ਭਾਰਤੀ ਬੱਲੇਬਾਜ਼ ਨੇ ਬਣਾਇਆ ਵਰਲਡ ਰਿਕਾਰਡ, ਜੜੇ ਲਗਾਤਾਰ 8 ਛੱਕੇ, 11 ਗੇਂਦਾਂ 'ਤੇ ਠੋਕੀ ਫਿਫਟੀ

ਸਪੋਰਟਸ ਡੈਸਕ-  ਕ੍ਰਿਕਟ ਜਗਤ 'ਚ ਅਕਸਰ ਕਈ ਰਿਕਾਰਡ ਬਣਦੇ ਤੇ ਟੁੱਟਦੇ ਹਨ। ਅੱਜ ਅਸੀਂ ਤੁਹਾਨੂੰ ਇਕ ਅਜਿਹੇ ਰਿਕਾਰਡ ਬਾਰੇ ਦੱਸਣ ਜਾ ਰਹੇ ਹਾਂ ਜਿਸ ਨੂੰ ਬਣਾ ਕੇ ਨੌਜਵਾਨ ਬੱਲੇਬਾਜ਼ ਆਕਾਸ਼ ਕੁਮਾਰ ਚੌਧਰੀ ਰਾਤੋ-ਰਾਤ ਕ੍ਰਿਕਟ ਜਗਤ 'ਚ ਛਾ ਗਿਆ।। ਰਣਜੀ ਟਰਾਫੀ 2025-26 ਦੇ ਇੱਕ ਮੁਕਾਬਲੇ ਵਿੱਚ ਮੇਘਾਲਿਆ ਦੇ ਨੌਜਵਾਨ ਬੱਲੇਬਾਜ਼ ਆਕਾਸ਼ ਕੁਮਾਰ ਚੌਧਰੀ ਨੇ ਫਸਟ-ਕਲਾਸ ਕ੍ਰਿਕਟ ਵਿੱਚ ਸਭ ਤੋਂ ਤੇਜ਼ ਅਰਧ ਸੈਂਕੜਾ ਲਗਾ ਕੇ ਵਿਸ਼ਵ ਰਿਕਾਰਡ ਤੋੜ ਦਿੱਤਾ ਹੈ। ਇਹ ਰਿਕਾਰਡਤੋੜ ਪਾਰੀ ਮੇਘਾਲਿਆ ਅਤੇ ਅਰੁਣਾਚਲ ਪ੍ਰਦੇਸ਼ ਵਿਚਕਾਰ ਸੂਰਤ ਵਿੱਚ ਖੇਡੇ ਜਾ ਰਹੇ ਮੁਕਾਬਲੇ ਵਿੱਚ ਦੇਖਣ ਨੂੰ ਮਿਲੀ।

