ ਰਿਹਾ ਹੈ, ਜਿਨ੍ਹਾਂ ਨੇ ਰਿਫੰਡ ਲਈ ਫਰਜ਼ੀ ਕਲੇਮ ਕੀਤੇ ਹਨ। ਹਾਲਾਂਕਿ ਇਹ ਸਪੱਸ਼ਟ ਨਹੀਂ ਹੈ ਕਿ ਅਜਿਹੇ ਲੋਕਾਂ ਖਿਲਾਫ ਕਾਨੂੰਨੀ ਕਾਰਵਾਈ ਦੀ ਵੀ ਯੋਜਨਾ ਹੈ ਜਾਂ ਨਹੀਂ। ਤੁਹਾਨੂੰ ਦੱਸ ਦੇਈਏ ਕਿ ਫਿਲਹਾਲ ਮਕਾਨ ਮਾਲਕ ਦਾ ਟੀਡੀਐਸ (ਸਰੋਤ 'ਤੇ ਟੈਕਸ ਕੱਟਿਆ ਗਿਆ) ਸਿਰਫ 50,000 ਰੁਪਏ ਤੋਂ ਵੱਧ ਦੇ ਮਾਸਿਕ ਕਿਰਾਏ ਜਾਂ 6 ਲੱਖ ਰੁਪਏ ਤੋਂ ਵੱਧ ਦੇ ਸਾਲਾਨਾ ਭੁਗਤਾਨ 'ਤੇ ਲਾਗੂ ਹੁੰਦਾ ਹੈ। ਇਹੀ ਕਾਰਨ ਹੈ ਕਿ ਬਹੁਤ ਸਾਰੇ ਲੋਕ ਆਪਣੇ ਜਾਣ-ਪਛਾਣ ਵਾਲੇ ਜਾਂ ਹੋਰ ਕਿਸਮ ਦੇ ਲੋਕਾਂ ਦੇ ਪੈਨ ਕਾਰਡਾਂ ਦੀ ਦੁਰਵਰਤੋਂ ਕਰ ਰਹੇ ਹਨ।
