ਰਾਸ਼ਟਰਪਤੀ ਬਾਈਡੇਨ ਨੇ ਸੈਨਿਕਾਂ ਦੇ ਮਕਬਰੇ ''ਤੇ ਸ਼ਰਧਾ ਦੇ ਫੁੱਲ ਕੀਤੇ ਭੇਟ

05/31/2023 2:11:17 AM

ਵਾਸ਼ਿੰਗਟਨ (ਰਾਜ ਗੋਗਨਾ) : ਅਹੁਦਾ ਸੰਭਾਲਣ ਤੋਂ ਬਾਅਦ ਅਮਰੀਕੀ ਰਾਸ਼ਟਰਪਤੀ ਜੋਅ ਬਾਈਡੇਨ ਨੇ ਤੀਜੇ ਮੈਮੋਰੀਅਲ ਦਿਵਸ ਨੂੰ ਚਿੰਨ੍ਹਿਤ ਕੀਤਾ ਤੇ ਆਰਲਿੰਗਟਨ ਨੈਸ਼ਨਲ ਕਬਰਸਤਾਨ 'ਚ ਸੈਨਿਕਾਂ ਦੇ ਮਕਬਰੇ 'ਤੇ ਇਕ ਰਵਾਇਤੀ ਫੁੱਲਮਾਲਾ ਚੜ੍ਹਾਉਣ ਦੀ ਰਸਮ ਨਾਲ ਸ਼ੁਰੂਆਤ ਕੀਤੀ। ਰਾਸ਼ਟਰਪਤੀ ਬਾਈਡੇਨ ਦੇ ਨਾਲ ਉਨ੍ਹਾਂ ਦੀ ਪਤਨੀ ਜਿਲ ਬਾਈਡੇਨ, ਉਪ ਰਾਸ਼ਟਰਪਤੀ ਕਮਲਾ ਹੈਰਿਸ ਅਤੇ ਦੂਜੇ ਜੈਂਟਲਮੈਨ ਡਗਲਸ ਐਮਹੌਫ ਵੀ ਸਮਾਰੋਹ ਦੀ ਕਾਰਵਾਈ ਲਈ ਵਿਸ਼ੇਸ਼ ਤੌਰ 'ਤੇ ਸ਼ਾਮਲ ਹੋਏ। ਹਰ ਸਾਲ ਇਕ ਰਾਸ਼ਟਰ ਦੇ ਤੌਰ 'ਤੇ ਯਾਦ ਵਜੋਂ ਇਹ ਰਸਮ ਨਿਭਾਈ ਜਾਂਦੀ ਹੈ।

ਰਾਸ਼ਟਰਪਤੀ ਬਾਈਡੇਨ ਨੇ ਸੰਬੋਧਨ ਕਰਦਿਆਂ ਕਿਹਾ ਕਿ ਸਾਨੂੰ ਸ਼ਹੀਦਾਂ ਤੇ ਉਨ੍ਹਾਂ ਦੇ ਜੀਵਨ ਬਾਰੇ ਕਦੇ ਨਹੀਂ ਭੁੱਲਣਾ ਚਾਹੀਦਾ, ਜਿਨ੍ਹਾਂ ਨੇ ਸਾਡੇ ਲੋਕਤੰਤਰ ਦੀ ਰੱਖਿਆ ਕੀਤੀ। ਬਾਈਡੇਨ ਨੇ ਫੁੱਲਾਂ ਦੀ ਰਸਮ ਤੋਂ ਬਾਅਦ ਮੈਮੋਰੀਅਲ ਐਂਫੀਥੀਏਟਰ ਵਿੱਚ ਭਾਸ਼ਣ ਦਿੰਦਿਆਂ ਕਿਹਾ, "ਸਾਨੂੰ ਉਨ੍ਹਾਂ ਦੇ ਜੀਵਨ ਨੂੰ ਕਦੇ ਨਹੀਂ ਭੁੱਲਣਾ ਚਾਹੀਦਾ, ਜੋ ਇਹ ਝੰਡੇ, ਫੁੱਲ ਅਤੇ ਸੰਗਮਰਮਰ ਦੇ ਨਿਸ਼ਾਨ ਦਰਸਾਉਂਦੇ ਹਨ ਜੋ ਇਕ ਮਾਂ, ਪਿਤਾ, ਪੁੱਤਰ, ਧੀ, ਭੈਣ, ਜੀਵਨਸਾਥੀ, ਦੋਸਤ ਤੇ ਇਕ ਅਮਰੀਕੀ ਸਨ।"

