ਲਖਨਊ : ਪਿਛਲੇ ਮੈਚ ’ਚ ਬੱਲੇਬਾਜ਼ਾਂ ਦੇ ਨਾ ਚੱਲ ਸਕਣ ਕਾਰਨ ਇੰਡੀਅਨ ਪ੍ਰੀਮੀਅਰ ਲੀਗ (ਆਈ. ਪੀ. ਐੱਲ.) ਦੀ ਅੰਕ ਸੂਚੀ ’ਚ ਚੋਟੀ ’ਤੇ ਜਗ੍ਹਾ ਬਣਾਉਣ ਦਾ ਮੌਕਾ ਗੁਆਉਣ ਵਾਲੀ ਰਾਇਲ ਚੈਲੰਜਰਜ਼ ਬੈਂਗਲੁਰੂ (ਆਰ. ਸੀ. ਬੀ.) ਦੀ ਟੀਮ ਵੀਰਵਾਰ ਨੂੰ ਇੱਥੇ ਸਭ ਤੋਂ ਹੇਠਲੇ ਸਥਾਨ ’ਤੇ ਕਾਬਜ਼ ਲਖਨਊ ਸੁਪਰ ਜਾਇੰਟਸ ਵਿਰੁੱਧ ਬੱਲੇਬਾਜ਼ੀ ’ਚ ਆਪਣੀ ਲੈਅ ਫਿਰ ਤੋਂ ਹਾਸਲ ਕਰਕੇ ਪਲੇਅ ਆਫ ਦੀਆਂ ਆਪਣੀਆਂ ਉਮੀਦਾਂ ਨੂੰ ਮਜ਼ਬੂਤ ਕਰਨ ਦੀ ਕੋਸ਼ਿਸ਼ ਕਰੇਗੀ।

ਬੈਂਗਲੁਰੂ ਫਿਲਹਾਲ ਅੰਕ ਸੂਚੀ ’ਚ ਦੂਜੇ ਸਥਾਨ ’ਤੇ ਹੈ ਪਰ ਉਸ ਦੇ 4 ਹੋਰ ਟੀਮਾਂ ਦੇ ਬਰਾਬਰ 12 ਅੰਕ ਹਨ। ਉਸ ਦੀ ਟੀਮ ਨੂੰ ਅਹਿਮਦਾਬਾਦ ’ਚ ਗੁਜਰਾਤ ਟਾਈਟਨਜ਼ ਹੱਥੋਂ 4 ਵਿਕਟਾਂ ਨਾਲ ਮਿਲੀ ਹਾਰ ਨੂੰ ਭੁੱਲ ਕੇ ਜਲਦ ਤੋਂ ਜਲਦ ਵਾਪਸੀ ਕਰਨੀ ਪਵੇਗੀ। ਗੁਜਰਾਤ ਵਿਰੁੱਧ ਉਸ ਮੈਚ ’ਚ ਆਰ. ਸੀ. ਬੀ. ਦੀ ਬੱਲੇਬਾਜ਼ੀ ਨਾਟਕੀ ਰੂਪ ’ਚ ਢਹਿ-ਢੇਰੀ ਹੋ ਗਈ ਸੀ। ਇਕ ਸਮੇਂ ਉਸ ਦਾ ਸਕੋਰ 2 ਵਿਕਟਾਂ ’ਤੇ 79 ਦੌੜਾਂ ਸੀ ਜਿਹੜਾ ਜਲਦ ਹੀ 6 ਵਿਕਟਾਂ ’ਤੇ 96 ਦੌੜਾਂ ਹੋ ਗਿਆ ਤੇ ਆਖਿਰ ’ਚ ਉਸ ਦੀ ਟੀਮ 155 ਦੌੜਾਂ ’ਤੇ ਆਊਟ ਹੋ ਗਈ।

ਇਹ ਵੀ ਪੜੋ : 'ਇਕ ਹੋਰ ਟਰਾਫੀ ਤੇ ਅਈਅਰ ਹਰ ਕਪਤਾਨ ਨੂੰ ਛੱਡ ਦੇਣਗੇ ਪਿੱਛੇ; ਇਰਫਾਨ ਪਠਾਨ ਨੇ ਕੀਤੀ ਰੱਜ ਕੇ ਤਾਰੀਫ

