ਨੀਰਜ ਚੋਪੜਾ ਦਾ 'ਫਿਟਨੈੱਸ ਰਾਜ਼': ਅਜਿਹਾ ਡਾਈਟ ਪਲਾਨ ਜਿਸ ਨੂੰ ਤੁਸੀਂ ਵੀ ਕਰ ਸਕਦੇ ਹੋ ਫਾਲੋ

ਸਪੋਰਟਸ ਡੈਸਕ- ਭਾਰਤੀ ਖੇਡ ਜਗਤ ਦੇ ਸਭ ਤੋਂ ਵੱਡੇ ਸਟਾਰ ਅਤੇ ਜੈਵਲਿਨ ਥ੍ਰੋਅਰ ਨੀਰਜ ਚੋਪੜਾ ਹਮੇਸ਼ਾ ਚਰਚਾ ਵਿੱਚ ਰਹਿੰਦੇ ਹਨ। ਉਹ ਨਾ ਸਿਰਫ਼ ਆਪਣੇ ਸ਼ਾਨਦਾਰ ਪ੍ਰਦਰਸ਼ਨ ਨਾਲ ਦੇਸ਼ ਦਾ ਨਾਂ ਰੌਸ਼ਨ ਕਰਦੇ ਹਨ, ਸਗੋਂ ਆਪਣੀ ਫਿਟਨੈੱਸ ਅਤੇ ਸਖ਼ਤ ਡਾਈਟ ਰੂਟੀਨ ਲਈ ਵੀ ਜਾਣੇ ਜਾਂਦੇ ਹਨ। ਟੋਕੀਓ ਓਲੰਪਿਕ 2020 ਦੇ ਗੋਲਡ ਮੈਡਲਿਸਟ ਅਤੇ ਪੈਰਿਸ ਓਲੰਪਿਕ 2024 ਦੇ ਸਿਲਵਰ ਮੈਡਲ ਜੇਤੂ ਨੀਰਜ ਚੋਪੜਾ ਫਿੱਟ ਰਹਿਣ ਲਈ ਕਿਸ ਤਰ੍ਹਾਂ ਦੀ ਖੁਰਾਕ ਲੈਂਦੇ ਹਨ, ਆਓ ਜਾਣਦੇ ਹਾਂ।

ਨੀਰਜ ਚੋਪੜਾ ਦਾ ਸਖ਼ਤ ਡਾਈਟ ਪਲਾਨ
ਨੀਰਜ ਚੋਪੜਾ ਫਿੱਟ ਰਹਿਣ ਲਈ ਇੱਕ ਸਖ਼ਤ ਡਾਈਟ ਪਲਾਨ ਅਤੇ ਫਿਟਨੈੱਸ ਰੂਟੀਨ ਦਾ ਪਾਲਣ ਕਰਦੇ ਹਨ। ਮਾਹਿਰਾਂ ਅਨੁਸਾਰ, ਐਥਲੀਟਾਂ ਨੂੰ ਉਨ੍ਹਾਂ ਦੀ ਖੇਡ ਦੇ ਆਧਾਰ 'ਤੇ, ਊਰਜਾ ਲਈ ਸਰੀਰ ਵਿੱਚ ਥੋੜ੍ਹਾ ਜ਼ਿਆਦਾ ਫੈਟ ਬਣਾਈ ਰੱਖਣ ਦੀ ਸਲਾਹ ਦਿੱਤੀ ਜਾਂਦੀ ਹੈ। ਨੀਰਜ ਆਪਣੀ ਖੁਰਾਕ ਵਿੱਚ ਫੈਟ ਅਤੇ ਪ੍ਰੋਟੀਨ ਸ਼ਾਮਲ ਕਰਦੇ ਹਨ, ਜੋ ਮਾਸਪੇਸ਼ੀਆਂ ਨੂੰ ਤਾਕਤ ਦੇਣ ਅਤੇ ਟੋਨ ਰੱਖਣ ਵਿੱਚ ਮਦਦ ਕਰਦਾ ਹੈ।

ਨਾਸ਼ਤੇ ਵਿੱਚ ਕੀ ਖਾਂਦੇ ਹਨ?
ਨੀਰਜ ਚੋਪੜਾ ਆਪਣੇ ਦਿਨ ਦੀ ਸ਼ੁਰੂਆਤ ਭਰਪੂਰ ਊਰਜਾ ਨਾਲ ਕਰਦੇ ਹਨ। ਉਹ ਨਾਸ਼ਤੇ ਵਿੱਚ ਦੋ ਬ੍ਰੈੱਡ, ਫਲ, ਦਹੀਂ, ਓਟਸ ਅਤੇ ਤਿੰਨ-ਚਾਰ ਅੰਡੇ ਦਾ ਸਫੇਦ ਹਿੱਸਾ ਖਾਂਦੇ ਹਨ। ਇਸ ਤੋਂ ਇਲਾਵਾ, ਉਹ ਜੂਸ ਜਾਂ ਨਾਰੀਅਲ ਪਾਣੀ ਅਤੇ ਡਰਾਈ ਫਰੂਟਸ ਵੀ ਲੈਂਦੇ ਹਨ।

