ਪ੍ਰਾਈਵੇਟ ਮੁਲਾਜ਼ਮਾਂ ਲਈ ਖੁਸ਼ਖਬਰੀ: ਇਸ ਸਾਲ ਵਧੇਗੀ ਮੋਟੀ ਸੈਲਰੀ

ਨਵੀਂ ਦਿੱਲੀ : ਭਾਰਤ ਦੀ ਮਜ਼ਬੂਤ ​​ਆਰਥਿਕਤਾ ਅਤੇ ਨਿਯਮਾਂ ਵਿੱਚ ਹੋ ਰਹੀਆਂ ਤਬਦੀਲੀਆਂ ਦਰਮਿਆਨ ਨਿੱਜੀ ਖੇਤਰ (ਪ੍ਰਾਈਵੇਟ ਸੈਕਟਰ) ਦੇ ਕਰਮਚਾਰੀਆਂ ਲਈ ਇੱਕ ਵੱਡੀ ਖੁਸ਼ਖਬਰੀ ਸਾਹਮਣੇ ਆਈ ਹੈ। ਸਾਲ 2026 ਵਿੱਚ ਭਾਰਤੀ ਕੰਪਨੀਆਂ ਆਪਣੇ ਕਰਮਚਾਰੀਆਂ ਦੀਆਂ ਤਨਖਾਹਾਂ ਵਿੱਚ ਔਸਤਨ 9.1% ਦਾ ਵਾਧਾ ਕਰ ਸਕਦੀਆਂ ਹਨ। ਇਹ ਵਾਧਾ ਪਿਛਲੇ ਸਾਲ (2025) ਵਿੱਚ ਦਰਜ ਕੀਤੇ ਗਏ 8.9% ਦੇ ਵਾਧੇ ਨਾਲੋਂ ਵੱਧ ਹੈ।

Aon ਇੰਡੀਆ ਦੇ ਸਰਵੇਖਣ ਵਿੱਚ ਖੁਲਾਸਾ 
'Aon ਇੰਡੀਆ' ਦੇ 32ਵੇਂ ਸਲਾਨਾ ਸੈਲਰੀ ਇੰਕ੍ਰੀਜ਼ ਸਰਵੇਖਣ ਅਨੁਸਾਰ, ਭਾਰਤ ਦਾ ਜੌਬ ਮਾਰਕੀਟ ਵਿਸ਼ਵਵਿਆਪੀ ਅਨਿਸ਼ਚਿਤਤਾਵਾਂ ਦੇ ਬਾਵਜੂਦ ਕਾਫ਼ੀ ਮਜ਼ਬੂਤ ਬਣਿਆ ਹੋਇਆ ਹੈ। ਇਸ ਸਰਵੇਖਣ ਵਿੱਚ 45 ਵੱਖ-ਵੱਖ ਉਦਯੋਗਾਂ ਦੀਆਂ 1,400 ਤੋਂ ਵੱਧ ਕੰਪਨੀਆਂ ਦਾ ਡੇਟਾ ਸ਼ਾਮਲ ਕੀਤਾ ਗਿਆ ਹੈ। ਰਿਪੋਰਟ ਦੱਸਦੀ ਹੈ ਕਿ ਭਾਰਤ ਹੁਣ ਮਜ਼ਬੂਤ ਆਰਥਿਕ ਆਧਾਰ ਦੇ ਨਾਲ ਵਿਕਾਸ ਦੇ ਅਗਲੇ ਪੜਾਅ ਵਿੱਚ ਦਾਖਲ ਹੋ ਰਿਹਾ ਹੈ, ਜਿੱਥੇ ਘਰੇਲੂ ਮੰਗ ਦੀ ਮਜ਼ਬੂਤੀ ਅਤੇ ਘਟਦੀ ਮਹਿੰਗਾਈ ਇਸ ਵਾਧੇ ਦੇ ਮੁੱਖ ਕਾਰਨ ਹਨ।

ਇਨ੍ਹਾਂ ਸੈਕਟਰਾਂ ਵਿੱਚ ਹੋਵੇਗਾ ਸਭ ਤੋਂ ਵੱਧ ਵਾਧਾ 
ਸਾਲ 2026 ਵਿੱਚ ਸਭ ਤੋਂ ਵੱਧ ਤਨਖਾਹ ਵਾਧਾ ਰੀਅਲ ਅਸਟੇਟ, ਇਨਫਰਾਸਟਰਕਚਰ ਅਤੇ ਗੈਰ-ਬੈਂਕਿੰਗ ਵਿੱਤੀ ਕੰਪਨੀਆਂ (NBFCs) ਵਿੱਚ ਦੇਖਣ ਨੂੰ ਮਿਲ ਸਕਦਾ ਹੈ। ਇਸ ਤੋਂ ਇਲਾਵਾ ਆਟੋਮੋਬਾਈਲ, ਇੰਜੀਨੀਅਰਿੰਗ ਡਿਜ਼ਾਈਨ ਸਰਵਿਸਿਜ਼, ਮੈਨੂਫੈਕਚਰਿੰਗ ਅਤੇ ਰਿਟੇਲ ਵਰਗੇ ਖੇਤਰਾਂ ਵਿੱਚ ਵੀ ਔਸਤ ਨਾਲੋਂ ਵੱਧ ਵਾਧਾ ਮਿਲਣ ਦੀ ਉਮੀਦ ਹੈ।