ਇਹ ਵੀ ਪੜ੍ਹੋ : ਅਜਬ-ਗਜ਼ਬ : ਦੁਨੀਆ ਦਾ ਅਜਿਹਾ ਦੇਸ਼ ਜਿੱਥੇ ਜਾਗਿੰਗ ਕਰਨ ਵਾਲਿਆਂ ਨੂੰ ਸੁੱਟ ਦਿੱਤਾ ਜਾਂਦੈ ਅੰਦਰ

ਰਾਸ਼ਟਰਪਤੀ ਬਾਈਡੇਨ ਬੀਤੀ 29 ਮਈ ਨੂੰ ਮੈਮੋਰੀਅਲ ਦਿਵਸ ਮੌਕੇ ਅਰਲਿੰਗਟਨ, ਵਰਜੀਨੀਆ ਦੇ ਅਰਲਿੰਗਟਨ ਨੈਸ਼ਨਲ ਕਬਰਸਤਾਨ 'ਚ ਦੇਸ਼ ਲਈ ਸ਼ਹੀਦ ਹੋਏ ਸਿਪਾਹੀਆਂ ਦੀ ਕਬਰ 'ਤੇ ਫੁੱਲਮਾਲਾ ਭੇਟ ਕਰਨ ਦੀ ਰਸਮ ਅਦਾ ਕਰ ਰਹੇ ਸਨ, ਜਿਥੇ ਲਗਭਗ 5,000 ਦੇ ਕਰੀਬ ਸੈਲਾਨੀ ਹਰ ਸਾਲ ਯਾਦਗਾਰੀ ਦਿਵਸ ਲਈ ਰਾਸ਼ਟਰੀ ਕਬਰਸਤਾਨ 'ਤੇ ਆਉਂਦੇ ਹਨ। ਭਾਸ਼ਣ ਦੌਰਾਨ ਇਸ ਸਾਲ ਲਗਭਗ 3,000 ਦੇ ਕਰੀਬ ਲੋਕ ਹਾਜ਼ਰ ਸਨ।

ਰਾਸ਼ਟਰਪਤੀ ਨੇ ਆਪਣੇ ਸਵਰਗਵਾਸੀ ਪੁੱਤਰ ਬੀਉ ਜਿਸ ਨੇ ਇਰਾਕ ਵਿੱਚ ਸਨਮਾਨਾਂ ਨਾਲ ਸੇਵਾ ਕੀਤੀ ਅਤੇ ਜਿਸ ਦੀ ਦਿਮਾਗ ਦੇ ਕੈਂਸਰ ਨਾਲ 2015 ਵਿੱਚ ਮੌਤ ਹੋ ਗਈ ਸੀ, ਬਾਰੇ ਭਰੇ ਮਨ ਨਾਲ ਸੋਚਣ ਲਈ ਆਪਣੇ ਭਾਸ਼ਣ ਦੌਰਾਨ ਸਮਾਂ ਬਿਤਾਇਆ। ਉਸ ਦੀ ਹੁਣ 8ਵੀਂ ਬਰਸੀ ਮਨਾਈ ਜਾਵੇਗੀ ਅਤੇ ਬਾਈਡੇਨ ਨੇ ਉਸ ਮਾਣ ਬਾਰੇ ਗੱਲ ਕੀਤੀ, ਜੋ ਉਨ੍ਹਾਂ ਨੇ ਹਥਿਆਰਬੰਦ ਸੈਨਾਵਾਂ ਵਿੱਚ ਆਪਣੇ ਪੁੱਤਰ ਦੇ ਸਮੇਂ ਲਈ ਮਹਿਸੂਸ ਕੀਤਾ ਸੀ। ਰਾਸ਼ਟਰਪਤੀ ਬਾਈਡੇਨ ਨੇ ਇਹ ਵੀ ਮੰਨਿਆ ਕਿ ਉਨ੍ਹਾਂ ਦਾ ਨੁਕਸਾਨ "ਉਸ ਵਰਗਾ ਨਹੀਂ" ਸੀ, ਜਿਨ੍ਹਾਂ ਨੇ ਜੰਗ ਦੇ ਮੈਦਾਨ ਵਿੱਚ ਆਪਣੇ ਅਜ਼ੀਜ਼ਾਂ ਨੂੰ ਗੁਆ ਦਿੱਤਾ ਹੈ।

ਨੋਟ:- ਇਸ ਖ਼ਬਰ ਬਾਰੇ ਆਪਣੇ ਵਿਚਾਰ ਕੁਮੈਂਟ ਬਾਕਸ ਵਿਚ ਜ਼ਰੂਰ ਸਾਂਝੇ ਕਰੋ।


Mukesh

Content Editor

Related News