ਡਰਾਈ ਫਰੂਟਸ ਦੇ ਭਾਅ ’ਚ 50 ਫੀਸਦੀ ਤੱਕ ਉਛਾਲ: ਵੈਸਟ ਏਸ਼ੀਆ ਜੰਗ ਦਾ ਸਿੱਧਾ ਅਸਰ

ਨਵੀਂ ਦਿੱਲੀ - ਵੈਸਟ ਏਸ਼ੀਆ ’ਚ ਜਾਰੀ ਸੰਘਰਸ਼ ਦਾ ਅਸਰ ਹੁਣ ਦਿੱਲੀ ਦੀ ਰਸੋਈ ਅਤੇ ਕਾਰੋਬਾਰ ਦੋਵਾਂ ’ਤੇ ਦਿਸਣ ਲੱਗਾ ਹੈ। ਰਾਸ਼ਟਰੀ ਰਾਜਧਾਨੀ ’ਚ ਡਰਾਈ ਫਰੂਟਸ ਦੀਆਂ ਕੀਮਤਾਂ ’ਚ 20 ਤੋਂ 50 ਫੀਸਦੀ ਤੱਕ ਦਾ ਵਾਧਾ ਦਰਜ ਕੀਤਾ ਗਿਆ ਹੈ। ਕਾਰੋਬਾਰੀਆਂ ਦਾ ਕਹਿਣਾ ਹੈ ਕਿ ਸਪਲਾਈ ਪ੍ਰਭਾਵਿਤ ਹੋਣ ਨਾਲ ਬਾਜ਼ਾਰ ’ਚ ਬੇਯਕੀਨੀ ਵਧ ਗਈ ਹੈ, ਜਿਸ ਦਾ ਸਿੱਧਾ ਅਸਰ ਖਪਤਕਾਰਾਂ ਦੀ ਜੇਬ ’ਤੇ ਪੈ ਰਿਹਾ ਹੈ।

ਪੁਰਾਣੀ ਦਿੱਲੀ ਦੇ ਚਾਂਦਨੀ ਚੌਕ ਸਥਿਤ ਖਾਰੀ ਬਾਵਲੀ, ਜੋ ਏਸ਼ੀਆ ਦਾ ਸਭ ਤੋਂ ਵੱਡਾ ਮਸਾਲਾ ਅਤੇ ਡਰਾਈ ਫਰੂਟਸ ਥੋਕ ਬਾਜ਼ਾਰ ਮੰਨਿਆ ਜਾਂਦਾ ਹੈ, ਉੱਥੇ ਹਾਲਾਤ ਸਭ ਤੋਂ ਜ਼ਿਆਦਾ ਪ੍ਰਭਾਵਿਤ ਦਿਸ ਰਹੇ ਹਨ। ਖਾਰੀ ਬਾਵਲੀ ਮਾਰਕੀਟ ਐਸੋਸੀਏਸ਼ਨ ਦੇ ਪ੍ਰਧਾਨ ਰਾਜੀਵ ਭਾਟੀਆ ਨੇ ਕਿਹਾ,“ਡਰਾਈ ਫਰੂਟਸ ਦੀਆਂ ਕੀਮਤਾਂ ’ਚ 20 ਤੋਂ 50 ਫੀਸਦੀ ਤੱਕ ਵਾਧਾ ਹੋਇਆ ਹੈ ਕਿਉਂਕਿ ਸੰਘਰਸ਼ ਦੌਰਾਨ ਸਪਲਾਈ ’ਚ ਭਾਰੀ ਕਮੀ ਆ ਗਈ ਹੈ। ਕਾਜੂ ਨੂੰ ਛੱਡ ਕੇ ਜ਼ਿਆਦਾਤਰ ਡਰਾਈ ਫਰੂਟਸ ਵੈਸਟ ਏਸ਼ੀਆ ਤੋਂ ਦਰਾਮਦ ਹੁੰਦੇ ਹਨ ਅਤੇ ਉਨ੍ਹਾਂ ਦੀ ਸਪਲਾਈ ਲੱਗਭਗ ਰੁਕ ਗਈ ਹੈ। ਈਦ ਨਜ਼ਦੀਕ ਆਉਣ ਨਾਲ ਖਜੂਰ ਦੀ ਮੰਗ ਵਧੀ ਹੈ ਪਰ ਸਟਾਕ ਸੀਮਤ ਹੈ।”