ਸਭ ਤੋਂ ਤੇਜ਼ ਫਸਟ-ਕਲਾਸ ਫਿਫਟੀ  

ਆਕਾਸ਼ ਕੁਮਾਰ ਚੌਧਰੀ ਨੇ ਸਿਰਫ਼ 11 ਗੇਂਦਾਂ 'ਤੇ 50 ਦੌੜਾਂ ਬਣਾ ਕੇ ਵਿਸ਼ਵ ਰਿਕਾਰਡ ਆਪਣੇ ਨਾਂ ਕੀਤਾ। ਇਹ ਫਰਸਟ ਕਲਾਸ 'ਚ ਉਸ ਵਲੋਂ ਬਣਾਈ ਸਭ ਤੋਂ ਤੇਜ਼ ਫਿਫਟੀ ਹੈ। ਇਸ ਨਾਲ ਉਨ੍ਹਾਂ ਨੇ 13 ਸਾਲ ਪੁਰਾਣਾ ਰਿਕਾਰਡ ਤੋੜ ਦਿੱਤਾ। ਇਸ ਤੋਂ ਪਹਿਲਾਂ ਸਭ ਤੋਂ ਤੇਜ਼ ਫਸਟ-ਕਲਾਸ ਅਰਧ ਸੈਂਕੜਾ ਲਗਾਉਣ ਦਾ ਰਿਕਾਰਡ ਵੇਨ ਵਾਈਟ (Wayne White) ਦੇ ਨਾਂ ਸੀ, ਜਿਨ੍ਹਾਂ ਨੇ 2012 ਵਿੱਚ 12 ਗੇਂਦਾਂ 'ਤੇ ਇਹ ਕਾਰਨਾਮਾ ਕੀਤਾ ਸੀ। ਰਣਜੀ ਟਰਾਫੀ ਵਿੱਚ ਸਭ ਤੋਂ ਤੇਜ਼ ਅਰਧ ਸੈਂਕੜਾ ਲਗਾਉਣ ਦਾ ਪੁਰਾਣਾ ਰਿਕਾਰਡ ਜੰਮੂ-ਕਸ਼ਮੀਰ ਦੇ ਬੰਦੀਪ ਸਿੰਘ (Bandeep Singh) ਦੇ ਨਾਂ ਸੀ, ਜਿਨ੍ਹਾਂ ਨੇ 2015-16 ਵਿੱਚ 15 ਗੇਂਦਾਂ 'ਤੇ ਫਿਫਟੀ ਲਗਾਈ ਸੀ।  ਆਕਾਸ਼ ਚੌਧਰੀ 14 ਗੇਂਦਾਂ 'ਤੇ 50 ਦੌੜਾਂ ਬਣਾ ਕੇ ਨਾਬਾਦ ਰਹੇ, ਜਦੋਂ ਮੇਘਾਲਿਆ ਨੇ ਆਪਣੀ ਪਹਿਲੀ ਪਾਰੀ 6 ਵਿਕਟਾਂ 'ਤੇ 628 ਦੌੜਾਂ 'ਤੇ ਘੋਸ਼ਿਤ ਕੀਤੀ।

ਲਗਾਤਾਰ ਛੱਕਿਆਂ ਦਾ ਕਾਰਨਾਮਾ

ਆਕਾਸ਼ ਕੁਮਾਰ ਚੌਧਰੀ ਨੇ ਇਸ ਇਤਿਹਾਸਕ ਪਾਰੀ ਦੌਰਾਨ ਇੱਕ ਹੋਰ ਵੱਡਾ ਕਾਰਨਾਮਾ ਕੀਤਾ। ਉਨ੍ਹਾਂ ਨੇ ਲਿਮਾਰ ਡਾਬੀ ਦੇ ਇੱਕ ਓਵਰ ਵਿੱਚ ਲਗਾਤਾਰ 6 ਛੱਕੇ ਮਾਰਨ ਦਾ ਰਿਕਾਰਡ ਬਣਾਇਆ।  ਇਸ ਕਾਰਨਾਮੇ ਨਾਲ ਉਹ ਰਵੀ ਸ਼ਾਸਤਰੀ ਤੋਂ ਬਾਅਦ ਰਣਜੀ ਟਰਾਫੀ ਵਿੱਚ ਇੱਕ ਓਵਰ ਵਿੱਚ 6 ਛੱਕੇ ਲਗਾਉਣ ਵਾਲੇ ਦੂਜੇ ਬੱਲੇਬਾਜ਼ ਬਣ ਗਏ। ਉਨ੍ਹਾਂ ਨੇ ਇੱਕ ਓਵਰ ਵਿੱਚ 6 ਛੱਕੇ ਲਗਾਉਣ ਤੋਂ ਬਾਅਦ ਅਗਲੀਆਂ ਦੋ ਗੇਂਦਾਂ 'ਤੇ ਵੀ ਛੱਕੇ ਜੜ੍ਹੇ, ਜਿਸ ਨਾਲ ਉਹ ਲਗਾਤਾਰ 8 ਗੇਂਦਾਂ 'ਤੇ 8 ਛੱਕੇ ਲਗਾਉਣ ਵਾਲੇ ਪਹਿਲੇ ਬੱਲੇਬਾਜ਼ ਬਣ ਗਏ।