ਤਲਾਕ ਨੇ ਮੈਕੇਂਜੀ ਨੂੰ ਬਣਾਇਆ ਦੁਨੀਆ ਦੀ ਚੌਥੀ ਸਭ ਤੋਂ ਅਮੀਰ ਔਰਤ

ਨਵੀਂ ਦਿੱਲੀ — Amazon ਦੇ CEO ਜੇਫ ਬੇਜੋਸ ਦੇ ਤਲਾਕ ਦੀ ਪ੍ਰਕਿਰਿਆ ਪੂਰੀ ਹੋ ਗਈ ਹੈ। ਇਸ ਦੇ ਨਾਲ ਹੀ ਮੈਕੇਂਜੀ(ਬੇਜੋਸ ਦੀ ਸਾਬਕਾ ਪਤਨੀ) ਦੁਨੀਆ ਦੀ ਚੌਥੀ ਸਭ ਤੋਂ ਅਮੀਰ ਮਹਿਲਾ ਬਣ ਗਈ ਹੈ। ਉਨ੍ਹਾਂ ਦੇ ਹਿੱਸੇ ਐਮਾਜ਼ੋਨ ਦੇ 4 ਫੀਸਦੀ ਸ਼ੇਅਰ ਆਏ ਹਨ। ਇਨ੍ਹਾਂ ਸ਼ੇਅਰਾਂ ਦੀ ਵੈਲਿਊ 36.5 ਅਰਬ ਡਾਲਰ(ਕਰੀਬ 2.52 ਲੱਖ ਕਰੋੜ ਰੁਪਏ) ਹੈ। ਸੰਯੁਕਤ ਸ਼ੇਅਰਾਂ ਵਿਚੋਂ ਮੈਕੇਂਜੀ ਨੂੰ ਹਿੱਸਾ ਦੇਣ ਤੋਂ ਬਾਅਦ ਵੀ ਜੇਫ ਬੇਜੋਸ 114 ਅਰਬ ਡਾਲਰ(7.87 ਲੱਖ ਕਰੋੜ ਰੁਪਏ) ਦੀ ਨੈੱਟਵਰਥ ਦੇ ਨਾਲ ਦੁਨੀਆ ਦੇ ਸਭ ਤੋਂ ਵੱਡੇ ਅਮੀਰ ਬਣੇ ਹੋਏ ਹਨ।

ਦੂਜੇ ਪਾਸੇ ਮੈਕੇਂਜੀ ਦੁਨੀਆ ਦੀਆਂ ਟਾਪ 4 ਅਮੀਰ ਮਹਿਲਾਵਾਂ 'ਚ ਸ਼ਾਮਲ ਹੋ ਗਈ ਹੈ। ਦੁਨੀਆ ਦੀ ਸਭ ਤੋਂ ਅਮੀਰ ਤਿੰਨ ਮਹਿਲਾਵਾਂ ਦੀ ਗੱਲ ਕਰੀਏ ਤਾਂ ਲੋਰਿਅਲ ਗਰੁੱਪ ਦੀ ਫ੍ਰੇਂਕੋਇਸ ਮੀਅਰਸ 53.7 ਅਰਬ ਡਾਲਰ ਨਾਲ ਸਭ ਤੋਂ ਅੱਗੇ ਹੈ। ਇਸ ਤੋਂ ਬਾਅਦ ਵਾਲਮਾਰਟ ਦੀ ਏਲਾਇਸ ਵਾਲਟਨ ਦੇ ਕੋਲ 44.2 ਅਰਬ ਡਾਲਰ ਅਤੇ ਜੈਕਲੀਨ ਮਾਰਸ(ਮਾਰਸ,ਯੂ.ਐਸ.) ਦੀ ਜਾਇਦਾਦ 37.1 ਅਰਬ ਡਾਲਰ ਹੈ। 

ਮੈਕੇਂਜੀ ਨੇ ਆਪਣੇ ਹਿੱਸੇ ਦੇ ਵੋਟਿੰਗ ਰਾਇਟ ਬੇਜੋਸ ਨੂੰ ਦਿੱਤੇ

ਤਲਾਕ ਲਈ ਹੋਏ ਸਮਝੌਤੇ ਦੇ ਮੁਤਾਬਕ ਮੈਕੇਂਜੀ ਸੰਯੁਕਤ ਸ਼ੇਅਰਾਂ ਵਿਚੋਂ 75 ਫੀਸਦੀ ਬੇਜੋਸ ਨੂੰ ਦੇਣ ਅਤੇ 25 ਫੀਸਦੀ ਆਪਣੇ ਕੋਲ ਰੱਖਣ ਲਈ ਰਾਜ਼ੀ ਹੋਈ ਹੈ। ਦੋਵਾਂ ਕੋਲ ਐਮਾਜ਼ੋਨ ਦੇ 16 ਫੀਸਦੀ ਸ਼ੇਅਰ  ਸਨ। ਉਨ੍ਹਾਂ ਵਿਚੋਂ 4 ਫੀਸਦੀ ਹੁਣ ਮੈਕੇਂਜੀ ਕੋਲ ਹਨ। ਹਾਲਾਂਕਿ ਮੈਕੇਂਜੀ ਨੇ ਆਪਣੇ ਹਿੱਸੇ ਦੇ ਸ਼ੇਅਰਾਂ ਦੇ ਵੋਟਿੰਗ ਰਾਇਟਸ ਬੇਜੋਸ ਨੂੰ ਦਿੱਤੇ ਹਨ। ਬੇਜੋਸ ਦੀ ਅਖਬਾਰ ਵਾਸ਼ਿੰਗਟਨ ਪੋਸਟ ਅਤੇ ਸਪੇਸ ਕੰਪਨੀ ਬਲਿਊ ਓਰਿਜਨ 'ਚ ਵੀ ਉਨ੍ਹਾਂ ਨੇ ਕੋਈ ਹਿੱਸੇਦਾਰੀ ਨਹੀਂ ਮੰਗੀ ਹੈ।

