‘ਕਿਤੇ ਪਿਤਾ, ਕਿਤੇ ਪਤੀ ਤਾਂ ਕਿਤੇ ਔਲਾਦ ਦੀ ਹੱਤਿਆ’, ਆਪਣਿਆਂ ਦੇ ਹੱਥੋਂ ਹੀ ਮਾਰੇ ਜਾ ਰਹੇ ਆਪਣੇ!

ਸਾਡੇ ਧਰਮ ਗ੍ਰੰਥਾਂ ’ਚ ਮਾਤਾ-ਪਿਤਾ ਨੂੰ ਭਗਵਾਨ ਅਤੇ ਪਤੀ ਨੂੰ ਪਰਮੇਸ਼ਵਰ ਦਾ ਦਰਜਾ ਦਿੱਤਾ ਗਿਆ ਹੈ ਪਰ ਅੱਜ ਦੇ ਯੁੱਗ ’ਚ ਲੋਕ ਇਨ੍ਹਾਂ ਰਿਸ਼ਤਿਆਂ ਦੀ ਮਰਿਆਦਾ ਨੂੰ ਤਾਰ-ਤਾਰ ਕਰ ਕੇ ਆਪਣਿਆਂ ਦੀ ਹੀ ਹੱਤਿਆ ਕਰ ਰਹੇ ਹਨ। ਇਸ ਤਰ੍ਹਾਂ ਦੀਆਂ ਘਿਨੌਣੀਆਂ ਘਟਨਾਵਾਂ ਦੇ ਪਿਛਲੇ 2 ਹਫ਼ਤਿਆਂ ਦੌਰਾਨ ਸਾਹਮਣੇ ਆਏ ਮਾਮਲੇ ਹੇਠਾਂ ਦਰਜ ਹਨ :

* 29 ਮਾਰਚ ਨੂੰ ‘ਕੌਸ਼ਾਂਬੀ’ (ਉੱਤਰ ਪ੍ਰਦੇਸ਼) ਦੇ ‘ਅਜਰੌਲੀ’ ਪਿੰਡ ’ਚ ਜ਼ਮੀਨ ਦੀ ਵੰਡ ਨੂੰ ਲੈ ਕੇ ਹੋਏ ਵਿਵਾਦ ’ਚ 2 ਸਕੇ ਭਰਾਵਾਂ ਨੇ ਆਪਣੇ ਪਿਤਾ ‘ਨਥਨ ਸਰੋਜ’ ਦੀ ਕੁਲਹਾੜੀ ਮਾਰ ਕੇ ਹੱਤਿਆ ਕਰ ਦਿੱਤੀ। ਮੁਲਜ਼ਮ ਇਸ ਗੱਲ ਤੋਂ ਨਾਰਾਜ਼ ਸਨ ਕਿ ਉਨ੍ਹਾਂ ਦੇ ਪਿਤਾ ਨੇ ਆਪਣੀ ਦੂਜੀ ਪਤਨੀ ‘ਸਾਵਿਤਰਾ’ ਤੋਂ ਪੈਦਾ ਹੋਏ ਬੇਟੇ ‘ਰਾਹੁਲ’ ਨੂੰ ਜ਼ਮੀਨ ਦਾ ਤੀਜਾ ਹਿੱਸਾ ਦੇ ਦਿੱਤਾ ਸੀ। ਪੁਲਸ ਅਨੁਸਾਰ ਘਟਨਾ ਤੋਂ ਬਾਅਦ ਮੁਲਜ਼ਮਾਂ ਨੇ ਲਾਸ਼ ਨੂੰ ਲੁਕਾਉਣ ਦੀ ਕੋਸ਼ਿਸ਼ ਕੀਤੀ ਪਰ ਪੁਲਸ ਨੇ ਖੇਤਾਂ ’ਚੋਂ ਲਾਸ਼ ਬਰਾਮਦ ਕਰ ਲਈ।

* 7 ਅਪ੍ਰੈਲ ਨੂੰ ‘ਰਾਮਪੁਰ’ (ਉੱਤਰ ਪ੍ਰਦੇਸ਼) ’ਚ ‘ਦਾਨ ਸਿੰਘ’ ਨਾਂ ਦੇ ਵਿਅਕਤੀ ਨੇ ਬੀਮੇ ਦੀ ਰਕਮ ਹੜੱਪਣ ਲਈ ਆਪਣੀ ਪਤਨੀ ‘ਲਤਾ’ (25) ਅਤੇ ਬੇਟੇ ‘ਅਵਾਂਸ਼’ (3) ਦੀ ਕਾਰ ’ਚ ਸਾੜ ਕੇ ਹੱਤਿਆ ਕਰ ਦਿੱਤੀ ਅਤੇ ਇਸ ਨੂੰ ਸੜਕ ਹਾਦਸੇ ਦਾ ਨਾਂ ਦੇ ਦਿੱਤਾ। ਮੁਲਜ਼ਮ ਨੇ 2022 ’ਚ ‘ਲਤਾ’ ਨਾਲ ਲਵ ਮੈਰਿਜ ਕੀਤੀ ਸੀ ਅਤੇ ‘ਲਤਾ’ ਦੇ ਨਾਂ ’ਤੇ 2 ਕਰੋੜ ਰੁਪਏ ਦਾ ਬੀਮਾ ਸੀ। ਉਸ ਨੇ ਆਪਣੇ ਸਾਥੀਆਂ ਨਾਲ ਮਿਲ ਕੇ ਇਹ ਸਾਜ਼ਿਸ਼ ਰਚੀ।

