ਸਾਊਦੀ ਪ੍ਰੋ ਲੀਗ ''ਤੇ ਰੋਨਾਲਡੋ ਦਾ ਦਬਦਬਾ, ਸੀਜ਼ਨ ''ਚ ਸਭ ਤੋਂ ਵੱਧ ਗੋਲ ਦਾ ਬਣਾਇਆ ਰਿਕਾਰਡ

ਰਿਆਦ : ਦਿੱਗਜ ਫੁੱਟਬਾਲਰ ਕ੍ਰਿਸਟੀਆਨੋ ਰੋਨਾਲਡੋ ਨੇ ਸਭ ਤੋਂ ਵੱਧ ਗੋਲ ਕਰਨ ਦੇ ਰਿਕਾਰਡ ਨਾਲ ਸਾਊਦੀ ਪ੍ਰੋ ਲੀਗ ਫੁੱਟਬਾਲ ਸੀਜ਼ਨ ਦਾ ਅੰਤ ਕਰ ਦਿੱਤਾ। ਅਲ ਇਤਿਹਾਦ 'ਤੇ ਅਲ ਨਾਸਰ ਦੀ 4-2 ਦੀ ਜਿੱਤ ਵਿੱਚ ਰੋਨਾਲਡੋ ਨੇ ਦੋ ਵਾਰ ਗੋਲ ਕੀਤੇ। ਇਸ ਦੇ ਨਾਲ, ਲੀਗ ਵਿੱਚ ਉਸਦੇ ਗੋਲਾਂ ਦੀ ਗਿਣਤੀ 35 ਹੋ ਗਈ, ਜੋ ਕਿ 2019 ਵਿੱਚ ਅਬਦੇਰਜ਼ਾਕ ਹਮਦੱਲਾਹ ਦੇ ਪਿਛਲੇ ਰਿਕਾਰਡ ਨਾਲੋਂ ਇੱਕ ਗੋਲ ਵੱਧ ਹੈ। ਅਲ ਨਾਸਰ ਦੀ ਟੀਮ 82 ਅੰਕਾਂ ਨਾਲ ਲੀਗ 'ਚ ਦੂਜੇ ਸਥਾਨ 'ਤੇ ਰਹੀ। ਟੀਮ ਨੇ ਸਥਾਨਕ ਦਾਅਵੇਦਾਰ ਅਲ ਹਿਲਾਲ ਤੋਂ 14 ਅੰਕ ਪਿੱਛੇ ਰਹਿ ਗਏ, ਜਿਸ ਨੇ ਦੋ ਹਫ਼ਤਿਆਂ ਤੋਂ ਵੱਧ ਸਮਾਂ ਬਾਕੀ ਰਹਿ ਕੇ ਚੈਂਪੀਅਨਸ਼ਿਪ ਜਿੱਤੀ, ਅਤੇ ਸੋਮਵਾਰ ਨੂੰ 34 ਲੀਗ ਰਾਊਂਡਾਂ ਵਿੱਚ ਅਜੇਤੂ ਰਹਿ ਕੇ ਸੀਜ਼ਨ ਦਾ ਅੰਤ ਕੀਤਾ।
ਟੀਮ ਨੇ ਆਪਣੇ ਆਖ਼ਰੀ ਲੀਗ ਮੈਚ ਵਿੱਚ ਅਲ ਵੇਹਦਾ ਨੂੰ 2-1 ਨਾਲ ਹਰਾਇਆ। ਅਲ ਹਿਲਾਲ ਦੀ ਟੀਮ ਨੇਮਾਰ ਦੀ ਗੈਰ-ਮੌਜੂਦਗੀ 'ਚ ਵੀ ਵਿਰੋਧੀ ਟੀਮਾਂ 'ਤੇ ਹਾਵੀ ਹੋਣ 'ਚ ਆਸਾਨੀ ਨਾਲ ਸਫਲ ਰਹੀ। ਨੇਮਾਰ ਪਿਛਲੇ ਸਾਲ ਅਗਸਤ ਵਿੱਚ ਪੈਰਿਸ ਸੇਂਟ ਜਰਮੇਨ ਛੱਡਣ ਤੋਂ ਬਾਅਦ ਇਸ ਟੀਮ ਵਿੱਚ ਸ਼ਾਮਲ ਹੋਇਆ ਸੀ ਪਰ ਅਕਤੂਬਰ ਵਿੱਚ ਏ.ਸੀ. ਐੱਲ. ਦੀ ਸੱਟ ਕਾਰਨ ਪੂਰੇ ਸੀਜ਼ਨ ਤੋਂ ਬਾਹਰ ਹੋ ਗਿਆ ਸੀ।