ਦੁਪਹਿਰ ਦਾ ਖਾਣਾ (ਲੰਚ)
ਦੁਪਹਿਰ ਦੇ ਖਾਣੇ ਵਿੱਚ ਨੀਰਜ ਖਾਸ ਤੌਰ 'ਤੇ ਪ੍ਰੋਟੀਨ ਦੀ ਜ਼ਰੂਰਤ ਨੂੰ ਪੂਰਾ ਕਰਦੇ ਹਨ। ਉਨ੍ਹਾਂ ਦੇ ਲੰਚ ਵਿੱਚ ਦਹੀਂ, ਚਾਵਲ, ਦਾਲ, ਸਬਜ਼ੀਆਂ, ਸਲਾਦ ਅਤੇ ਗ੍ਰਿਲਡ ਚਿਕਨ ਸ਼ਾਮਲ ਹੁੰਦਾ ਹੈ।

ਰਾਤ ਦਾ ਖਾਣਾ (ਡਿਨਰ) 
ਨੀਰਜ ਚੋਪੜਾ ਰਾਤ ਦਾ ਖਾਣਾ ਹਲਕਾ ਰੱਖਣਾ ਪਸੰਦ ਕਰਦੇ ਹਨ। ਉਹ ਡਿਨਰ ਵਿੱਚ ਫਲ, ਸਬਜ਼ੀਆਂ, ਸਲਾਦ ਅਤੇ ਪ੍ਰੋਟੀਨ ਨਾਲ ਭਰਪੂਰ ਖਾਣਾ ਖਾਂਦੇ ਹਨ। ਸੌਣ ਤੋਂ ਪਹਿਲਾਂ, ਉਹ ਦੁੱਧ, ਖਜੂਰ  ਅਤੇ ਕਦੇ-ਕਦੇ ਗੁੜ ਲੈਂਦੇ ਹਨ।

ਟ੍ਰੇਨਿੰਗ ਦੌਰਾਨ ਖੁਰਾਕ
ਟ੍ਰੇਨਿੰਗ ਦੌਰਾਨ, ਨੀਰਜ ਊਰਜਾ ਲਈ ਕੇਲੇ, ਜੂਸ ਅਤੇ ਨਾਰੀਅਲ ਪਾਣੀ ਵਰਗੀਆਂ ਚੀਜ਼ਾਂ ਲੈਂਦੇ ਹਨ।  ਟ੍ਰੇਨਿੰਗ ਖਤਮ ਹੋਣ ਦੇ 15-20 ਮਿੰਟਾਂ ਦੇ ਅੰਦਰ ਉਹ ਪ੍ਰੋਟੀਨ ਸ਼ੇਕ ਪੀਣਾ ਪਸੰਦ ਕਰਦੇ ਹਨ।  ਰਾਤ ਨੂੰ ਖਾਣੇ ਵਿੱਚ ਉਹ ਕਾਰਬੋਹਾਈਡ੍ਰੇਟ ਤੋਂ ਬਿਨਾਂ ਵਾਲਾ ਭੋਜਨ ਲੈਂਦੇ ਹਨ।

ਦੇਸੀ ਖਾਣੇ ਨਾਲ ਪਿਆਰ
ਭਾਵੇਂ ਨੀਰਜ ਸਖ਼ਤ ਡਾਈਟ ਫਾਲੋ ਕਰਦੇ ਹਨ, ਪਰ ਉਨ੍ਹਾਂ ਨੂੰ ਦੇਸੀ ਖਾਣਾ ਬੇਹੱਦ ਪਸੰਦ ਹੈ। ਉਹ ਚੂਰਮਾ, ਗੋਲਗੱਪੇ, ਗੁਲਾਬ ਜਾਮੁਨ, ਆਈਸਕ੍ਰੀਮ ਅਤੇ ਖੀਰ ਨੂੰ ਕਾਫ਼ੀ ਪਸੰਦ ਕਰਦੇ ਹਨ। ਹਾਲਾਂਕਿ, ਫਿਟਨੈੱਸ ਦੇ ਚਲਦਿਆਂ ਉਹ ਇਹ ਸਭ ਚੀਜ਼ਾਂ ਸਿਰਫ਼ 'ਚੀਟ ਮੀਲ' ਦੇ ਤੌਰ 'ਤੇ ਲੈਂਦੇ ਹਨ, ਉਹ ਵੀ ਉਦੋਂ ਜਦੋਂ ਉਨ੍ਹਾਂ ਨੂੰ ਕਿਸੇ ਮੁਕਾਬਲੇ ਵਿੱਚ ਹਿੱਸਾ ਨਹੀਂ ਲੈਣਾ ਹੁੰਦਾ।