IPL ਫਾਈਨਲ ਦਾ ਜਨੂੰਨ ਪਵੇਗਾ ਮਹਿੰਗਾ! ਅਹਿਮਦਾਬਾਦ ਦੇ ਹਵਾਈ ਕਿਰਾਏ ਤੇ ਹੋਟਲਾਂ ਨੇ ਫੜੀ ਅਸਮਾਨੀ ਰਫ਼ਤਾਰ

ਸਪੋਰਟਸ ਡੈਸਕ : ਐਤਵਾਰ ਨੂੰ ਅਹਿਮਦਾਬਾਦ ਦੇ ਨਰਿੰਦਰ ਮੋਦੀ ਸਟੇਡੀਅਮ ਵਿੱਚ ਹੋਣ ਵਾਲੇ IPL 2026 ਦੇ ਫਾਈਨਲ ਮੈਚ ਨੂੰ ਲੈ ਕੇ ਪ੍ਰਸ਼ੰਸਕਾਂ ਵਿੱਚ ਅਜਿਹਾ ਉਤਸ਼ਾਹ ਦੇਖਣ ਨੂੰ ਮਿਲ ਰਿਹਾ ਹੈ ਜਿਵੇਂ ਕਿ ਕਿਸੇ ਵੱਡੇ ਤਿਉਹਾਰ ਜਾਂ ਆਈਫੋਨ ਦੀ ਸੇਲ ਦੌਰਾਨ ਹੁੰਦਾ ਹੈ। 1,32,000 ਦਰਸ਼ਕਾਂ ਦੀ ਸਮਰੱਥਾ ਵਾਲੇ ਇਸ ਸਟੇਡੀਅਮ ਵਿੱਚ ਮੈਚ ਦੇਖਣ ਲਈ ਲੋਕਾਂ ਦੀ ਭਾਰੀ ਭੀੜ ਇਕੱਠੀ ਹੋ ਰਹੀ ਹੈ, ਜਿਸ ਕਾਰਨ ਸ਼ਹਿਰ ਵਿੱਚ ਹੋਟਲ ਬੁਕਿੰਗ ਅਤੇ ਹਵਾਈ ਕਿਰਾਏ ਅਸਮਾਨੀ ਚੜ੍ਹ ਗਏ ਹਨ।

ਹਵਾਈ ਕਿਰਾਏ 'ਚ 3 ਤੋਂ 4 ਗੁਣਾ ਵਾਧਾ
 ਟਰੈਵਲ ਇੰਡਸਟਰੀ ਦੇ ਅਧਿਕਾਰੀਆਂ ਅਨੁਸਾਰ, ਦਿੱਲੀ-ਅਹਿਮਦਾਬਾਦ ਅਤੇ ਬੈਂਗਲੁਰੂ-ਅਹਿਮਦਾਬਾਦ ਵਰਗੇ ਮੁੱਖ ਰੂਟਾਂ 'ਤੇ ਹਵਾਈ ਕਿਰਾਏ ਦੁੱਗਣੇ ਹੋ ਗਏ ਹਨ। ਬੈਂਗਲੁਰੂ ਤੋਂ ਇੱਕ ਪਾਸੇ ਦਾ ਕਿਰਾਇਆ 22,800 ਰੁਪਏ ਤੋਂ ਵੀ ਵੱਧ ਪਹੁੰਚ ਗਿਆ ਹੈ, ਜਦੋਂ ਕਿ ਆਮ ਦਿਨਾਂ ਵਿੱਚ ਇਹ ਸਿਰਫ 6,000 ਤੋਂ 8,000 ਰੁਪਏ ਦੇ ਵਿਚਕਾਰ ਹੁੰਦਾ ਹੈ। ਕਈ ਰੂਟਾਂ 'ਤੇ ਪ੍ਰੀਮੀਅਮ ਇਕਾਨਮੀ ਅਤੇ ਬਿਜ਼ਨਸ ਕਲਾਸ ਦੀਆਂ ਸੀਟਾਂ ਪਹਿਲਾਂ ਹੀ ਵਿਕ ਚੁੱਕੀਆਂ ਹਨ।

