IND vs ENG T20 ਸੀਰੀਜ਼ ਖਤਮ ਹੋਣ ਤੋਂ ਅਗਲੇ ਦਿਨ ਹਟਾ ''ਤਾ ਮੁੱਖ ਕੋਚ! ECB ਨੇ ਲਿਆ ਵੱਡਾ ਫੈਸਲਾ

ਲੰਡਨ : ਇੰਗਲੈਂਡ ਅਤੇ ਵੇਲਜ਼ ਕ੍ਰਿਕਟ ਬੋਰਡ (ECB) ਨੇ ਐਤਵਾਰ ਨੂੰ ਇੱਕ ਅਹਿਮ ਐਲਾਨ ਕਰਦਿਆਂ ਦੱਸਿਆ ਕਿ ਬ੍ਰੈਂਡਨ ਮੈਕੁਲਮ ਹੁਣ ਇੰਗਲੈਂਡ ਦੀ ਪੁਰਸ਼ ਟੈਸਟ ਟੀਮ ਦੇ ਮੁੱਖ ਕੋਚ ਨਹੀਂ ਰਹਿਣਗੇ। ਹਾਲਾਂਕਿ, ਉਹ ਵਾਈਟ-ਬਾਲ (ਵਨਡੇ ਅਤੇ ਟੀ-20) ਟੀਮਾਂ ਦੇ ਮੁੱਖ ਕੋਚ ਵਜੋਂ ਆਪਣੀਆਂ ਸੇਵਾਵਾਂ ਜਾਰੀ ਰੱਖਣਗੇ। 

ਇਹ ਵੱਡਾ ਬਦਲਾਅ ਅਜਿਹੇ ਸਮੇਂ ਆਇਆ ਹੈ ਜਦੋਂ ਇੰਗਲੈਂਡ ਦੇ ਟੈਸਟ ਕਪਤਾਨ ਬੇਨ ਸਟੋਕਸ ਨੇ ਅੰਤਰਰਾਸ਼ਟਰੀ ਕ੍ਰਿਕਟ ਤੋਂ ਸੰਨਿਆਸ ਲੈ ਲਿਆ ਹੈ। ਇਸ ਤੋਂ ਇਲਾਵਾ, ਇੱਕ ਨਾਈਟ ਕਲੱਬ ਵਿੱਚ ਹੋਏ ਵਿਵਾਦ ਕਾਰਨ ਸਟੋਕਸ 'ਤੇ ਇੱਕ ਟੈਸਟ ਮੈਚ ਦੀ ਪਾਬੰਦੀ ਵੀ ਲੱਗੀ ਸੀ, ਜਿਸ ਤੋਂ ਤੁਰੰਤ ਬਾਅਦ ਬੋਰਡ ਨੇ ਕੋਚਿੰਗ ਸਟਾਫ ਵਿੱਚ ਬਦਲਾਅ ਕਰਨ ਦਾ ਫੈਸਲਾ ਲਿਆ। ਮੈਕੁਲਮ ਦੇ ਬਿਆਨ ਤੋਂ ਸੰਕੇਤ ਮਿਲਦਾ ਹੈ ਕਿ ਇਹ ਫੈਸਲਾ ਉਨ੍ਹਾਂ ਦੀ ਆਪਣੀ ਮਰਜ਼ੀ ਦੀ ਬਜਾਏ ਬੋਰਡ ਦੇ ਫੈਸਲੇ ਦਾ ਨਤੀਜਾ ਹੈ।

ਆਪਣੇ ਅਹੁਦੇ ਤੋਂ ਹਟਣ 'ਤੇ ਮੈਕੁਲਮ ਨੇ ਨਿਰਾਸ਼ਾ ਜ਼ਾਹਿਰ ਕਰਦਿਆਂ ਕਿਹਾ, "ਮੈਨੂੰ ਅੱਗੇ ਟੈਸਟ ਟੀਮ ਨਾਲ ਨਾ ਜੁੜੇ ਰਹਿਣ ਦਾ ਅਫਸੋਸ ਹੈ, ਪਰ ਮੈਂ ਬੋਰਡ ਦੇ ਫੈਸਲੇ ਦਾ ਸਤਿਕਾਰ ਕਰਦਾ ਹਾਂ। ਹੁਣ ਮੇਰਾ ਪੂਰਾ ਧਿਆਨ ਸੀਮਿਤ ਓਵਰਾਂ ਦੀਆਂ ਟੀਮਾਂ 'ਤੇ ਰਹੇਗਾ"। ਉਨ੍ਹਾਂ ਦੇ ਚਾਰ ਸਾਲਾਂ ਦੇ ਕਾਰਜਕਾਲ ਦੌਰਾਨ ਇੰਗਲੈਂਡ ਦੀ ਟੈਸਟ ਟੀਮ ਨੇ ਹਮਲਾਵਰ ਅਤੇ ਸਕਾਰਾਤਮਕ ਕ੍ਰਿਕਟ ਦੀ ਇੱਕ ਨਵੀਂ ਪਛਾਣ ਬਣਾਈ ਸੀ।

ਭਾਵੇਂ ਟੈਸਟ ਟੀਮ ਨੂੰ ਹਾਲ ਹੀ ਵਿੱਚ ਨਿਊਜ਼ੀਲੈਂਡ ਹੱਥੋਂ 1-2 ਨਾਲ ਹਾਰ ਦਾ ਸਾਹਮਣਾ ਕਰਨਾ ਪਿਆ, ਪਰ ਮੈਕੁਲਮ ਦੀ ਕੋਚਿੰਗ ਹੇਠ ਇੰਗਲੈਂਡ ਦੀ ਟੀ-20 ਟੀਮ ਨੇ ਸ਼ਾਨਦਾਰ ਪ੍ਰਦਰਸ਼ਨ ਕੀਤਾ ਹੈ। ਇੰਗਲੈਂਡ ਨੇ ਹਾਲ ਹੀ ਵਿੱਚ ਭਾਰਤ ਨੂੰ ਟੀ-20 ਸੀਰੀਜ਼ ਵਿੱਚ 4-0 ਨਾਲ ਕਰਾਰੀ ਹਾਰ ਦੇ ਕੇ ਦੁਨੀਆ ਦੀ ਨੰਬਰ-1 ਟੀ-20 ਟੀਮ ਬਣਨ ਦਾ ਮਾਣ ਹਾਸਲ ਕੀਤਾ ਹੈ। ਇਸੇ ਸਫ਼ਲਤਾ ਨੂੰ ਦੇਖਦੇ ਹੋਏ ਬੋਰਡ ਨੇ ਉਨ੍ਹਾਂ ਨੂੰ ਸੀਮਿਤ ਓਵਰਾਂ ਦੇ ਕੋਚ ਵਜੋਂ ਬਰਕਰਾਰ ਰੱਖਿਆ ਹੈ।