FD ਨਿਯਮਾਂ ''ਚ ਵੱਡਾ ਬਦਲਾਅ: 1 ਅਕਤੂਬਰ ਤੋਂ ਲਾਗੂ ਹੋਣਗੇ RBI ਦੇ 3 ਨਵੇਂ ਨਿਯਮ

ਮੁੰਬਈ : ਭਾਰਤੀ ਰਿਜ਼ਰਵ ਬੈਂਕ (RBI) ਨੇ ਬੈਂਕਾਂ ਵਿੱਚ ਫਿਕਸਡ ਡਿਪਾਜ਼ਿਟ (FD) ਕਰਵਾਉਣ ਵਾਲੇ ਗਾਹਕਾਂ ਲਈ ਵਿਆਜ ਦਰਾਂ ਦੇ ਨਿਯਮਾਂ ਵਿੱਚ ਵੱਡੇ ਬਦਲਾਅ ਕੀਤੇ ਹਨ। ਇਹ ਨਵੇਂ ਨਿਯਮ 1 ਅਕਤੂਬਰ 2026 ਤੋਂ ਲਾਗੂ ਹੋਣ ਜਾ ਰਹੇ ਹਨ। ਆਰਬੀਆਈ ਦੇ ਇਸ ਕਦਮ ਦਾ ਮੁੱਖ ਉਦੇਸ਼ ਬੈਂਕ ਡਿਪਾਜ਼ਿਟ ਪ੍ਰਣਾਲੀ ਵਿੱਚ ਵਧੇਰੇ ਪਾਰਦਰਸ਼ਤਾ ਅਤੇ ਇੱਕਸਾਰਤਾ ਲਿਆਉਣਾ ਹੈ।

ਨਿਯਮਾਂ ਵਿੱਚ ਕੀਤੇ ਗਏ 3 ਵੱਡੇ ਬਦਲਾਅ:
1. ਹਰ ਰੋਜ਼ ਸਵੇਰੇ 10 ਵਜੇ ਅਪਡੇਟ ਹੋਣਗੀਆਂ ਵਿਆਜ ਦਰਾਂ: ਨਵੇਂ ਨਿਯਮਾਂ ਅਨੁਸਾਰ, ਬੈਂਕਾਂ ਨੂੰ ਹੁਣ ਆਪਣੇ 'ਬਲਕ ਡਿਪਾਜ਼ਿਟ' (Bulk Deposits) 'ਤੇ ਮਿਲਣ ਵਾਲੇ ਵਿਆਜ ਦੀਆਂ ਦਰਾਂ ਹਰ ਕੰਮਕਾਜੀ ਦਿਨ ਸਵੇਰੇ 10:00 ਵਜੇ ਤੋਂ 10:10 ਵਜੇ ਦੇ ਵਿਚਕਾਰ ਆਪਣੀ ਅਧਿਕਾਰਤ ਵੈੱਬਸਾਈਟ 'ਤੇ ਲਾਜ਼ਮੀ ਤੌਰ 'ਤੇ ਅਪਡੇਟ ਕਰਨੀਆਂ ਪੈਣਗੀਆਂ। ਦੱਸਣਯੋਗ ਹੈ ਕਿ 3 ਕਰੋੜ ਰੁਪਏ ਜਾਂ ਇਸ ਤੋਂ ਵੱਧ ਦੀ ਸਿੰਗਲ ਐੱਫਡੀ ਨੂੰ ਬਲਕ ਡਿਪਾਜ਼ਿਟ ਮੰਨਿਆ ਜਾਂਦਾ ਹੈ।
2. ਸਾਰੀਆਂ ਬ੍ਰਾਂਚਾਂ ਵਿੱਚ ਮਿਲੇਗਾ ਇੱਕ ਸਮਾਨ ਵਿਆਜ: ਹੁਣ ਬੈਂਕਾਂ ਦੀਆਂ ਵੱਖ-ਵੱਖ ਸ਼ਾਖਾਵਾਂ (Branches) ਵਿੱਚ ਵਿਆਜ ਦਰਾਂ ਨੂੰ ਲੈ ਕੇ ਕੋਈ ਅਸਮੰਜਸ ਨਹੀਂ ਰਹੇਗਾ। ਜੇਕਰ ਕੋਈ ਨਿਵੇਸ਼ਕ ਇੱਕ ਹੀ ਤਾਰੀਖ਼ ਨੂੰ ਇੱਕੋ ਜਿਹੀ ਰਾਸ਼ੀ ਦੀ ਐੱਫਡੀ ਕਰਵਾਉਂਦਾ ਹੈ, ਤਾਂ ਉਸ ਨੂੰ ਬੈਂਕ ਦੀ ਦੇਸ਼ ਭਰ ਵਿੱਚ ਕਿਸੇ ਵੀ ਬ੍ਰਾਂਚ ਵਿੱਚ ਇੱਕੋ ਜਿਹੀ ਵਿਆਜ ਦਰ ਹੀ ਮਿਲੇਗੀ ਅਤੇ ਦਰਾਂ ਵਿੱਚ ਕੋਈ ਭੇਦਭਾਵ ਨਹੀਂ ਕੀਤਾ ਜਾ ਸਕੇਗਾ।
3. ਬਲਕ ਡਿਪਾਜ਼ਿਟ 'ਤੇ ਵੱਖਰੀ ਵਿਆਜ ਦਰ ਤੈਅ ਕਰਨ ਦੀ ਛੋਟ: ਆਰਬੀਆਈ ਨੇ ਬੈਂਕਾਂ ਨੂੰ ਲਿਕਵਿਡਿਟੀ ਕਵਰੇਜ ਰੇਸ਼ੋ (LCR) ਫਰੇਮਵਰਕ ਦੇ ਅਧਾਰ 'ਤੇ 3 ਕਰੋੜ ਰੁਪਏ ਜਾਂ ਇਸ ਤੋਂ ਵੱਧ ਦੇ ਬਲਕ ਡਿਪਾਜ਼ਿਟਸ 'ਤੇ ਵੱਖ-ਵੱਖ ਵਿਆਜ ਦਰਾਂ ਤੈਅ ਕਰਨ ਦੀ ਖੁੱਲ੍ਹ ਦਿੱਤੀ ਹੈ।

