ਸਾਥੀ ਖਿਡਾਰਣ ਨਾਲ ਵਿਆਹ ਕਰਨ ਵਾਲੀ ਨਿਊਜ਼ੀਲੈਂਡ ਦੀ ਕ੍ਰਿਕਟਰ ਹੋਈ ਗਰਭਵਤੀ

ਨਵੀਂ ਦਿੱਲੀ— ਨਿਊਜ਼ੀਲੈਂਡ ਦੀ ਮਹਿਲਾ ਕ੍ਰਿਕਟ ਟੀਮ ਦੀ ਕਪਤਾਨ ਐਮੀ ਸੈਟਰਥਵੇਟ ਦੇ ਘਰ ਨਵੇਂ ਸਾਲ 'ਚ ਬੱਚੇ ਦਾ ਜਨਮ ਹੋ ਸਕਦਾ ਹੈ। ਐਮੀ ਸੈਟਰਥਵੇਟ ਨੇ ਮਾਰਚ 2017 'ਚ ਆਪਣੀ ਹੀ ਟੀਮ ਦੀ ਮਹਿਲਾ ਕ੍ਰਿਕਟਰ ਲੀ ਤਹੁਹੁ ਨਾਲ ਵਿਆਹ ਕੀਤਾ ਸੀ। ਤਾਂ ਉਸ ਸਮੇਂ ਦੋਵਾਂ ਦਾ ਵਿਆਹ ਖੂਬ ਚਰਚਾਂ 'ਚ ਸੀ। ਹੁਣ ਐਮੀ ਗਰਭਵਤੀ ਹੈ। ਇਸ ਦੀ ਖਬਰ ਉਸ ਨੇ ਖੁਦ ਹੀ ਆਪਣੇ ਟਵਿਟਰ ਅਕਾਊਂਟ 'ਤੇ ਸ਼ੇਅਰ ਕੀਤੀ ਹੈ।

ਐਮੀ ਨੇ ਲਿਖਿਆ ਕਿ ਲੀ ਤੇ ਮੈਂ ਇਹ ਜਾਣਕਾਰੀ ਦਿੰਦੇ ਹੋਏ ਰੋਮਾਂਚਿਤ ਹਾਂ, ਮੈਂ ਅਗਲੇ ਸਾਲ ਦੇ ਸ਼ੁਰੂਆਤ 'ਚ ਆਪਣੇ ਪਹਿਲੇ ਬੱਚੇ ਨੂੰ ਜਨਮ ਦੇਣ ਵਾਲੀ ਹਾਂ, ਜੀਵਨ ਦੀ ਇਸ ਨਵੀਂ ਪਾਰੀ ਲਈ ਅਸੀਂ ਬਹੁਤ ਉਤਸ਼ਾਹਿਤ ਹਾਂ। ਇਸ ਨੂੰ ਸ਼ਬਦਾਂ 'ਚ ਬਿਆਨ ਨਹੀਂ ਕਰ ਸਕਦੇ ਹਾਂ।

ਦੱਸਿਆ ਜਾ ਰਿਹਾ ਕਿ ਐਮੀ ਨੇ ਤਕਨੀਕ ਦੀ ਮਦਦ ਨਾਲ ਪ੍ਰੈਗਨੈਂਸੀ ਹਾਸਲ ਕੀਤੀ ਹੈ। ਹਾਲਾਂਕਿ ਇਸ ਬੱਚੇ ਦਾ ਪਿਤਾ ਕੌਣ ਹੈ, ਇਸ ਨੂੰ ਸੀਕ੍ਰੇਟ ਰੱਖਿਆ ਗਿਆ ਹੈ। ਜ਼ਿਕਰਯੋਗ ਹੈ ਕਿ ਅਕਤੂਬਰ 1986 ਨੂੰ ਜਨਮੀ ਐਮੀ ਨਿਊਜ਼ੀਲੈਂਡ ਸਟੇਟ ਲੀਗ 'ਚ ਕੈਂਟਰਬਰੀ ਮੈਜੀਸ਼ਿਅਨ ਤੇ ਆਸਟਰੇਲੀਆਈ ਮਹਿਲਾ ਬਿਗ ਬੈਸ਼ ਲੀਗ 'ਚ ਮੈਲਬੋਰਨ ਰੇਨੇਗੇਡਸ ਦੇ ਲਈ ਖੇਡਦੀ ਹੈ। ਉਹ ਟੀਮ ਦੀ ਮੌਜੂਦਾ ਕਪਤਾਨ ਵੀ ਹੈ। ਉਹ ਨਿਊਜ਼ੀਲੈਂਡ ਦੇ ਲਈ ਵਨ ਡੇ ਤੇ ਟੀ-20 ਵਿਸ਼ਵ ਕੱਪ ਵੀ ਖੇਡ ਚੁੱਕੀ ਹੈ। ਐਮੀ ਤੇ ਲੀ ਇਕ ਦੂਜੇ ਨੂੰ ਅੱਠ ਸਾਲ ਤੋਂ ਜਾਣਦੀਆਂ ਹਨ। ਕ੍ਰਿਕਟ ਖੇਡਦੇ ਸਮੇਂ ਵਾਰ-ਵਾਰ ਮਿਲਣ ਨਾਲ ਉਹ ਦੋਵੇਂ ਇਕ ਦੂਜੇ ਦੇ ਕਰੀਬ ਆ ਗਈਆਂ ਸਨ।