ਫੈਡਰਲ ਬੈਂਕ ਦਾ ਪਹਿਲੀ ਤਿਮਾਹੀ ਦਾ ਮੁਨਾਫਾ 64 ਫੀਸਦੀ ਵਧ ਕੇ 600.66 ਕਰੋੜ ਰੁਪਏ

ਨਵੀਂ ਦਿੱਲੀ (ਭਾਸ਼ਾ) - ਵਿੱਤੀ ਸਾਲ 2022-23 ਦੀ ਅਪ੍ਰੈਲ-ਜੂਨ ਤਿਮਾਹੀ ਵਿੱਚ ਫੈਡਰਲ ਬੈਂਕ ਦਾ ਸ਼ੁੱਧ ਲਾਭ 64 ਫੀਸਦੀ ਵਧ ਕੇ 600.66 ਕਰੋੜ ਰੁਪਏ ਹੋ ਗਿਆ ਹੈ। ਬੈਂਕ ਨੇ ਸ਼ੁੱਕਰਵਾਰ ਨੂੰ ਇਹ ਜਾਣਕਾਰੀ ਦਿੱਤੀ।

ਨਿੱਜੀ ਖੇਤਰ ਦੇ ਰਿਣਦਾਤਾ ਬੈਂਕ ਨੇ ਵਿੱਤੀ ਸਾਲ 2021-22 ਦੀ ਜੂਨ ਤਿਮਾਹੀ ਵਿੱਚ 367.29 ਕਰੋੜ ਰੁਪਏ ਦਾ ਸ਼ੁੱਧ ਲਾਭ ਕਮਾਇਆ ਸੀ। ਪਿਛਲੀ ਤਿਮਾਹੀ (ਜਨਵਰੀ-ਮਾਰਚ) 'ਚ ਬੈਂਕ ਦਾ ਸ਼ੁੱਧ ਲਾਭ 540.54 ਕਰੋੜ ਰੁਪਏ ਸੀ।
ਫੈਡਰਲ ਬੈਂਕ ਨੇ ਸਟਾਕ ਐਕਸਚੇਂਜ ਨੂੰ ਇਕ ਨੋਟੀਫਿਕੇਸ਼ਨ ਵਿਚ ਕਿਹਾ ਕਿ ਵਿੱਤੀ ਸਾਲ 2022-23 ਦੀ ਅਪ੍ਰੈਲ-ਜੂਨ ਤਿਮਾਹੀ ਦੌਰਾਨ ਉਸਦੀ ਕੁੱਲ ਆਮਦਨ ਵਧ ਕੇ 4,081.48 ਕਰੋੜ ਰੁਪਏ ਹੋ ਗਈ। ਪਿਛਲੇ ਵਿੱਤੀ ਸਾਲ ਦੀ ਇਸੇ ਤਿਮਾਹੀ 'ਚ ਇਹ 4,003.97 ਕਰੋੜ ਰੁਪਏ ਸੀ।

30 ਜੂਨ, 2022 ਤੱਕ ਬੈਂਕ ਦੀ ਕੁੱਲ ਗੈਰ-ਕਾਰਗੁਜ਼ਾਰੀ ਸੰਪੱਤੀ (NPAs) ਕੁੱਲ ਪੇਸ਼ਗੀ ਦੇ 2.69 ਪ੍ਰਤੀਸ਼ਤ ਤੱਕ ਘਟ ਗਈ ਹੈ। ਜੂਨ, 2021 ਦੇ ਅੰਤ ਤੱਕ ਇਹ 3.50 ਫੀਸਦੀ ਸੀ।

ਮੁੱਲ ਦੇ ਲਿਹਾਜ਼ ਨਾਲ, ਕੁੱਲ ਐੱਨ.ਪੀ.ਏ. ਜਾਂ ਖਰਾਬ ਕਰਜ਼ੇ 4,155.33 ਕਰੋੜ ਰੁਪਏ 'ਤੇ ਆ ਗਏ। ਵਿੱਤੀ ਸਾਲ 2021-22 ਦੀ ਜੂਨ ਤਿਮਾਹੀ ਦੇ ਅੰਤ ਵਿੱਚ 4,649.33 ਕਰੋੜ ਰੁਪਏ ਸੀ।

ਸਮੀਖਿਆ ਅਧੀਨ ਤਿਮਾਹੀ 'ਚ ਖਰਾਬ ਕਰਜ਼ਿਆਂ ਅਤੇ ਸੰਕਟਕਾਲਾਂ ਲਈ ਬੈਂਕ ਦੀ ਵਿਵਸਥਾ ਘਟ ਕੇ 166.68 ਕਰੋੜ ਰੁਪਏ ਰਹਿ ਗਈ, ਜੋ ਇਕ ਸਾਲ ਪਹਿਲਾਂ ਦੀ ਮਿਆਦ 'ਚ 639.94 ਕਰੋੜ ਰੁਪਏ ਸੀ।