ਥੋਕ ਬਾਜ਼ਾਰਾਂ ’ਚ ਬੇਯਕੀਨੀ
ਖਾਰੀ ਬਾਵਲੀ ’ਚ ਕਾਰੋਬਾਰੀ ਫਿਲਹਾਲ ਪੁਰਾਣੇ ਸਟਾਕ ਦੇ ਸਹਾਰੇ ਕੰਮ ਚਲਾ ਰਹੇ ਹਨ। ਇਕ ਹੋਰ ਥੋਕ ਵਪਾਰੀ ਓਮੇਸ਼ ਜੈਨ ਨੇ ਦੱਸਿਆ,“ਅਸੀਂ ਸੀਮਤ ਸਟਾਕ ਨਾਲ ਕੰਮ ਕਰ ਰਹੇ ਹਾਂ। ਬਾਦਾਮ, ਅੰਜੀਰ, ਚਿਲਗੋਜ਼ਾ, ਖਜੂਰ ਅਤੇ ਕਈ ਹਰਬਜ਼ ਦੀ ਸਪਲਾਈ ਪੂਰੀ ਤਰ੍ਹਾਂ ਰੁਕ ਗਈ ਹੈ।” ਉਨ੍ਹਾਂ ਚਿਤਾਵਨੀ ਦਿੱਤੀ ਕਿ ਜੇਕਰ ਹਾਲਾਤ ਅਜਿਹੇ ਹੀ ਬਣੇ ਰਹੇ ਤਾਂ ਆਉਣ ਵਾਲੇ ਹਫਤਿਆਂ ’ਚ ਕੀਮਤਾਂ ਹੋਰ ਵਧ ਸਕਦੀਆਂ ਹਨ।

ਕਾਰੋਬਾਰੀਆਂ ਮੁਤਾਬਕ ਭਾਰਤ ਦਾ ਜ਼ਿਆਦਾਤਰ ਡਰਾਈ ਫਰੂਟ ਅਤੇ ਮਸਾਲਾ ਵਪਾਰ ਦੁਬਈ ਜ਼ਰੀਏ ਸੰਚਾਲਿਤ ਹੁੰਦਾ ਹੈ। ਮੌਜੂਦਾ ਸੰਘਰਸ਼ ਦੌਰਾਨ ਇਸ ਟ੍ਰਾਂਜ਼ਿਟ ਚੈਨਲ ’ਚ ਰੁਕਾਵਟ ਆਉਣ ਨਾਲ ਚਾਂਦਨੀ ਚੌਕ, ਖਾਰੀ ਬਾਵਲੀ, ਭਾਗੀਰਥ ਪੈਲੇਸ, ਕਸ਼ਮੀਰੀ ਗੇਟ ਅਤੇ ਸਦਰ ਬਾਜ਼ਾਰ ਵਰਗੇ ਪ੍ਰਮੁੱਖ ਕਾਰੋਬਾਰੀ ਕੇਂਦਰਾਂ ’ਚ ਬੇਯਕੀਨੀ ਵਧ ਗਈ ਹੈ।

