MTNL ਦਾ ਬੈਂਕ ਖਾਤਾ ਸੀਜ਼, ਬੈਂਕ ਨੇ ਇਸ ਕਾਰਨ ਸਰਕਾਰੀ ਕੰਪਨੀ ''ਤੇ ਕੀਤੀ ਵੱਡੀ ਕਾਰਵਾਈ

ਨਵੀਂ ਦਿੱਲੀ — ਸਰਕਾਰੀ ਟੈਲੀਕਾਮ ਕੰਪਨੀ ਮਹਾਨਗਰ ਟੈਲੀਫੋਨ ਨਿਗਮ ਲਿਮਟਿਡ (ਐੱਮ. ਟੀ. ਐੱਨ. ਐੱਲ.) ਦੀ ਹਾਲਤ ਲਗਾਤਾਰ ਵਿਗੜਦੀ ਜਾ ਰਹੀ ਹੈ। ਇੱਕ ਬੈਂਕ ਨੇ ਕੰਪਨੀ ਦੇ ਸਾਰੇ ਖਾਤੇ ਫ੍ਰੀਜ਼ ਕਰ ਦਿੱਤੇ ਹਨ। MTNL ਇਸ ਸਮੇਂ ਕਰਜ਼ੇ ਦੇ ਬੋਝ ਹੇਠ ਦੱਬਿਆ ਹੋਇਆ ਹੈ। ਯੂਨੀਅਨ ਬੈਂਕ ਆਫ ਇੰਡੀਆ ਨੇ MTNL ਦੇ ਸਾਰੇ ਖਾਤਿਆਂ ਨੂੰ ਫ੍ਰੀਜ਼ ਕਰ ਦਿੱਤਾ ਹੈ। ਬੈਂਕ ਨੇ ਅਜਿਹਾ ਕੰਪਨੀ ਵੱਲੋਂ ਬਕਾਇਆ ਨਾ ਦੇਣ ਕਾਰਨ ਕੀਤਾ ਹੈ। MTNL ਨੇ ਯੂਨੀਅਨ ਬੈਂਕ ਸਮੇਤ 6 ਬੈਂਕਾਂ ਤੋਂ ਕੁੱਲ 5,573.52 ਕਰੋੜ ਰੁਪਏ ਦਾ ਕਰਜ਼ਾ ਲਿਆ ਹੈ।

ਕੰਪਨੀ ਨੇ ਸ਼ੇਅਰ ਬਾਜ਼ਾਰ ਨੂੰ ਜਾਣਕਾਰੀ ਦਿੱਤੀ

MTNL ਨੇ ਸਟਾਕ ਮਾਰਕਿਟ ਨੂੰ ਵੀ ਆਪਣੇ ਖਾਤਿਆਂ ਨੂੰ ਫ੍ਰੀਜ਼ ਕਰਨ ਦੀ ਸੂਚਨਾ ਦਿੱਤੀ ਹੈ। ਕੰਪਨੀ ਦਾ ਕਹਿਣਾ ਹੈ ਕਿ ਯੂਨੀਅਨ ਬੈਂਕ ਆਫ ਇੰਡੀਆ ਨੇ ਕਰਜ਼ੇ ਦੀ ਅਦਾਇਗੀ ਨਾ ਹੋਣ ਕਾਰਨ ਉਸ ਦੇ ਸਾਰੇ ਖਾਤੇ ਫ੍ਰੀਜ਼ ਕਰ ਦਿੱਤੇ ਹਨ। ਬੈਂਕ ਨੇ 21 ਅਗਸਤ ਨੂੰ ਕੰਪਨੀ ਦੇ ਖਾਤੇ ਫ੍ਰੀਜ਼ ਕਰਨ ਦੀ ਜਾਣਕਾਰੀ ਦਿੱਤੀ ਸੀ।