ਹੋਟਲ ਹੋਏ 10 ਗੁਣਾ ਤੱਕ ਮਹਿੰਗੇ
 ਅਹਿਮਦਾਬਾਦ ਅਤੇ ਗਾਂਧੀਨਗਰ ਦੇ ਹੋਟਲਾਂ ਵਿੱਚ ਕਮਰਿਆਂ ਦੀ ਮੰਗ ਬਹੁਤ ਜ਼ਿਆਦਾ ਹੈ। ਸਟੇਡੀਅਮ ਦੇ ਨੇੜੇ ਸਥਿਤ ਥ੍ਰੀ-ਸਟਾਰ ਪ੍ਰਾਪਰਟੀਜ਼ ਵਿੱਚ ਕਮਰਿਆਂ ਦਾ ਰੇਟ, ਜੋ ਆਮ ਤੌਰ 'ਤੇ 3,500 ਰੁਪਏ ਹੁੰਦਾ ਹੈ, ਹੁਣ ਲਗਭਗ ਦਸ ਗੁਣਾ ਵਧ ਕੇ ਬਹੁਤ ਮਹਿੰਗਾ ਹੋ ਗਿਆ ਹੈ। ਗਾਂਧੀਨਗਰ ਦੇ 'ਦ ਲੀਲਾ' ਹੋਟਲ ਵਿੱਚ ਕਿਰਾਇਆ 14,000 ਰੁਪਏ ਪ੍ਰਤੀ ਰਾਤ ਤੋਂ ਸ਼ੁਰੂ ਹੋ ਰਿਹਾ ਹੈ ਅਤੇ ਉੱਥੇ 85% ਕਮਰੇ ਪਹਿਲਾਂ ਹੀ ਬੁੱਕ ਹੋ ਚੁੱਕੇ ਹਨ। ਕੁਝ ਸਥਾਨਕ ਨਿਵਾਸੀ ਵੀ ਫਾਇਦਾ ਉਠਾਉਂਦੇ ਹੋਏ ਆਪਣੇ ਸਟੂਡੀਓ ਅਪਾਰਟਮੈਂਟਸ ਨੂੰ 2,000 ਰੁਪਏ ਜਾਂ ਇਸ ਤੋਂ ਵੱਧ ਵਿੱਚ ਕਿਰਾਏ 'ਤੇ ਦੇ ਰਹੇ ਹਨ।

ਸੋਸ਼ਲ ਮੀਡੀਆ 'ਤੇ ਟਿਕਟਾਂ ਦੀ ਕਾਲਾਬਾਜ਼ਾਰੀ 
ਆਧਿਕਾਰਿਕ ਵੈੱਬਸਾਈਟ 'ਤੇ ਟਿਕਟਾਂ ਲਗਭਗ ਖਤਮ ਹੋ ਚੁੱਕੀਆਂ ਹਨ, ਜਿਨ੍ਹਾਂ ਦੀ ਕੀਮਤ 2,500 ਰੁਪਏ ਤੋਂ ਸ਼ੁਰੂ ਹੋ ਕੇ 25,000 ਰੁਪਏ ਤੱਕ ਸੀ। ਹੁਣ ਸੋਸ਼ਲ ਮੀਡੀਆ ਪਲੇਟਫਾਰਮਾਂ 'ਤੇ ਇਹ ਟਿਕਟਾਂ ਅਸਲ ਕੀਮਤ ਨਾਲੋਂ ਪੰਜ ਗੁਣਾ ਜ਼ਿਆਦਾ ਭਾਅ 'ਤੇ ਵੇਚੀਆਂ ਜਾ ਰਹੀਆਂ ਹਨ। ਪੁਲਿਸ ਵੱਲੋਂ ਪਿਛਲੇ ਸਾਲਾਂ ਦੀ ਤਰ੍ਹਾਂ ਇਸ ਵਾਰ ਵੀ ਟਿਕਟਾਂ ਦੀ ਬਲੈਕ ਮਾਰਕੀਟਿੰਗ ਕਰਨ ਵਾਲਿਆਂ 'ਤੇ ਨਜ਼ਰ ਰੱਖੀ ਜਾ ਰਹੀ ਹੈ।

ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ

For Android:- https://play.google.com/store/apps/details?id=com.jagbani&hl=en

For IOS:- https://itunes.apple.com/in/app/id538323711?mt=8

For Whatsapp:- https://whatsapp.com/channel/0029Va94hsaHAdNVur4L170e