ਅਫੀਫ ਦੀ ਹੈਟ੍ਰਿਕ, ਕਤਰ ਨੇ ਲਗਾਤਾਰ ਜਿੱਤਿਆ ਏਸ਼ੀਆ ਕੱਪ ਦਾ ਖਿਤਾਬ

ਲੁਸੈਲ (ਕਤਰ), (ਭਾਸ਼ਾ) : ਪੈਨਲਟੀ ‘ਤੇ ਅਕਰਮ ਅਫੀਫ ਦੀ ਹੈਟ੍ਰਿਕ ਦੀ ਬਦੌਲਤ ਕਤਰ ਨੇ ਸ਼ਨੀਵਾਰ ਨੂੰ ਇੱਥੇ ਜਾਰਡਨ ਨੂੰ 3-1 ਨਾਲ ਹਰਾ ਕੇ ਲਗਾਤਾਰ ਏਸ਼ੀਆ ਕੱਪ ਦਾ ਖਿਤਾਬ ਜਿੱਤ ਲਿਆ। ਟੂਰਨਾਮੈਂਟ ਦੇ ਸਰਵੋਤਮ ਖਿਡਾਰੀ ਅਤੇ ਅੱਠ ਗੋਲਾਂ ਦੇ ਨਾਲ ਚੋਟੀ ਦੇ ਸਕੋਰਰ ਰਹੇ ਆਫੀਫ ਨੇ ਸ਼ਨੀਵਾਰ ਨੂੰ ਇੱਥੇ ਲੁਸੈਲ ਸਟੇਡੀਅਮ 'ਚ ਤਿੰਨੋਂ ਸਪਾਟ ਕਿੱਕਾਂ ਨੂੰ ਗੋਲ 'ਚ ਬਦਲਣ 'ਚ ਕੋਈ ਗਲਤੀ ਨਹੀਂ ਕੀਤੀ। ਪਿਛਲੇ ਸਾਲ ਇਸ ਸਟੇਡੀਅਮ 'ਚ ਵਿਸ਼ਵ ਕੱਪ ਦਾ ਫਾਈਨਲ ਖੇਡਿਆ ਗਿਆ ਸੀ, ਜਿਸ ਨੂੰ ਲਿਓਨਲ ਮੇਸੀ ਅਤੇ ਕੇਲੀਅਨ ਐਮਬਾਪੇ ਨੇ ਰੋਮਾਂਚਕ ਬਣਾਇਆ ਸੀ। 

ਇਸ ਵਾਰ ਅਫੀਫ ਖਿੱਚ ਦਾ ਕੇਂਦਰ ਰਿਹਾ ਅਤੇ ਉਹ ਏਸ਼ੀਅਨ ਕੱਪ ਫਾਈਨਲ 'ਚ ਹੈਟ੍ਰਿਕ ਲਗਾਉਣ ਵਾਲਾ ਪਹਿਲਾ ਫੁੱਟਬਾਲਰ ਬਣ ਗਿਆ। ਜਾਪਾਨ ਨੇ 2000 ਅਤੇ 2004 ਵਿੱਚ ਲਗਾਤਾਰ ਏਸ਼ਿਆਈ ਕੱਪ ਖ਼ਿਤਾਬ ਜਿੱਤੇ। ਉਦੋਂ ਤੋਂ, ਕਤਰ ਲਗਾਤਾਰ ਖ਼ਿਤਾਬ ਜਿੱਤਣ ਵਾਲਾ ਪਹਿਲਾ ਦੇਸ਼ ਬਣ ਗਿਆ। ਸਟੇਡੀਅਮ ਵਿੱਚ 86,000 ਤੋਂ ਵੱਧ ਦਰਸ਼ਕ ਮੌਜੂਦ ਸਨ। ਅਫੀਫ ਨੇ 22ਵੇਂ ਮਿੰਟ 'ਚ ਪੈਨਲਟੀ ਨੂੰ ਗੋਲ 'ਚ ਬਦਲਿਆ, ਜਿਸ ਤੋਂ ਬਾਅਦ 67ਵੇਂ ਮਿੰਟ 'ਚ ਯਾਜ਼ਾਨ ਅਲ ਨੇਮਤ ਨੇ ਗੋਲ ਕਰਕੇ ਜਾਰਡਨ ਨੂੰ ਬਰਾਬਰੀ 'ਤੇ ਲਿਆ ਦਿੱਤਾ। ਇਸ ਤੋਂ ਬਾਅਦ ਅਫੀਫ ਨੇ 73ਵੇਂ ਮਿੰਟ 'ਚ ਸਪਾਟ ਕਿੱਕ ਅਤੇ 'ਸਟਾਪੇਜ ਟਾਈਮ' (95ਵੇਂ ਮਿੰਟ) 'ਚ ਸਪਾਟ ਕਿੱਕ ਨਾਲ ਗੋਲ ਕਰਕੇ ਆਪਣੀ ਟੀਮ ਨੂੰ ਜਿੱਤ ਦਿਵਾਈ। 

ਉਸ ਨੇ ਕਿਹਾ, ''ਮੈਂ ਇਨ੍ਹਾਂ ਪੈਨਲਟੀਜ਼ ਨੂੰ ਗੋਲ 'ਚ ਬਦਲਣ 'ਚ ਕਾਮਯਾਬ ਰਿਹਾ ਕਿਉਂਕਿ ਮੇਰੇ ਸਾਥੀਆਂ ਨੂੰ ਮੇਰੇ 'ਤੇ ਪੂਰਾ ਭਰੋਸਾ ਸੀ। ਇਹ ਟੈਕਨਾਲੋਜੀ ਬਾਰੇ ਨਹੀਂ ਹੈ, ਬਲਕਿ ਇਸ ਭਾਵਨਾ ਬਾਰੇ ਹੈ ਕਿ ਲੋਕ ਅਰਥਾਤ ਮੇਰੀ ਟੀਮ ਮੇਰੇ ਸਮਰਥਨ ਲਈ ਮੇਰੇ ਪਿੱਛੇ ਖੜ੍ਹੀ ਹੈ। ਜਾਰਡਨ ਦੀ ਟੀਮ ਆਪਣਾ ਪਹਿਲਾ ਏਸ਼ੀਅਨ ਕੱਪ ਫਾਈਨਲ ਖੇਡ ਰਹੀ ਸੀ।