ਲੀਜੈਂਡਸ ਆਫ ਚੈੱਸ ਟੂਰਨਾਮੈਂਟ : ਆਨੰਦ ਦੀ ਲਗਾਤਾਰ 5ਵੀਂ ਹਾਰ
07/27/2020 12:49:52 AM
ਨਾਰਵੇ (ਨਿਕਲੇਸ਼ ਜੈਨ)– ਭਾਰਤੀ ਗ੍ਰੈਂਡਮਾਸਟਰ ਵਿਸ਼ਵਨਾਥਨ ਆਨੰਦ ਨੂੰ 1,50,000 ਡਾਲਰ ਦੀ ਇਨਾਮੀ ਰਾਸ਼ੀ ਵਾਲੇ ਲੀਜੈਂਡਸ ਆਫ ਚੈੱਸ ਆਨਲਾਈਨ ਟੂਰਨਾਮੈਂਟ ਵਿਚ ਹੰਗਰੀ ਦੇ ਪੀਟਰ ਲੇਕੋ ਵਿਰੁੱਧ 2-3 ਨਾਲ ਹਾਰ ਦਾ ਸਾਹਮਣਾ ਕਰਨਾ ਪਿਆ, ਜਿਹੜੀ ਉਸਦੀ ਲਗਾਤਾਰ 5ਵੀਂ ਹਾਰ ਹੈ। ਸਾਬਕਾ ਵਿਸ਼ਵ ਚੈਂਪੀਅਨ ਆਨੰਦ ਨੇ ਚੰਗੀ ਸ਼ੁਰੂਆਤ ਕਰਦੇ ਹੋਏ ਬੈਸਟ ਆਫ ਫੋਰ ਬਾਜ਼ੀ ਦੇ ਮੁਕਾਬਲੇ ਦੀ ਪਹਿਲੀ ਬਾਜ਼ੀ ਜਿੱਤੀ, ਜਿਸ ਤੋਂ ਬਾਅਦ ਅਗਲੀਆਂ ਦੋ ਬਾਜ਼ੀਆਂ ਡਰਾਅ ਰਹੀਆਂ। ਲੇਕੋ ਨੇ ਇਸ ਤੋਂ ਬਾਅਦ ਆਖਰੀ ਬਾਜ਼ੀ ਜਿੱਤ ਕੇ ਮੁਕਾਬਲਾ ਬਰਾਬਰ ਕਰ ਲਿਆ।
ਹੰਗਰੀ ਦੇ ਖਿਡਾਰੀ ਨੇ ਇਸ ਤੋਂ ਬਾਅਦ ਟਾਈਬ੍ਰੇਕ ਜਿੱਤ ਕੇ ਆਨੰਦ ਦੀ ਇਕ ਹੋਰ ਹਾਰ ਤੈਅ ਕਰ ਦਿੱਤੀ। ਆਨੰਦ ਅਜੇ ਤਕ ਕੋਈ ਮੁਕਾਬਲਾ ਨਹੀਂ ਜਿੱਤ ਸਕਿਆ ਹੈ ਤੇ ਅੰਕ ਸੂਚੀ ਵਿਚ ਆਖਰੀ ਸਥਾਨ 'ਤੇ ਚੱਲ ਰਿਹਾ ਹੈ। ਮੈਗਨਸ ਕਾਰਲਸਨ ਸ਼ਤਰੰਜ ਟੂਰ 'ਤੇ ਪਹਿਲੀ ਵਾਰ ਖੇਡ ਰਹੇ ਆਨੰਦ ਨੂੰ ਇਸ ਤੋਂ ਪਹਿਲਾਂ ਪੀਟਰ ਸਿਵਡਲਰ, ਮੈਗਨਸ ਕਾਰਲਸਨ, ਵਲਾਦੀਮਿਰ ਕ੍ਰਾਮਨਿਕ ਤੇ ਅਨੀਸ਼ ਗਿਰੀ ਵਿਰੁੱਧ ਹਾਰ ਦਾ ਸਾਹਮਣਾ ਕਰਨਾ ਪਿਆ ਸੀ। ਦੁਨੀਆ ਦੇ ਨੰਬਰ ਇਕ ਖਿਡਾਰੀ ਕਾਰਲਸਨ ਨੇ ਜ਼ੋਰਦਾਰ ਵਾਪਸੀ ਕਰਦੇ ਹੋਏ ਤਜਰਬੇਕਾਰ ਵੇਸਲੀ ਇਵਾਨਚੁਕ ਨੂੰ 3-2 ਨਾਲ ਹਰਾਇਆ।