ਵਪਾਰ ’ਤੇ 5000 ਕਰੋੜ ਦਾ ਖਤਰਾ
ਚੈਂਬਰ ਆਫ ਟ੍ਰੇਡ ਐਂਡ ਇੰਡਸਟਰੀ (ਸੀ. ਟੀ. ਆਈ.) ਦੇ ਚੇਅਰਮੈਨ ਬ੍ਰਿਜੇਸ਼ ਗੋਇਲ ਨੇ ਚਿਤਾਵਨੀ ਦਿੱਤੀ ਕਿ ਜੇਕਰ ਸੰਘਰਸ਼ ਲੰਮਾ ਖਿੱਚਦਾ ਹੈ, ਤਾਂ ਦਿੱਲੀ ਦਾ ਕਰੀਬ 5000 ਕਰੋੜ ਰੁਪਏ ਦਾ ਵਪਾਰ ਅਤੇ ਉਦਯੋਗਿਕ ਸਰਗਰਮੀਆਂ ਪ੍ਰਭਾਵਿਤ ਹੋ ਸਕਦੀਆਂ ਹਨ। ਉਨ੍ਹਾਂ ਦੱਸਿਆ ਕਿ ਈਰਾਨ ਤੋਂ ਦਰਾਮਦ ਕੀਤੇ ਪਿਸਤਾ, ਆਲੂਬੁਖਾਰਾ, ਕਿਸ਼ਮਿਸ਼, ਅੰਜੀਰ, ਖਜੂਰ ਅਤੇ ਮਾਮਰਾ ਬਾਦਾਮ ਦੇ ਭਾਅ ’ਚ 30 ਤੋਂ 40 ਫੀਸਦੀ ਤੱਕ ਉਛਾਲ ਆ ਚੁੱਕਾ ਹੈ।

ਸਟ੍ਰੀਟ ਫੂਡ ਕਾਰੋਬਾਰ ’ਤੇ ਸੰਕਟ
ਸੀ. ਟੀ. ਆਈ. ਮੁਤਾਬਕ ਦਿੱਲੀ ’ਚ ਕਰੀਬ 50,000 ਸਟ੍ਰੀਟ ਫੂਡ ਵੈਂਡਰਜ਼ ਕੰਮ ਕਰਦੇ ਹਨ ਅਤੇ ਮੌਜੂਦਾ ਸਪਲਾਈ ਸੰਕਟ ਕਾਰਨ ਇਨ੍ਹਾਂ ’ਚੋਂ 20 ਤੋਂ 30 ਫੀਸਦੀ ਦੇ ਬੰਦ ਹੋਣ ਦਾ ਖਤਰਾ ਪੈਦਾ ਹੋ ਗਿਆ ਹੈ।

ਮਾਹਿਰਾਂ ਦਾ ਮੰਨਣਾ ਹੈ ਕਿ ਜੇਕਰ ਵੈਸਟ ਏਸ਼ੀਆ ’ਚ ਤਣਾਅ ਜਲਦ ਘੱਟ ਨਹੀਂ ਹੋਇਆ, ਤਾਂ ਇਸ ਦਾ ਅਸਰ ਨਾ ਸਿਰਫ ਡਰਾਈ ਫਰੂਟਸ ਅਤੇ ਦਵਾਈਆਂ ਦੀਆਂ ਕੀਮਤਾਂ ’ਤੇ, ਸਗੋਂ ਰਾਜਧਾਨੀ ਦੀ ਪੂਰੀ ਵਪਾਰਕ ਵਿਵਸਥਾ ਅਤੇ ਰੋਜ਼ਾਨਾ ਦੀ ਜ਼ਿੰਦਗੀ ’ਤੇ ਪੈ ਸਕਦਾ ਹੈ। ਫਿਲਹਾਲ ਬਾਜ਼ਾਰ ’ਚ ਵਧਦੀਆਂ ਕੀਮਤਾਂ ਅਤੇ ਘਟਦੀ ਸਪਲਾਈ ਇਸ ਗੱਲ ਦਾ ਸੰਕੇਤ ਦੇ ਰਹੀਆਂ ਹਨ ਕਿ ਅੰਤਰਰਾਸ਼ਟਰੀ ਸੰਕਟ ਦਾ ਅਸਰ ਹੁਣ ਆਮ ਖਪਤਕਾਰ ਤੱਕ ਡੂੰਘਾਈ ਨਾਲ ਪਹੁੰਚ ਚੁੱਕਾ ਹੈ।