ਐੱਫ.ਸੀ.ਆਈ ਦੇ ਗੁਦਾਮਾਂ ਨੂੰ ਜਲਦ ਕੀਤਾ ਜਾਵੇ ਖਾਲੀ : ਅਮਰਨਾਥ ਬਿੱਲੂ

ਬੁਢਲਾਡਾ, (ਮਨਜੀਤ)- ਵਿਧਾਨ ਸਭਾ ਹਲਕਾ ਬੁਢਲਾਡਾ ਵਿਖੇ ਐੱਫ.ਸੀ.ਆਈ ਦੇ ਗੁਦਾਮਾਂ ਵਿੱਚ ਚਾਵਲ ਲਗਾਉਣ ਦੀ ਸਪੇਸ ਨਾ ਹੋਣ ਕਾਰਨ 50% ਦੇ ਕਰੀਬ ਸੈੱਲਰਾਂ ਵਿੱਚ ਪੰਜਾਬ ਦੀਆਂ ਏਜੰਸੀਆਂ ਦਾ ਪਿਆ ਝੋਨਾ ਦਿਨੋਂ-ਦਿਨ ਘਟ ਰਿਹਾ ਹੈ। ਜਿਸ ਦੀ ਮਾਰ ਸੈੱਲਰ ਮਾਲਕਾਂ ਨੂੰ ਪੈ ਰਹੀ ਹੈ ਅਤੇ ਸੈੱਲਰ ਕਾਰੋਬਾਰ ਘਾਟੇ ਦਾ ਸੌਦਾ ਬਣਦਾ ਜਾ ਰਿਹਾ ਹੈ। ਪਰ ਕੋਈ ਵੀ ਪੰਜਾਬ ਦੀ ਰਾਜਸੀ ਪਾਰਟੀ ਸੈੱਲਰ ਸਨਤ ਦੇ ਮਾਲਕਾਂ ਦੀ ਬਾਂਹ ਨਹੀਂ ਫੜ ਰਹੀ। ਇਹ ਸ਼ਬਦ ਰਾਈਸ ਅੇਸੋਸੀਏਸ਼ਨ ਪੰਜਾਬ ਦੇ ਮੀਤ ਪ੍ਰਧਾਨ ਅਮਰਨਾਥ ਬਿੱਲੂ ਨੇ ਗੱਲਬਾਤ ਕਰਦਿਆਂ ਕਿਹਾ ਕਿ ਸੈੱਲਰਾਂ ਵਿੱਚ ਪਹਿਲਾਂ ਹੀ ਝੋਨਾ 70% ਲੱਗਿਆ ਹੋਇਆ ਹੈ। ਉਸ ਵਿੱਚੋਂ ਵੀ 50% ਝੋਨਾ ਅਜੇ ਤੱਕ ਐੱਫ.ਸੀ.ਆਈ ਦੇ ਗੁਦਾਮਾਂ ਵਿੱਚ ਸਪੇਸ ਨਾ ਹੋਣ ਕਾਰਨ ਸੈੱਲਰਾਂ ਵਿੱਚ ਪਿਆ ਸੁੱਕ ਰਿਹਾ ਹੈ।

ਉਨ੍ਹਾਂ ਦੱਸਿਆ ਕਿ ਸੈੱਲਰ ਮਾਲਕਾਂ ਵੱਲੋਂ ਵਾਰ-ਵਾਰ ਉੱਚ ਅਧਿਕਾਰੀਆਂ, ਰਾਜ ਸਰਕਾਰ ਅਤੇ ਵਿਰੋਧੀ ਧਿਰ ਦੇ ਧਿਆਨ ਵਿੱਚ ਲਿਆਂਦਾ ਹੈ। ਪਰ ਉਨ੍ਹਾਂ ਦੀ ਕੋਈ ਸੁਣਵਾਈ ਨਹੀਂ ਹੋ ਰਹੀ। ਉਨ੍ਹਾਂ ਦੱਸਿਆ ਕਿ ਫੋਰਮੈਨ ਅਤੇ ਲੇਵਰ ਸੈੱਲਰਾਂ ਵਿੱਚੋਂ ਚਲੀ ਗਈ ਹੈ। ਉਨ੍ਹਾਂ ਨੂੰ ਵਾਧੂ ਖਰਚੇ ਰੱਖ-ਰਖਾਵ ਅਤੇ ਸਾਂਭ-ਸੰਭਾਲ ਦੇ ਪੈ ਰਹੇ ਹਨ। ਜਿਸ ਕਰਕੇ ਸੈੱਲਰ ਮਾਲਕ ਮਾਨਸਿਕ ਪ੍ਰੇਸ਼ਾਨੀ ਵਿੱਚੋਂ ਗੁਜ਼ਰ ਰਹੇ ਹਨ। ਉਨ੍ਹਾਂ ਜ਼ਿਲ੍ਹਾ ਮਾਨਸਾ ਦੇ ਡਿਪਟੀ ਕਮਿਸ਼ਨਰ ਅਤੇ ਐੱਫ.ਸੀ.ਆਈ ਦੇ ਉੱਚ ਅਧਿਕਾਰੀਆਂ ਨੂੰ ਅਪੀਲ ਕੀਤੀ ਕਿ ਐੱਫ.ਸੀ.ਆਈ ਦੇ ਗੁਦਾਮਾਂ ਵਿੱਚ ਸਪੈਸ਼ਲ ਲਗਾ ਕੇ ਗੁਦਾਮ ਖਾਲੀ ਕਰਵਾਏ ਜਾਣ ਅਤੇ ਸੈੱਲਰਾਂ ਵਿੱਚ ਪਏ ਚਾਵਲ ਗੁਦਾਮਾਂ ਵਿੱਚ ਲਗਾਏ ਜਾਣ ਤਾਂ ਜੋ ਆਉਣ ਵਾਲੇ ਸੀਜ਼ਨ ਦਾ ਕੰਮ ਸੁਖਾਲਾ ਹੋ ਸਕੇ।