ਮੈਕੇਂਜੀ ਐਮਾਜ਼ੋਨ ਦੀ ਤੀਜੀ ਵੱਡੀ ਸ਼ੇਅਰ ਹੋਲਡਰ

ਮੈਕੇਂਜੀ ਨੂੰ ਤਲਾਕ ਤੋਂ ਬਾਅਦ 4 ਫੀਸਦੀ ਸ਼ੇਅਰ ਮਿਲ ਜਾਣ ਤੋਂ ਬਾਅਦ ਜੇਫ ਬੇਜੋਸ ਕੋਲ ਐਮਾਜ਼ੋਨ ਦੇ 12 ਫੀਸਦੀ ਸ਼ੇਅਰ ਰਹਿ ਗਏ ਹਨ। ਉਹ ਐਮਾਜ਼ੋਨ ਦੇ ਸਭ ਤੋਂ ਵੱਡੇ ਸ਼ੇਅਰਧਾਰਕ ਹਨ। ਦੂਜੇ ਨੰਬਰ 'ਤੇ ਇਨਵੈਸਟਮੈਂਟ ਗਰੁੱਪ ਵੇਨਗਾਰਡ ਹੈ। ਮੈਕੇਂਜੀ ਤੀਜੀ ਸਭ ਤੋਂ ਵੱਡੀ ਸ਼ੇਅਰਧਾਰਕ ਬਣ ਗਈ ਹੈ।

26 ਸਾਲ ਪਹਿਲਾ ਨੌਕਰੀ ਲਈ ਇੰਟਰਵਿਊ 'ਚ ਪਹਿਲੀ ਵਾਰ ਮਿਲੇ ਸਨ ਜੇਫ ਅਤੇ ਮੈਕੇਂਜੀ

ਮੈਕੇਂਜੀ ਕਹਾਣੀਕਾਰ ਹੈ ਅਤੇ ਉਨ੍ਹਾਂ ਨੇ 'ਦਿ ਟੈਸਟਿੰਗ ਆਫ ਲੂਥਰ ਅਲਬ੍ਰਾਇਟ' ਅਤੇ 'ਟ੍ਰੈਪਸ' ਸਮੇਤ ਕਈ ਕਿਤਾਬਾਂ ਲਿਖੀਆਂ ਹਨ। ਸਾਲ 1992 'ਚ ਨੌਕਰੀ ਲਈ ਇੰਟਰਵਿਊ ਦੌਰਾਨ ਜੇਫ ਬੇਜੋਸ ਨਾਲ ਉਨ੍ਹਾਂ ਦੀ ਪਹਿਲੀ ਵਾਰ ਮੁਲਾਕਾਤ ਹੋਈ ਸੀ। ਇਹ ਹੇਜ ਫੰਡ ਕੰਪਨੀ ਡੀ ਈ ਸ਼ਾਅ ਵਿਚ ਇੰਟਰਵਿਊ ਲਈ ਗਈ ਸੀ। ਜੇਫ ਨੇ ਹੀ ਉਨ੍ਹਾਂ ਦਾ ਇੰਟਰਵਿਊ ਲਿਆ ਸੀ।

ਐਮਾਜ਼ੋਨ ਦੀ ਤਰੱਕੀ 'ਚ ਉਨ੍ਹਾਂ ਦਾ ਅਹਿਮ ਯੋਗਦਾਨ

ਸਾਲ 1993 'ਚ ਜੇਫ ਅਤੇ ਮੈਕੇਂਜੀ ਦਾ ਵਿਆਹ ਹੋ ਗਿਆ। ਉਸ ਸਮੇਂ ਦੋਵੇਂ ਹੇਜ ਫੰਡ ਕੰਪਨੀ 'ਡੀ.ਈ.ਸ਼ਾਅ' 'ਚ ਕੰਮ ਕਰਦੇ ਸਨ। ਵਿਆਹ ਦੇ ਅਗਲੇ ਸਾਲ ਯਾਨੀ ਕਿ 1994 'ਚ ਜੇਫ ਬੇਜੋਸ ਨੇ ਐਮਾਜ਼ੋਨ ਦੀ ਸ਼ੁਰੂਆਤ ਕੀਤੀ। ਐਮਾਜ਼ੋਨ ਦੇ ਪਹਿਲੇ ਕੰਟ੍ਰੈਕਟ ਲਈ ਮੈਕੇਂਜੀ ਨੇ ਹੀ ਡੀਲ ਕੀਤੀ ਸੀ। ਗੈਰਾਜ ਵਿਚ ਸ਼ੁਰੂ ਹੋਈ ਐਮਾਜ਼ੋਨ ਅੱਜ ਦੁਨੀਆ ਦੀਆਂ ਸਿਖਰ ਕੰਪਨੀਆਂ ਵਿਚ ਸ਼ਾਮਲ ਹੈ। ਕੰਪਨੀ ਦਾ ਮਾਰਕਿਟ ਕੈਪ 893 ਅਰਬ ਡਾਲਰ ਦਾ ਹੈ।