* 7 ਅਪ੍ਰੈਲ ਨੂੰ ਹੀ ‘ਦਿੱਲੀ’ ਦੇ ‘ਉੱਤਮ ਨਗਰ’ ’ਚ ਸ਼ਰਾਬ ਦੇ ਨਸ਼ੇ ’ਚ ਹੋਏ ਝਗੜੇ ’ਚ 22 ਸਾਲਾ ‘ਈਸ਼ਵਰ’ ਨਾਂ ਦੇ ਨੌਜਵਾਨ ਨੇ ਆਪਣੇ ਪਿਤਾ ‘ਦਵਿੰਦਰ ਕੁਮਾਰ’ ਅਤੇ ਚਾਚੇ ‘ਅਮਿਤ’ ਦੀ ਹੱਤਿਆ ਕਰ ਦਿੱਤੀ। ਹੱਤਿਆ ਤੋਂ ਬਾਅਦ ਮੁਲਜ਼ਮ ‘ਈਸ਼ਵਰ’ ਮੌਕੇ ਤੋਂ ਫ਼ਰਾਰ ਹੋ ਗਿਆ। ਪੁਲਸ ਨੇ ਬਾਅਦ ’ਚ ‘ਮੋਹਨ ਗਾਰਡਨ’ ਇਲਾਕੇ ’ਚੋਂ ਉਸ ਨੂੰ ਗ੍ਰਿਫ਼ਤਾਰ ਕਰ ਲਿਆ।

* 7 ਅਪ੍ਰੈਲ ਨੂੰ ਹੀ ‘ਜਲੰਧਰ’ ਦੇ ਐਡੀਸ਼ਨਲ ਸੈਸ਼ਨ ਜੱਜ ‘ਵਿਸ਼ੇਸ਼ ਕੰਬੋਜ’ ਨੇ ‘ਗੋਰਾਇਆ’ ਦੇ ਪਿੰਡ ‘ਚੀਮਾਖੁਰਦ’ ’ਚ ਘੋਟਣੇ ਨਾਲ ਕੁੱਟ ਕੇ ਆਪਣੇ ਪਿਤਾ ਦੀ ਹੱਤਿਆ ਕਰਨ ਦੇ ਦੋਸ਼ ’ਚ ‘ਹਰਕੇਸ਼ ਕੁਮਾਰ’ (46) ਨਾਂ ਦੇ ਐੱਨ. ਆਰ. ਆਈ. ਨੂੰ ਉਮਰ ਕੈਦ ਅਤੇ ਢਾਈ ਲੱਖ ਰੁਪਏ ਜੁਰਮਾਨੇ ਦੀ ਸਜ਼ਾ ਸੁਣਾਈ।

* 7 ਅਪ੍ਰੈਲ ਨੂੰ ਹੀ ‘ਨਾਗਪੁਰ’ (ਮਹਾਰਾਸ਼ਟਰ) ਦੇ ‘ਜੈਨਗਰ’ ’ਚ 32 ਸਾਲਾ ‘ਰੋਸ਼ਨ ਸ਼ਿੰਗਰੇ’ ਦੀ ਲਾਸ਼ ਸ਼ੱਕੀ ਹਾਲਾਤ ’ਚ ਘਰ ’ਚ ਪਾਈ ਗਈ। ‘ਰੋਸ਼ਨ’ ਦੇ ਪਰਿਵਾਰਕ ਮੈਂਬਰਾਂ ਨੇ ਦੋਸ਼ ਲਗਾਏ ਕਿ ਉਸ ਦੀ ਪਤਨੀ ‘ਪ੍ਰਗਿਆ’ ਵੱਲੋਂ ਕੀਤੀ ਗਈ ਕੁੱਟਮਾਰ ਕਾਰਨ ਰੋਸ਼ਨ ਦੀ ਮੌਤ ਹੋਈ ਹੈ।

* 8 ਅਪ੍ਰੈਲ ਨੂੰ ‘ਬੁਲੰਦਸ਼ਹਿਰ’ (ਉੱਤਰ ਪ੍ਰਦੇਸ਼) ਦੇ ‘ਸੁਰਜਾਵਾਲੀ ਪਿੰਡ’ ’ਚ ਇਕ ਮਤਰੇਈ ਮਾਂ ਨੇ ਆਪਣੀ 3 ਸਾਲਾ ਬੱਚੀ ਦੀ ਕੁੱਟ-ਕੁੱਟ ਕੇ ਹੱਤਿਆ ਕਰ ਦਿੱਤੀ।

