ਮੋਰੱਕੋ ਨੇ ਫੀਫਾ ਵਿਸ਼ਵ ਕੱਪ ਦੇ ਨਾਕਆਊਟ 'ਚ ਬਣਾਈ ਜਗ੍ਹਾ, ਕ੍ਰੋਏਸ਼ੀਆ ਆਖਰੀ 16 'ਚ ਪੁੱਜਿਆ

ਅਲ ਰੇਆਨ (ਕਤਰ) (ਭਾਸ਼ਾ) : ਮੋਰੱਕੋ ਨੇ ਪਹਿਲੇ ਹਾਫ ’ਚ ਦਾਗੇ 2 ਗੋਲ ਦੀ ਬਦੌਲਤ ਕੈਨੇਡਾ ਨੂੰ ਫੀਫਾ ਵਿਸ਼ਵ ਕੱਪ ਦੇ ਗਰੁੱਪ-ਐੱਫ ਦੇ ਮੁਕਾਬਲੇ ’ਚ 2-1 ਨਾਲ ਹਰਾ ਕੇ ਨਾਕਆਊਟ ’ਚ ਜਗ੍ਹਾ ਬਣਾਈ, ਜਦੋਂਕਿ ਪਿਛਲੇ ਵਿਸ਼ਵ ਕੱਪ ’ਚ ਚੋਟੀ ਦੇ-3 ’ਚ ਸ਼ਾਮਲ 2 ਟੀਮਾਂ ਵਿਚਕਾਰ ਹੋਇਆ ਮੁਕਾਬਲਾ ਗੋਲ ਰਹਿਤ ਡਰਾਅ ਰਿਹਾ, ਜਿਸ ਨਾਲ ਕ੍ਰੋਏਸ਼ੀਆ ਆਖਰੀ-16 ’ਚ ਪਹੁੰਚਿਆ, ਜਦੋਂਕਿ ਬੈਲਜੀਅਮ ਗਰੁੱਪ ਪੜਾਅ ਤੋਂ ਹੀਬਾਹਰ ਹੋ ਗਿਆ।

ਅਹਿਮਦ ਬਿਨ ਅਲੀ ਸਟੇਡੀਅਮ ’ਚ ਦੁਨੀਆ ਦੀ ਦੂਜੇ ਨੰਬਰ ਦੀ ਟੀਮ ਬੈਲਜੀਅਮ ਨੇ ਹੈਰਾਨੀ ਭਰਿਆ ਫੈਸਲਾ ਕਰਦੇ ਹੋਏ ਸ਼ੁਰੂਆਤੀ ਇਲੈਵਨ ’ਚ ਰੋਮੇਲੂ ਲੁਕਾਕੂ ਅਤੇ ਏਡੇਨ ਹੇਜਾਰਡ ਵਰਗੇ ਅਨੁਭਵੀ ਖਿਡਾਰੀਆਂ ਨੂੰ ਮੌਕਾ ਨਹੀਂ ਦਿੱਤਾ। ਟੀਮ ਨੂੰ 21 ਸਾਲਾ ਮਿਡਫੀਲਡਰ ਅਮਾਦੂ ਓਨਾਨਾ ਦੀ ਵੀ ਕਮੀ ਰੜਕੀ। 2 ਪੀਲੇ ਕਾਰਡ ਮਿਲਣ ਕਾਰਨ ਓਨਾਨਾ ਮੁਅੱਤਲ ਸੀ। ਬੈਲਜੀਅਮ ਕੋਲ ਹਾਲਾਂਕਿ ਨਿਯਮਿਤ ਸਮੇਂ ਦੇ ਆਖਰੀ 3 ਮਿੰਟਾਂ ਵਿਚ 2 ਵਾਰ ਗੋਲ ਦਾਗਨ ਦਾ ਸੁਨਹਿਰੀ ਮੌਕਾ ਸੀ ਪਰ ਦੋਵੇਂ ਵਾਰ ਲੁਕਾਕੂ ਖੁੰਝ ਗਏ।

ਇਹ ਖ਼ਬਰ ਵੀ ਪੜ੍ਹੋ - ਇਹ ਕ੍ਰਿਕਟਰ ਹੋ ਸਕਦੇ ਹਨ ਭਾਰਤੀ ਟੀਮ ਦੇ ਨਵੇਂ ਚੋਣਕਾਰ, BCCI ਨੇ ਮੰਗੀਆਂ ਸਨ ਅਰਜ਼ੀਆਂ