ਭਾਰਤ ਨੇ ਅਮਰੀਕਾ ਅਤੇ ਚੀਨ ਨੂੰ ਵੀ ਪਛਾੜਿਆ 
ਸੈਲਰੀ ਵਧਾਉਣ ਦੇ ਮਾਮਲੇ ਵਿੱਚ ਭਾਰਤ ਦੁਨੀਆ ਦੀਆਂ ਵੱਡੀਆਂ ਆਰਥਿਕਤਾਵਾਂ ਨਾਲੋਂ ਕਿਤੇ ਅੱਗੇ ਹੈ। ਜਿੱਥੇ ਭਾਰਤ ਵਿੱਚ 9.1% ਵਾਧੇ ਦਾ ਅਨੁਮਾਨ ਹੈ, ਉੱਥੇ ਹੀ ਹੋਰ ਦੇਸ਼ਾਂ ਵਿੱਚ ਇਹ ਅੰਕੜਾ ਕਾਫ਼ੀ ਘੱਟ ਹੈ:
• ਅਮਰੀਕਾ: 4.3%
• ਯੂਨਾਈਟਿਡ ਕਿੰਗਡਮ: 4.1%
• ਚੀਨ: 4.8%
• ਜਪਾਨ: 3.7%
• ਜਰਮਨੀ: 3.9%।

ਰਿਪੋਰਟ ਅਨੁਸਾਰ, 2026 ਵਿੱਚ ਭਾਰਤ ਦੀ ਜੀਡੀਪੀ (GDP) ਵਿਕਾਸ ਦਰ 6.2% ਰਹਿਣ ਦਾ ਅਨੁਮਾਨ ਹੈ, ਜਦੋਂ ਕਿ ਕਈ ਵਿਕਸਤ ਦੇਸ਼ਾਂ ਵਿੱਚ ਇਹ 2% ਤੋਂ ਵੀ ਘੱਟ ਰਹਿ ਸਕਦੀ ਹੈ।

ਨੌਕਰੀ ਛੱਡਣ ਦੀ ਦਰ ਵਿੱਚ ਗਿਰਾਵਟ 
ਸਰਵੇਖਣ ਵਿੱਚ ਇੱਕ ਹੋਰ ਰਾਹਤ ਵਾਲੀ ਗੱਲ ਸਾਹਮਣੇ ਆਈ ਹੈ ਕਿ ਕਰਮਚਾਰੀਆਂ ਵੱਲੋਂ ਨੌਕਰੀ ਛੱਡਣ ਦੀ ਦਰ (Attrition Rate) ਘਟ ਕੇ 16.2% ਰਹਿ ਗਈ ਹੈ, ਜੋ ਕਿ 2024 ਵਿੱਚ 17.7% ਅਤੇ 2023 ਵਿੱਚ 18.7% ਸੀ। ਇਸ ਤੋਂ ਇਲਾਵਾ, ਭਾਰਤ ਵਿੱਚ ਨਵੇਂ ਲੇਬਰ ਕੋਡ (Wage Code) ਦੇ ਲਾਗੂ ਹੋਣ ਕਾਰਨ ਲਗਭਗ 35% ਕੰਪਨੀਆਂ ਆਪਣੇ ਸੈਲਰੀ ਸਟ੍ਰਕਚਰ ਵਿੱਚ ਬਦਲਾਅ ਕਰਕੇ ਬੇਸਿਕ ਸੈਲਰੀ ਵਧਾਉਣ ਦੀ ਯੋਜਨਾ ਬਣਾ ਰਹੀਆਂ ਹਨ।

ਇਹ ਅੰਕੜੇ ਸਪੱਸ਼ਟ ਕਰਦੇ ਹਨ ਕਿ ਭਾਰਤ ਦੁਨੀਆ ਦੀ ਸਭ ਤੋਂ ਤੇਜ਼ੀ ਨਾਲ ਵਧ ਰਹੀ ਆਰਥਿਕਤਾ ਬਣਿਆ ਹੋਇਆ ਹੈ ਅਤੇ ਪ੍ਰਾਈਵੇਟ ਸੈਕਟਰ ਵਿੱਚ ਟੈਲੈਂਟ ਦੀ ਲਗਾਤਾਰ ਮੰਗ ਸੈਲਰੀ ਗਰੋਥ ਨੂੰ ਹੁਲਾਰਾ ਦੇ ਰਹੀ ਹੈ।