ਬਜਟ 2023 'ਚੋਂ ਖੇਡ ਮੰਤਰਾਲਾ ਨੂੰ ਮਿਲਿਆ ਵੱਡਾ ਤੋਹਫ਼ਾ, 'ਖੇਡੋ ਇੰਡੀਆ' ਪ੍ਰੋਗਰਾਮ ਪੁੱਟੇਗਾ ਹੋਰ ਵੱਡੀ ਪੁਲਾਂਘ

ਨਵੀਂ ਦਿੱਲੀ, (ਭਾਸ਼ਾ)- ਇਸ ਸਾਲ ਹੋਣ ਵਾਲੀਆਂ ਏਸ਼ੀਆਈ ਖੇਡਾਂ ਅਤੇ ਅਗਲੇ ਸਾਲ ਹੋਣ ਵਾਲੀਆਂ ਪੈਰਿਸ ਓਲੰਪਿਕ ਦੀਆਂ ਤਿਆਰੀਆਂ ਨੂੰ ਧਿਆਨ ਵਿੱਚ ਰੱਖਦੇ ਹੋਏ ਖੇਡ ਮੰਤਰਾਲਾ ਨੂੰ ਬੁੱਧਵਾਰ ਨੂੰ ਪੇਸ਼ ਕੀਤੇ ਗਏ ਕੇਂਦਰੀ ਬਜਟ ਵਿੱਚ 3,397.32 ਕਰੋੜ ਰੁਪਏ ਦੀ ਵਿਵਸਥਾ ਦੀ ਵੱਡੀ ਸੌਗਾਤ ਮਿਲੀ ਹੈ। ਇਹ ਰਾਸ਼ੀ ਪਿਛਲੇ ਸਾਲ ਦੇ ਮੁਕਾਬਲੇ 723.97 ਕਰੋੜ ਰੁਪਏ ਤੋਂ ਵੱਧ ਹੈ।  ਇਹ ਰਕਮ ਪਿਛਲੇ ਵਿੱਤੀ ਸਾਲ (2022-23) ਦੇ ਸੰਸ਼ੋਧਿਤ ਬਜਟ ਨਾਲੋਂ ਵੱਧ ਹੈ, ਜਦੋਂ ਮੰਤਰਾਲਾ ਨੂੰ 2,673.35 ਕਰੋੜ ਰੁਪਏ ਮਿਲੇ ਸਨ। ਹਾਲਾਂਕਿ, ਪਿਛਲੇ ਸਾਲ ਅਸਲ ਵੰਡ 3,062.60 ਕਰੋੜ ਰੁਪਏ ਸੀ। 

ਸਾਲ 2022-23 ਲਈ ਸੰਸ਼ੋਧਿਤ ਅਲਾਟਮੈਂਟ ਵਿੱਚ ਕਟੌਤੀ ਦਾ ਇੱਕ ਮੁੱਖ ਕਾਰਨ ਚੀਨ ਵਿੱਚ ਪ੍ਰਸਤਾਵਿਤ ਏਸ਼ੀਆਈ ਖੇਡਾਂ ਨੂੰ ਮੁਲਤਵੀ ਕਰਨਾ ਹੋ ਸਕਦਾ ਹੈ। ਇਹ ਖੇਡਾਂ ਇਸ ਸਾਲ ਕਰਵਾਈਆਂ ਜਾਣਗੀਆਂ। ਮੰਤਰਾਲਾ ਦਾ ਪ੍ਰਮੁੱਖ ਪ੍ਰੋਗਰਾਮ, 'ਖੇਲੋ ਇੰਡੀਆ - ਖੇਡਾਂ ਦੇ ਵਿਕਾਸ ਲਈ ਰਾਸ਼ਟਰੀ ਪ੍ਰੋਗਰਾਮ' ਸਰਕਾਰ ਦੀ ਤਰਜੀਹ ਬਣੀ ਹੋਈ ਹੈ, ਇਸ ਨੂੰ ਪਿਛਲੇ ਵਿੱਤੀ ਸਾਲ ਦੌਰਾਨ 606 ਕਰੋੜ ਰੁਪਏ ਦੇ ਸੋਧੇ ਹੋਏ ਅਲਾਟਮੈਂਟ ਦੇ ਮੁਕਾਬਲੇ 1,045 ਕਰੋੜ ਰੁਪਏ ਦੀ ਅਲਾਟਮੈਂਟ ਕੀਤੀ ਗਈ ਹੈ। ਇਸ ਵਿੱਚ 439 ਕਰੋੜ ਰੁਪਏ ਦਾ ਵਾਧਾ ਇਸ ਪ੍ਰੋਗਰਾਮ ਪ੍ਰਤੀ ਸਰਕਾਰ ਦੀ ਵਚਨਬੱਧਤਾ ਨੂੰ ਦਰਸਾਉਂਦਾ ਹੈ। 

