ਸੰਤੋਸ਼ ਟਰਾਫੀ ਫੁੱਟਬਾਲ ਫਾਈਨਲ ਗੇੜ 14 ਦਸੰਬਰ ਤੋਂ

ਨਵੀਂ ਦਿੱਲੀ- ਸੰਤੋਸ਼ ਟਰਾਫੀ ਲਈ ਖੇਡੀ ਗਈ 78ਵੀਂ ਸੀਨੀਅਰ ਰਾਸ਼ਟਰੀ ਫੁੱਟਬਾਲ ਚੈਂਪੀਅਨਸ਼ਿਪ ਦੇ ਫਾਈਨਲ ਗੇੜ ਦੇ ਮੈਚ 14 ਦਸੰਬਰ ਤੋਂ ਹੈਦਰਾਬਾਦ ਵਿਚ ਸ਼ੁਰੂ ਹੋਣਗੇ। ਆਲ ਇੰਡੀਆ ਫੁੱਟਬਾਲ ਫੈਡਰੇਸ਼ਨ (ਏ.ਆਈ.ਐੱਫ.ਐੱਫ.) ਨੇ ਸੋਮਵਾਰ ਨੂੰ ਇਹ ਐਲਾਨ ਕੀਤਾ। ਇਸ ਮੁਕਾਬਲੇ ਦੇ ਅੰਤਿਮ ਪੜਾਅ ਵਿੱਚ 12 ਟੀਮਾਂ ਭਾਗ ਲੈਣਗੀਆਂ। 

ਇਨ੍ਹਾਂ ਵਿੱਚ ਗਰੁੱਪ ਪੜਾਅ ਦੇ ਨੌਂ ਜੇਤੂ, ਪਿਛਲੇ ਸੀਜ਼ਨ ਦੇ ਦੋ ਫਾਈਨਲਿਸਟ (ਆਰਮੀ ਅਤੇ ਗੋਆ) ਅਤੇ ਮੇਜ਼ਬਾਨ ਤੇਲੰਗਾਨਾ ਸ਼ਾਮਲ ਹਨ। ਇਨ੍ਹਾਂ ਨੂੰ ਛੇ-ਛੇ ਟੀਮਾਂ ਦੇ ਦੋ ਗਰੁੱਪਾਂ ਵਿੱਚ ਵੰਡਿਆ ਗਿਆ ਹੈ। ਹਰੇਕ ਗਰੁੱਪ ਦੀਆਂ ਚੋਟੀ ਦੀਆਂ ਚਾਰ ਟੀਮਾਂ 26 ਅਤੇ 27 ਦਸੰਬਰ ਨੂੰ ਖੇਡੇ ਜਾਣ ਵਾਲੇ ਕੁਆਰਟਰ ਫਾਈਨਲ ਲਈ ਕੁਆਲੀਫਾਈ ਕਰਨਗੀਆਂ। ਕੁਆਰਟਰ ਫਾਈਨਲ ਤੱਕ ਦੇ ਸਾਰੇ ਮੈਚ ਡੇਕਨ ਏਰੀਨਾ ਵਿੱਚ ਖੇਡੇ ਜਾਣਗੇ। 

ਏਆਈਐਫਐਫ ਦੇ ਅਨੁਸਾਰ, ਸੈਮੀਫਾਈਨਲ 29 ਦਸੰਬਰ ਨੂੰ ਅਤੇ ਫਾਈਨਲ 31 ਦਸੰਬਰ ਨੂੰ ਜੀਐਮਸੀ ਬਾਲਯੋਗੀ ਅਥਲੈਟਿਕ ਸਟੇਡੀਅਮ ਵਿੱਚ ਖੇਡਿਆ ਜਾਵੇਗਾ। ਪੱਛਮੀ ਬੰਗਾਲ 32 ਵਾਰ ਦਾ ਰਿਕਾਰਡ ਚੈਂਪੀਅਨ ਹੈ ਪਰ 2016-17 ਤੋਂ ਬਾਅਦ ਆਪਣੇ ਪਹਿਲੇ ਖਿਤਾਬ ਦੀ ਤਲਾਸ਼ ਕਰ ਰਿਹਾ ਹੈ। ਉਸ ਦੇ ਸਾਹਮਣੇ ਸਭ ਤੋਂ ਵੱਡੀ ਚੁਣੌਤੀ ਮੌਜੂਦਾ ਚੈਂਪੀਅਨ ਸੈਨਾ ਦੀ ਹੋਵੇਗੀ, ਜਿਸ ਨੇ ਹੁਣ ਤੱਕ ਸੱਤ ਖ਼ਿਤਾਬ ਜਿੱਤੇ ਹਨ। ਇਸ ਨੇ ਪਿਛਲੇ 11 ਸੀਜ਼ਨਾਂ ਵਿੱਚ ਇਨ੍ਹਾਂ ਵਿੱਚੋਂ ਛੇ ਖ਼ਿਤਾਬ ਜਿੱਤੇ ਹਨ।