ਬੈਂਗਲੁਰੂ ਦੇ ਬੱਲੇਬਾਜ਼ ਭਾਵੇਂ ਹੀ ਇਸ ਮੈਚ ’ਚ ਲੜਖੜਾ ਗਏ ਸਨ ਪਰ ਉਹ ਦਮਦਾਰ ਵਾਪਸੀ ਕਰਨ ’ਚ ਸਮਰੱਥ ਹਨ। ਉਸ ਦੇ ਬੱਲੇਬਾਜ਼ਾਂ ਨੇ ਅਜੇ ਤੱਕ ਹਮਲਾਵਰ ਖੇਡ ਦਿਖਾਈ ਹੈ ਤੇ ਲਖਨਊ ਵਿਰੁੱਧ ਵੀ ਉਹ ਇਸ ਨੂੰ ਜਾਰੀ ਰੱਖਣ ’ਚ ਕੋਈ ਕਸਰ ਨਹੀਂ ਛੱਡਣਗੇ।

ਬੈਂਗਲੁਰੂ ਦੇ ਸਟਾਰ ਬੱਲੇਬਾਜ਼ ਵਿਰਾਟ ਕੋਹਲੀ ਨੇ ਸ਼ਾਨਦਾਰ ਫਾਰਮ ਦਿਖਾਉਂਦੇ ਹੋਏ 379 ਦੌੜਾਂ ਬਣਾਈਆਂ ਹਨ, ਉੱਥੇ ਹੀ, ਦੇਵਦੱਤ ਪੱਡੀਕਲ ਤੇ ਕਪਤਾਨ ਰਜਤ ਪਾਟੀਦਾਰ ਨੇ ਵੀ ਮਹੱਤਵਪੂਰਨ ਯੋਗਦਾਨ ਦਿੱਤਾ ਹੈ। ਨਿਯਮਤ ਸਲਾਮੀ ਬੱਲੇਬਾਜ਼ ਫਿਲ ਸਾਲਟ ਦੇ ਉਂਗਲੀ ’ਚ ਸੱਟ ਕਾਰਨ ਬਾਹਰ ਹੋਣ ਨਾਲ ਕੋਹਲੀ ਦੇ ਨਾਲ ਧਮਾਕੇਦਾਰ ਸ਼ੁਰੂਆਤ ਦੇਣ ਦੀ ਜ਼ਿੰਮੇਵਾਰੀ ਜੈਕਬ ਬੈਥੇਲ ’ਤੇ ਹੋਵੇਗੀ।

ਬੈਂਗਲੁਰੂ ਦੀ ਟੀਮ ਨੂੰ ਇਕ ਹਫਤੇ ਲਈ ਆਰਾਮ ਦਾ ਮੌਕਾ ਮਿਲਿਆ ਸੀ ਤੇ ਉਸ ਦੀ ਟੀਮ ਇਸ ਮੈਚ ’ਚ ਆਪਣੇ ਵਿਰੋਧੀ ਦੀ ਤੁਲਨਾ ’ਚ ਜ਼ਿਆਦਾ ਤਰੋਤਾਜ਼ਾ ਹੋ ਕੇ ਉਤਰੇਗੀ।

ਜਿੱਥੋਂ ਤੱਕ ਲਖਨਊ ਦਾ ਸਵਾਲ ਹੈ ਤਾਂ ਉਸ ਦਾ ਪ੍ਰਦਰਸ਼ਨ ਅਜੇ ਤੱਕ ਨਿਰਾਸ਼ਾਜਨਕ ਰਿਹਾ ਹੈ। ਉਹ ਪਿਛਲੇ 6 ਮੈਚਾਂ ’ਚ ਹਾਰ ਝੱਲਣ ਕਾਰਨ ਅੰਕ ਸੂਚੀ ’ਚ ਸਭ ਤੋਂ ਹੇਠਲੇ ਸਥਾਨ ’ਤੇ ਹੈ। ਇਸ ਦੌਰਾਨ ਉਸ ਨੂੰ ਕੋਲਕਾਤਾ ਨਾਈਟ ਰਾਈਡਰਜ਼ ਵਿਰੁੱਧ ਟਾਈ ਰਹੇ ਮੈਚ ’ਚ ਸੁਪਰ ਓਵਰ ’ਚ ਵੀ ਹਾਰ ਦਾ ਸਾਹਮਣਾ ਕਰਨਾ ਪਿਆ ਸੀ। ਉਸ ਨੂੰ ਪਿਛਲੇ ਮੈਚ ’ਚ ਮੁੰਬਈ ਇੰਡੀਅਨਜ਼ ਨੇ 6 ਵਿਕਟਾਂ ਨਾਲ ਕਰਾਰੀ ਹਾਰ ਦਿੱਤੀ ਸੀ।

ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ
For Android:- https://play.google.com/store/apps/details?id=com.jagbani&hl=en
For IOS:- https://itunes.apple.com/in/app/id538323711?mt=8
Whatsapp Channel: https://whatsapp.com/channel/0029Va94hsaHAdNVur4L170e