ਹਾਰ ਤੋਂ ਬਾਅਦ ਮੀਰਾ ਐਂਡਰੀਵਾ ਨੇ ਆਪਾ ਗੁਆਇਆ ; ਰੈਕੇਟ ਤੋੜਿਆ ਅਤੇ ਦਰਸ਼ਕਾਂ ''ਤੇ ਚੀਕੀ

ਇੰਡੀਅਨ ਵੇਲਜ਼ (ਕੈਲੀਫੋਰਨੀਆ) : ਬੀਐੱਨਪੀ ਪਰਿਬਾਸ ਇੰਡੀਅਨ ਵੇਲਜ਼ ਟੈਨਿਸ ਟੂਰਨਾਮੈਂਟ ਵਿੱਚ ਉਸ ਸਮੇਂ ਹੰਗਾਮਾ ਹੋ ਗਿਆ ਜਦੋਂ ਮੌਜੂਦਾ ਚੈਂਪੀਅਨ ਮੀਰਾ ਐਂਡਰੀਵਾ ਮਹਿਲਾ ਸਿੰਗਲਜ਼ ਦੇ ਤੀਜੇ ਦੌਰ ਵਿੱਚ ਹਾਰਨ ਤੋਂ ਬਾਅਦ ਆਪਣਾ ਆਪਾ ਗੁਆ ਬੈਠੀ। ਐਂਡਰੀਵਾ ਨੂੰ ਗੈਰ-ਵਰਗੀਕ੍ਰਿਤ ਖਿਡਾਰਨ ਕੈਟੇਰੀਨਾ ਸਿਨੀਆਕੋਵਾ ਹੱਥੋਂ 4-6, 6-7(5), 6-3 ਨਾਲ ਸ਼ਿਕਸਤ ਦਾ ਸਾਹਮਣਾ ਕਰਨਾ ਪਿਆ।

ਨਿਯਮਾਂ ਦੀ ਉਲੰਘਣਾ ਅਤੇ ਮਾੜਾ ਵਿਵਹਾਰ 
ਮੈਚ ਦੌਰਾਨ ਮੀਰਾ ਐਂਡਰੀਵਾ ਦਾ ਵਿਵਹਾਰ ਕਾਫ਼ੀ ਖ਼ਰਾਬ ਰਿਹਾ। ਦੂਜੇ ਸੈੱਟ ਦਾ ਟਾਈਬ੍ਰੇਕਰ ਹਾਰਨ ਤੋਂ ਬਾਅਦ, ਉਸ ਨੇ ਗੁੱਸੇ ਵਿੱਚ ਆਪਣਾ ਰੈਕੇਟ ਸੁੱਟ ਕੇ ਤੋੜ ਦਿੱਤਾ, ਜੋ ਕਿ ਖੇਡ ਨਿਯਮਾਂ ਦੀ ਸਪੱਸ਼ਟ ਉਲੰਘਣਾ ਸੀ। ਇੰਨਾ ਹੀ ਨਹੀਂ, ਮੈਚ ਪੁਆਇੰਟ ਤੋਂ ਬਾਅਦ ਵੀ ਉਸ ਨੇ ਮੁੜ ਆਪਣਾ ਰੈਕੇਟ ਸੁੱਟਿਆ। ਹਾਲਾਂਕਿ ਉਹ ਨੈੱਟ 'ਤੇ ਜਾ ਕੇ ਸਿਨੀਆਕੋਵਾ ਨਾਲ ਹੱਥ ਮਿਲਾਉਣ ਗਈ, ਪਰ ਉਸ ਤੋਂ ਤੁਰੰਤ ਬਾਅਦ ਉਹ ਦਰਸ਼ਕਾਂ ਵੱਲ ਇਸ਼ਾਰੇ ਕਰਦੀ ਅਤੇ ਚੀਕਦੀ ਹੋਈ ਕੋਰਟ ਤੋਂ ਬਾਹਰ ਚਲੀ ਗਈ।

ਐਂਡਰੀਵਾ ਨੇ ਮੰਗੀ ਮੁਆਫੀ 
ਇਸ ਘਟਨਾ ਤੋਂ ਬਾਅਦ ਮੀਰਾ ਐਂਡਰੀਵਾ ਨੇ ਆਪਣੇ ਵਿਵਹਾਰ 'ਤੇ ਅਫਸੋਸ ਪ੍ਰਗਟਾਇਆ ਹੈ। ਉਸ ਨੇ ਕਿਹਾ, "ਮੈਂ ਆਪਣੇ ਵਿਵਹਾਰ ਤੋਂ ਬਿਲਕੁਲ ਵੀ ਖੁਸ਼ ਨਹੀਂ ਹਾਂ ਅਤੇ ਅੰਤ ਵਿੱਚ ਜੋ ਮੈਂ ਕੀਤਾ, ਉਸ 'ਤੇ ਮੈਨੂੰ ਮਾਣ ਨਹੀਂ ਹੈ"। ਉਸ ਨੇ ਇਹ ਵੀ ਮੰਨਿਆ ਕਿ ਉਸ ਨੂੰ ਅਜਿਹੀਆਂ ਚੀਜ਼ਾਂ 'ਤੇ ਜਲਦੀ ਤੋਂ ਜਲਦੀ ਕੰਮ ਕਰਨ ਦੀ ਲੋੜ ਹੈ।