ਦੋਹਾ ਦੇ ਅਲ ਥੁਮਾਮਾ ਸਟੇਡੀਅਮ ਵਿਚ ਦੁਨੀਆ ਦੀ 22ਵੇਂ ਨੰਬਰ ਦੀ ਟੀਮ ਮੋਰੱਕੋ ਨੇ ਹਾਕਿਮ ਜਿਯੇਚ (ਚੌਥੇ ਮਿੰਟ) ਅਤੇ ਯੂਸੁਫ ਐਨ ਨੇਸਰੀ (23ਵੇਂ ਮਿੰਟ) ਦੇ ਪਹਿਲੇ ਹਾਫ ’ਚ ਦਾਗੇ ਗੋਲ ਨਾਲ 1986 ਤੋਂ ਬਾਅਦ ਪਹਿਲੀ ਵਾਰ ਨਾਕਆਊਟ ਪੜਾਅ ’ਚ ਪ੍ਰਵੇਸ਼ ਕੀਤਾ। ਕੈਨੇਡਾ ਦਾ ਗੋਲ ਨੋਏਫ ਐਗਵੇਰਡ (40ਵੇਂ ਮਿੰਟ) ਵੱਲੋਂ ਆਇਆ, ਜਿਸ ਨੇ ਗੋਲ ਦਾਗਿਆ। ਮੋਰੱਕੋ ਅਤੇ ਕੈਨੇਡਾ ਦੀ ਟੀਮ ਇਸ ਤੋਂ ਪਹਿਲਾਂ ਸਿਰਫ ਇਕ ਵਾਰ ਇਕ-ਦੂਜੇ ਦੇ ਆਹਮੋ-ਸਾਹਮਣੇ ਸਨ। ਮੋਰੱਕੋ ਨੇ 2016 ਵਿਚ ਫਰੈਂਡਲੀ ਮੈਚ ’ਚ 4-0 ਨਾਲ ਜਿੱਤ ਦਰਜ ਕੀਤੀ ਸੀ। ਇਸ ਜਿੱਤ ਦੀ ਬਦੌਲਤ ਮੋਰੱਕੋ ਦੀ ਟੀਮ 3 ਮੈਚਾਂ ’ਚ 2 ਜਿੱਤ ਅਤੇ ਇਕ ਡਰਾਅ ਨਾਲ 7 ਅੰਕਾਂ ਜੁਟਾ ਕੇ ਚੋਟੀ ’ਤੇ ਰਹੀ।

4 ਸਾਲ ਪਹਿਲਾਂ ਫਾਈਨਲ 'ਚ ਪਹੁੰਚਣ ਵਾਲੇ ਕ੍ਰੋਏਸ਼ੀਆ ਇਕ ਜਿੱਤ ਅਤੇ 2 ਡਰਾਅ ਨਾਲ 5 ਅੰਕ ਜੁਟਾ ਕੇ ਗਰੁੱਪ-ਐੱਫ ਨਾਲ ਅੰਤਿਮ 16 ’ਚ ਜਗ੍ਹਾ ਬਣਾਉਣ ਵਾਲੀ ਦੂਜੀ ਟੀਮ ਬਣਿਆ। ਰੂਸ ਵਿਚ 2018 ਵਿਚ ਹੋਏ ਪਿਛਲੇ ਵਿਸ਼ਵ ਕੱਪ ਵਿਚ ਤੀਜੇ ਸਥਾਨ ’ਤੇ ਰਿਹਾ ਬੈਲਜੀਅਮ ਇਕ ਜਿੱਤ, ਇਕ ਡਰਾਅ ਅਤੇ ਇਕ ਹਾਰ ਨਾਲ 4 ਅੰਕ ਜੁਟਾ ਕੇ ਤੀਜੇ ਸਥਾਨ ’ਤੇ ਰਿਹਾ। ਅੰਤਿਮ ਮੈਚ ਤੋਂ ਪਹਿਲਾਂ ਹੀ ਟੂਰਨਾਮੈਂਟ ਤੋਂ ਬਾਹਰ ਹੋ ਚੁੱਕਾ ਕੈਨੇਡਾ ਕੋਈ ਵੀ ਅੰਕ ਨਹੀਂ ਜੁਟਾ ਸਕਿਆ ਅਤੇ ਆਖਰੀ ਸਥਾਨ ’ਤੇ ਰਿਹਾ। ਮੋਰੱਕੋ ਦਾ ਸਾਹਮਣਾ ਹੁਣ 5 ਦਸੰਬਰ ਨੂੰ ਹੋਣ ਵਾਲੇ ਪ੍ਰੀ-ਕੁਆਰਟਰ ਫਾਈਨਲ ਵਿਚ ਗਰੁੱਪ-ਈ ’ਚ ਦੂਜੇ ਸਥਾਨ ’ਤੇ ਰਹਿਣ ਵਾਲੀ ਟੀਮ ਨਾਲ ਹੋਵੇਗਾ, ਜਦੋਂਕਿ ਇਸੇ ਦਿਨ ਕ੍ਰੋਏਸ਼ੀਆ ਦੀ ਟੀਮ ਗਰੁੱਪ-ਈ ’ਚ ਚੋਟੀ ’ਤੇ ਰਹਿਣ ਵਾਲੀ ਟੀਮ ਨਾਲ ਭਿੜੇਗੀ।

ਨੋਟ - ਇਸ ਖ਼ਬਰ ਬਾਰੇ ਕੁਮੈਂਟ ਬਾਕਸ ਵਿਚ ਦਿਓ ਆਪਣੀ ਰਾਏ।