ਇਹ ਨਵੇਂ ਦਿਸ਼ਾ-ਨਿਰਦੇਸ਼ ਮੁੱਖ ਤੌਰ 'ਤੇ ਬਲਕ ਡਿਪਾਜ਼ਿਟ (3 ਕਰੋੜ ਜਾਂ ਵੱਧ ਦੀ ਰਾਸ਼ੀ) ਲਈ ਬਣਾਏ ਗਏ ਹਨ, ਇਸ ਲਈ ਆਮ (ਰੀਟੇਲ) ਐੱਫਡੀ ਨਿਵੇਸ਼ਕਾਂ 'ਤੇ ਇਸ ਦਾ ਕੋਈ ਸਿੱਧਾ ਜਾਂ ਵੱਡਾ ਵਿੱਤੀ ਅਸਰ ਨਹੀਂ ਪਵੇਗਾ। ਹਾਲਾਂਕਿ, ਇਹਨਾਂ ਨਿਯਮਾਂ ਦੇ ਸਖ਼ਤੀ ਨਾਲ ਲਾਗੂ ਹੋਣ ਤੋਂ ਬਾਅਦ ਬੈਂਕਿੰਗ ਪ੍ਰਣਾਲੀ ਵਿੱਚ ਪਾਰਦਰਸ਼ਤਾ ਵਧੇਗੀ, ਜਿਸ ਨਾਲ ਆਮ ਗਾਹਕ ਵੀ ਆਸਾਨੀ ਨਾਲ ਆਨਲਾਈਨ ਚੈੱਕ ਕਰ ਸਕਣਗੇ ਕਿ ਕਿਸ ਬੈਂਕ ਵਿੱਚ ਸਭ ਤੋਂ ਵੱਧ ਵਿਆਜ ਮਿਲ ਰਿਹਾ ਹੈ।