ਇਹ ਵੀ ਪੜ੍ਹੋ : ਕਬੱਡੀ ਦੇ ਬੁਲਾਰੇ ਅਮਰੀਕ ਖੋਸਾ ਕੋਟਲਾ ਦੀ ਕਾਰ 'ਤੇ ਜਾਨਲੇਵਾ ਹਮਲਾ

ਇਸ ਆਯੋਜਨ ਨੇ ਪਿਛਲੇ ਕੁਝ ਸਾਲਾਂ ਦੌਰਾਨ ਓਲੰਪਿਕ, ਏਸ਼ੀਅਨ ਖੇਡਾਂ ਅਤੇ ਰਾਸ਼ਟਰਮੰਡਲ ਖੇਡਾਂ ਵਰਗੇ ਪ੍ਰਮੁੱਖ ਵਿਸ਼ਵ ਈਵੈਂਟਾਂ ਲਈ ਐਥਲੀਟ ਤਿਆਰ ਕਰਨ ਦੀ ਆਪਣੀ ਸਮਰਥਾ ਨੂੰ ਦਿਖਾਇਆ ਹੈ। ਖਿਡਾਰੀਆਂ ਲਈ ਰਾਸ਼ਟਰੀ ਕੈਂਪ ਆਯੋਜਿਤ ਕਰਨ, ਕੈਂਪ ਦਾ ਬੁਨਿਆਦੀ ਢਾਂਚਾ ਅਤੇ ਸਾਜ਼ੋ-ਸਾਮਾਨ ਪ੍ਰਦਾਨ ਕਰਨ, ਕੋਚਾਂ ਦੀ ਨਿਯੁਕਤੀ ਅਤੇ ਖੇਡ ਦੇ ਬੁਨਿਆਦੀ ਢਾਂਚੇ ਨੂੰ ਕਾਇਮ ਰੱਖਣ ਲਈ ਜ਼ਿੰਮੇਵਾਰ ਸਪੋਰਟਸ ਅਥਾਰਟੀ ਆਫ ਇੰਡੀਆ (ਸਾਈ) ਲਈ ਬਜਟ ਅਲਾਟਮੈਂਟ ਵਿੱਚ 36.09 ਕਰੋੜ ਰੁਪਏ ਦਾ ਵਾਧਾ ਕੀਤਾ ਗਿਆ ਹੈ। ਪਿਛਲੇ ਸਾਲ ਸੋਧੇ ਹੋਏ ਖਰਚੇ 749.43 ਕਰੋੜ ਰੁਪਏ ਦੇ ਮੁਕਾਬਲੇ ਸਾਲ 2023-24 ਲਈ ਉਸਦੀ ਵੰਡ 785.52 ਕਰੋੜ ਰੁਪਏ ਹੈ। ਨੈਸ਼ਨਲ ਸਪੋਰਟਸ ਫੈਡਰੇਸ਼ਨਾਂ (ਐਨਐਸਐਫ) ਨੂੰ ਪਿਛਲੇ ਸਾਲ ਦੇ 280 ਕਰੋੜ ਰੁਪਏ ਦੇ ਸੰਸ਼ੋਧਿਤ ਬਜਟ ਤੋਂ 45 ਕਰੋੜ ਰੁਪਏ ਦੀ ਵਧੀ ਹੋਈ ਅਲਾਟਮੈਂਟ ਹੋਈ ਹੈ ਅਤੇ ਹੁਣ ਉਨ੍ਹਾਂ ਨੂੰ 325 ਕਰੋੜ ਰੁਪਏ ਮਿਲਣਗੇ। 

ਵਿਸ਼ਵ ਡੋਪਿੰਗ ਰੋਕੂ ਏਜੰਸੀ (ਵਾਡਾ) ਤੋਂ ਸਬੰਧਤ ਰਾਸ਼ਟਰੀ ਡੋਪਿੰਗ ਰੋਕੂ ਏਜੰਸੀ (ਨਾਡਾ) ਅਤੇ  ਨੈਸ਼ਨਲ ਡੋਪ ਟੈਸਟਿੰਗ ਲੈਬਾਰਟਰੀ (ਐਨਡੀਐਲਟੀ) ਨੂੰ ਪਹਿਲਾਂ SAI ਰਾਹੀਂ ਫੰਡ ਪ੍ਰਾਪਤ ਹੁੰਦੇ ਸਨ ਪਰ ਹੁਣ ਇਹ ਸੰਸਥਾਵਾਂ ਸਿੱਧੇ ਤੌਰ 'ਤੇ ਆਪਣੇ ਫੰਡ ਪ੍ਰਾਪਤ ਕਰਨਗੀਆਂ। ਇਸ ਸਾਲ ਦੇ ਬਜਟ ਵਿੱਚ ਨਾਡਾ ਲਈ 21.73 ਕਰੋੜ ਰੁਪਏ ਦਾ ਪ੍ਰਬੰਧ ਹੈ, ਜਦੋਂ ਕਿ ਡੋਪ ਟੈਸਟ ਕਰਵਾਉਣ ਵਾਲੀ ਐਨਡੀਟੀਐਲ ਨੂੰ 19.50 ਕਰੋੜ ਰੁਪਏ ਮਿਲਣਗੇ। ਦੁਨੀਆ ਭਰ ਦੇ ਦੇਸ਼ ਖੇਡਾਂ ਦੀ ਉੱਤਮਤਾ ਲਈ ਯਤਨਸ਼ੀਲ ਹਨ ਅਤੇ ਖੇਡ ਵਿਗਿਆਨ ਅਤੇ ਖਿਡਾਰੀਆਂ ਦੀ ਵਿਗਿਆਨਕ ਸਿਖਲਾਈ ਵੱਲ ਵਧੇਰੇ ਧਿਆਨ ਦੇ ਰਹੇ ਹਨ। ਅਜਿਹੇ 'ਚ ਇਸ ਸਾਲ ਦੇ ਬਜਟ 'ਚ ਰਾਸ਼ਟਰੀ ਖੇਡ ਵਿਗਿਆਨ ਅਤੇ ਖੋਜ ਕੇਂਦਰ ਲਈ ਵੀ 13 ਕਰੋੜ ਰੁਪਏ ਦੀ ਵਿਵਸਥਾ ਕੀਤੀ ਗਈ ਹੈ। 

ਨੋਟ - ਇਸ ਖ਼ਬਰ ਬਾਰੇ ਕੀ ਹੈ ਤੁਹਾਡੀ ਰਾਏ। ਕੁਮੈਂਟ ਕਰਕੇ ਦਿਓ ਜਵਾਬ।