ਇਸ ਕ੍ਰਿਕਟਰ ਨੇ 14 ਚੌਕਿਆਂ ਤੇ 16 ਛੱਕਿਆਂ ਤੇ ਮਦਦ ਨਾਲ ਠੋਕਿਆ ਦੋਹਰਾ ਸੈਂਕੜਾ
Thursday, Apr 25, 2019 - 04:13 PM (IST)
ਸਪੋਰਟਸ ਡੈਸਕ— ਵਰਲਡ ਕੱਪ 2019 ਦੀ ਬੰਗਲਾਦੇਸ਼ੀ ਟੀਮ 'ਚ ਆਪਣੀ ਜਗ੍ਹਾ ਪੱਕੀ ਕਰ ਚੁੱਕੇ ਸੌਮਿਆ ਸਰਕਾਰ ਨੇ ਦੋਹਰਾ ਸੈਂਕੜਾ ਲਗਾ ਕੇ ਰਿਕਾਰਡ ਕਾਇਮ ਕੀਤਾ ਹੈ। ਸੌਮਿਆ ਨੇ ਦੋਹਰਾ ਸੈਂਕੜਾ ਬੰਗਲਾਦੇਸ਼ 'ਚ ਖੇਡੀ ਜਾ ਰਹੀ ਢਾਕਾ ਪ੍ਰੀਮੀਅਮ ਲੀਗ ਦੇ ਅੰਤਿਮ ਮੈਚ 'ਚ ਲਗਾਇਆ।
ਸੌਮਿਆ ਅਬਹਾਨੀ ਲਿਮਟਿਡ ਵੱਲੋਂ ਖੇਡਦੇ ਹਨ। ਸ਼ੇਖ ਜਮਾਲ ਧਨਮੋਂਡੀ ਕਲੱਬ ਦੇ ਨਾਲ ਅਬਹਾਨੀ ਲਿਮਟਿਡ ਦਾ ਮੈਚ ਖੇਡਿਆ ਗਿਆ। ਅਬਹਾਨੀ ਲਿਮਟਿਡ ਵੱਲੋਂ ਖੇਡਦੇ ਹੋਏ ਸੌਮਿਆ ਨੇ 153 ਗੇਂਦਾਂ 'ਚ 208 ਦੌੜਾਂ ਬਣਾਈਆਂ। ਇਸ ਪਾਰੀ 'ਚ ਸੌਮਿਆ ਨੇ 16 ਛੱਕੇ ਅਤੇ 14 ਚੌਕੇ ਲਗਾਏ। ਸ਼ੇਖ ਜਮਾਲ ਧਨਮੋਂਡੀ ਕਲੱਬ ਨੇ ਟਾਸ ਜਿੱਤ ਕੇ ਪਹਿਲਾਂ ਬੱਲੇਬਾਜ਼ੀ ਕਰਦੇ ਹੋਏ 50 ਓਵਰ 'ਚ 317 ਦੌੜਾਂ ਦਾ ਟੀਚਾ ਦਿੱਤਾ।
ਟੀਚੇ ਦਾ ਪਿੱਛਾ ਕਰਨ ਉਤਰੀ ਅਬਹਾਨੀ ਲਿਮਟਿਡ ਵੱਲੋਂ ਸੌਮਿਆ ਨੇ ਜਹਰੂਲ ਇਸਲਾਮ ਦੇ ਨਾਲ ਬੈਟਿੰਗ ਕਰਦੇ ਹੋਏ ਪਹਿਲੇ ਵਿਕਟ ਲਈ 312 ਦੌੜਾਂ ਦੀ ਸਾਂਝੇਦਾਰੀ ਕੀਤੀ। ਜਹਰੂਲ ਨੇ ਵੀ 100 ਦੌੜਾਂ ਦੀ ਸ਼ਾਨਦਾਰ ਪਾਰੀ ਖੇਡੀ। ਸੌਮਿਆ ਸਰਕਾਰ ਦੀ ਸ਼ਾਨਦਾਰ ਪਾਰੀ ਨਾਲ ਅਬਹਾਨੀ ਲਿਮਟਿਡ ਨੇ ਨਾ ਸਿਰਫ ਮੈਚ ਜਿੱਤਿਆ ਸਗੋਂ ਢਾਕਾ ਪ੍ਰੀਮੀਅਮ ਲੀਗ ਦਾ ਖਿਤਾਬ ਆਪਣੇ ਨਾਂ ਕੀਤਾ। ਵਿਸ਼ਵ ਕੱਪ 2019 ਲਈ ਸੌਮਿਆ ਦਾ ਫਾਰਮ 'ਚ ਹੋਣਾ ਬੰਗਲਾਦੇਸ਼ ਦੀ ਟੀਮ ਲਈ ਚੰਗਾ ਸੰਕੇਤ ਹੈ।