ਟੈਲੀਕਾਮ ਕੰਪਨੀ ਦਾ ਕਹਿਣਾ ਹੈ ਕਿ ਯੂਨੀਅਨ ਬੈਂਕ ਆਫ ਇੰਡੀਆ ਨੇ ਵੀ ਆਪਣੇ ਲੋਨ ਖਾਤੇ ਨੂੰ NPA ਸ਼੍ਰੇਣੀ 'ਚ ਪਾ ਦਿੱਤਾ ਹੈ। ਇਸ ਦੇ ਨਾਲ ਯੂਨੀਅਨ ਬੈਂਕ ਆਫ ਇੰਡੀਆ ਵਿੱਚ ਕੰਪਨੀ ਦੇ ਸਾਰੇ ਖਾਤੇ ਆਪਣੇ ਆਪ ਹੀ ਫ੍ਰੀਜ਼ ਕਰ ਦਿੱਤੇ ਗਏ ਹਨ। ਅਗਸਤ ਦੀ ਸ਼ੁਰੂਆਤ ਵਿੱਚ, MTNL ਨੇ ਸਟਾਕ ਮਾਰਕੀਟ ਨੂੰ ਜਾਣਕਾਰੀ ਦਿੱਤੀ ਸੀ ਕਿ ਉਹ 422.05 ਕਰੋੜ ਰੁਪਏ ਦੇ ਬੈਂਕ ਕਰਜ਼ੇ ਦਾ ਪੇਮੈਂਟ ਕਰਨ ਤੋਂ ਚੂਕ ਗਈ ਹੈ।

MTNL ਨੇ ਕਿਸ ਬੈਂਕ ਤੋਂ ਲਿਆ ਕਿੰਨਾ ਲੋਨ ? 

ਯੂਨੀਅਨ ਬੈਂਕ ਆਫ ਇੰਡੀਆ ਤੋਂ 155.76 ਕਰੋੜ ਰੁਪਏ
ਸਟੇਟ ਬੈਂਕ ਆਫ ਇੰਡੀਆ ਤੋਂ 140.37 ਕਰੋੜ ਰੁਪਏ
ਬੈਂਕ ਆਫ ਇੰਡੀਆ ਤੋਂ 40.33 ਕਰੋੜ ਰੁਪਏ
ਪੰਜਾਬ ਐਂਡ ਸਿੰਧ ਬੈਂਕ ਤੋਂ 40.01 ਕਰੋੜ ਰੁਪਏ
ਪੰਜਾਬ ਨੈਸ਼ਨਲ ਬੈਂਕ ਤੋਂ 41.54 ਕਰੋੜ ਰੁਪਏ
ਯੂਕੋ ਬੈਂਕ ਤੋਂ 4.04 ਕਰੋੜ ਰੁਪਏ ਦਾ ਭੁਗਤਾਨ ਨਹੀਂ ਕੀਤਾ ਗਿਆ ਹੈ।

ਟੈਲੀਕਾਮ ਕੰਪਨੀ ਨੇ ਇਨ੍ਹਾਂ ਬੈਂਕਾਂ ਤੋਂ ਕੁੱਲ 5,573.52 ਕਰੋੜ ਰੁਪਏ ਦਾ ਕਰਜ਼ਾ ਲਿਆ ਸੀ। ਘਾਟੇ ਵਿੱਚ ਚੱਲ ਰਹੀ ਟੈਲੀਕਾਮ ਕੰਪਨੀ ਨੇ ਬੈਂਕਾਂ ਅਤੇ ਵਿੱਤੀ ਸੰਸਥਾਵਾਂ ਤੋਂ ਕੁੱਲ 7,873.52 ਕਰੋੜ ਰੁਪਏ ਦਾ ਕਰਜ਼ਾ ਲਿਆ ਹੈ ਅਤੇ ਕੰਪਨੀ ਦਾ ਕੁੱਲ ਕਰਜ਼ਾ 31,944.51 ਕਰੋੜ ਰੁਪਏ ਹੈ।