* 8 ਅਪ੍ਰੈਲ ਨੂੰ ਹੀ ‘ਚੰਦੌਲੀ’ (ਉੱਤਰ ਪ੍ਰਦੇਸ਼) ਦੇ ‘ਬੜਉਰ ਖੁਰਹੁਜਾ’ ਪਿੰਡ ’ਚ ਇਕ ਔਰਤ ਨੇ ਨਣਦੋਈਏ ਨਾਲ ਮਿਲ ਕੇ ਆਪਣੇ ਪਤੀ ਦੀ ਹੱਤਿਆ ਕਰ ਦਿੱਤੀ। ਹੱਤਿਆ ਤੋਂ ਬਾਅਦ ਪਤੀ ਦੀ ਮੌਤ ਨੂੰ ਖ਼ੁਦਕੁਸ਼ੀ ਦਾ ਰੂਪ ਦੇਣ ਲਈ ਲਾਸ਼ ਨੂੰ ਫਾਂਸੀ ’ਤੇ ਲਟਕਾ ਦਿੱਤਾ ਗਿਆ। ਪੁਲਸ ਦੀ ਜਾਂਚ ’ਚ ਮੌਤ ਦੇ ਅਸਲ ਕਾਰਨਾਂ ਦਾ ਖ਼ੁਲਾਸਾ ਹੋ ਗਿਆ ਅਤੇ ਮੁਲਜ਼ਮ ਔਰਤ ਨੂੰ ਗ੍ਰਿਫ਼ਤਾਰ ਕਰ ਲਿਆ ਗਿਆ।

* 8 ਅਪ੍ਰੈਲ ਨੂੰ ਹੀ ‘ਧਾਰ’ (ਮੱਧ ਪ੍ਰਦੇਸ਼) ’ਚ ‘ਪ੍ਰਿਅੰਕਾ ਪੁਰੋਹਿਤ’ (27) ਨਾਂ ਦੀ ਔਰਤ ਨੂੰ ਆਪਣੇ ਪਤੀ ‘ਰਾਜਾ ਰਘੁਵੰਸ਼ੀ’ ਦੀ ਹੱਤਿਆ ਦੇ ਦੋਸ਼ ’ਚ ਗ੍ਰਿਫ਼ਤਾਰ ਕੀਤਾ ਗਿਆ। ਪੁਲਸ ਅਨੁਸਾਰ ‘ਪ੍ਰਿਅੰਕਾ’ ਨੇ ਇਹ ਸਾਜ਼ਿਸ਼ ਆਪਣੇ ਪ੍ਰੇਮੀ ‘ਕਮਲੇਸ਼’ (33) ਨਾਲ ਮਿਲ ਕੇ ਰਚੀ ਸੀ। ਸਾਜ਼ਿਸ਼ ਤਹਿਤ ਕਾਤਲ ‘ਪ੍ਰਿਅੰਕਾ’ ਦੇ ਘਰ ’ਚ ਲੁੱਟ ਦੀ ਘਟਨਾ ਨੂੰ ਅੰਜਾਮ ਦੇਣ ਦੇ ਬਹਾਨੇ ਵੜੇ ਅਤੇ ‘ਰਾਜਾ ਰਘੁਵੰਸ਼ੀ’ ਦੀ ਹੱਤਿਆ ਕਰ ਦਿੱਤੀ। ‘ਪ੍ਰਿਅੰਕਾ’ ਨੇ ਇਸ ਪੂਰੇ ਮਾਮਲੇ ਨੂੰ ਲੁੱਟ ਦਾ ਮਾਮਲਾ ਦਿਖਾਉਣ ਦੀ ਕੋਸ਼ਿਸ਼ ਕੀਤੀ ਪਰ ਪੁਲਸ ਦੀ ਜਾਂਚ ’ਚ ਸਾਜ਼ਿਸ਼ ਦਾ ਖ਼ੁਲਾਸਾ ਹੋ ਗਿਆ।

ਇਸ ਤਰ੍ਹਾਂ ਦੇ ਮਾਮਲੇ ਸਮਾਜ ’ਚ ਵਧ ਰਹੇ ਨੈਤਿਕ ਪਤਨ ਨੂੰ ਦਰਸਾਉਂਦੇ ਹਨ। ਅਜਿਹੇ ਮਾਮਲਿਆਂ ਨੂੰ ਰੋਕਣ ਲਈ ਦੋਸ਼ੀਆਂ ਨੂੰ ਸਖਤ ਤੋਂ ਸਖਤ ਸਜ਼ਾ ਦਿੱਤੀ ਜਾਣੀ ਚਾਹੀਦੀ ਹੈ ਤਾਂ ਜੋ ਰਿਸ਼ਤਿਆਂ ਨੂੰ ਕਲੰਕਿਤ ਹੋਣ ਤੋਂ ਬਚਾਇਆ ਜਾ ਸਕੇ।

—ਵਿਜੇ ਕੁਮਾਰ