ਏਸ਼ੀਅਨ ਕੱਪ ਕੁਆਲੀਫਾਇਰ 2027 ਦੇ ਫਾਈਨਲ ਗੇੜ ਲਈ ਭਾਰਤ ਸਖ਼ਤ ਗਰੁੱਪ ਵਿੱਚ

ਨਵੀਂ ਦਿੱਲੀ- ਭਾਰਤ ਨੂੰ ਅਗਲੇ ਸਾਲ 25 ਮਾਰਚ ਤੋਂ ਸ਼ੁਰੂ ਹੋ ਰਹੇ 2027 ਦੇ ਏਸ਼ੀਆਈ ਕੱਪ ਕੁਆਲੀਫਾਇਰ ਦੇ ਆਖ਼ਰੀ ਦੌਰ ਦੇ ਮੈਚਾਂ ਲਈ ਬੰਗਲਾਦੇਸ਼, ਹਾਂਗਕਾਂਗ ਅਤੇ ਸਿੰਗਾਪੁਰ ਦੇ ਨਾਲ ਸਖ਼ਤ ਗਰੁੱਪ ਵਿੱਚ ਰੱਖਿਆ ਗਿਆ ਹੈ। ਮਲੇਸ਼ੀਆ ਦੀ ਰਾਜਧਾਨੀ ਕੁਆਲਾਲੰਪੁਰ ਵਿੱਚ ਏਸ਼ੀਆਈ ਫੁਟਬਾਲ ਕਨਫੈਡਰੇਸ਼ਨ (ਏਐਫਸੀ) ਦੇ ਮੁੱਖ ਦਫ਼ਤਰ ਵਿੱਚ ਐਤਵਾਰ ਨੂੰ ਹੋਏ ਡਰਾਅ ਵਿੱਚ 24 ਟੀਮਾਂ ਨੂੰ ਛੇ ਗਰੁੱਪਾਂ ਵਿੱਚ ਵੰਡਿਆ ਗਿਆ ਹੈ। ਹਰ ਗਰੁੱਪ ਵਿੱਚ ਚਾਰ ਟੀਮਾਂ ਰੱਖੀਆਂ ਗਈਆਂ ਹਨ। ਹਰੇਕ ਗਰੁੱਪ ਦੀਆਂ ਜੇਤੂ ਟੀਮਾਂ 2027 ਵਿੱਚ ਸਾਊਦੀ ਅਰਬ ਵਿੱਚ ਹੋਣ ਵਾਲੇ ਟੂਰਨਾਮੈਂਟ ਵਿੱਚ ਥਾਂ ਹਾਸਲ ਕਰਨਗੀਆਂ। 

18 ਟੀਮਾਂ ਨੇ ਕੁਆਲੀਫਾਇੰਗ ਦੇ ਦੂਜੇ ਗੇੜ ਤੋਂ ਪਹਿਲਾਂ ਹੀ ਟੂਰਨਾਮੈਂਟ ਵਿੱਚ ਆਪਣੀ ਥਾਂ ਪੱਕੀ ਕਰ ਲਈ ਹੈ। ਕੁਆਲੀਫਾਇੰਗ ਦੇ ਅੰਤਿਮ ਦੌਰ ਦੇ ਮੈਚ 25 ਮਾਰਚ 2025 ਤੋਂ 31 ਮਾਰਚ 2026 ਤੱਕ ਖੇਡੇ ਜਾਣਗੇ। ਹਰ ਟੀਮ ਆਪਣੇ ਘਰੇਲੂ ਮੈਦਾਨ ਅਤੇ ਵਿਰੋਧੀ ਟੀਮ ਦੇ ਮੈਦਾਨ 'ਤੇ ਮੈਚ ਖੇਡੇਗੀ। ਲਗਾਤਾਰ ਤੀਜੀ ਵਾਰ ਕੁਆਲੀਫਾਈ ਕਰਨ ਦੇ ਟੀਚੇ ਨਾਲ ਭਾਰਤ ਗਰੁੱਪ ਸੀ 'ਚ ਬੰਗਲਾਦੇਸ਼ ਖਿਲਾਫ ਘਰੇਲੂ ਜ਼ਮੀਨ 'ਤੇ ਆਪਣੀ ਮੁਹਿੰਮ ਦੀ ਸ਼ੁਰੂਆਤ ਕਰੇਗਾ। ਭਾਰਤ ਗਰੁੱਪ 'ਚ ਸਭ ਤੋਂ ਉੱਚੀ ਰੈਂਕਿੰਗ ਵਾਲੀ ਟੀਮ 127ਵੇਂ ਸਥਾਨ 'ਤੇ ਹੈ। ਉਸ ਤੋਂ ਬਾਅਦ ਹਾਂਗਕਾਂਗ (156), ਸਿੰਗਾਪੁਰ (161) ਅਤੇ ਬੰਗਲਾਦੇਸ਼ (185) ਦਾ ਨੰਬਰ ਆਉਂਦਾ ਹੈ। ਪਰ, ਉਹ ਆਸਾਨ ਵਿਰੋਧੀ ਨਹੀਂ ਹੋਣਗੇ। 

25 ਮਾਰਚ 2025 ਨੂੰ ਬੰਗਲਾਦੇਸ਼ ਦੇ ਖਿਲਾਫ ਆਪਣੀ ਧਰਤੀ 'ਤੇ ਪਹਿਲਾ ਮੈਚ ਖੇਡਣ ਤੋਂ ਬਾਅਦ, ਭਾਰਤ 10 ਜੂਨ 2025 ਨੂੰ ਆਪਣੇ ਘਰੇਲੂ ਮੈਦਾਨ 'ਤੇ ਹਾਂਗਕਾਂਗ ਦੇ ਖਿਲਾਫ ਮੈਚ ਖੇਡੇਗਾ। ਭਾਰਤੀ ਟੀਮ ਸਿੰਗਾਪੁਰ ਦੇ ਖਿਲਾਫ 9 ਅਕਤੂਬਰ 2025 ਨੂੰ ਆਪਣੇ ਘਰੇਲੂ ਮੈਦਾਨ 'ਤੇ ਅਤੇ 14 ਅਕਤੂਬਰ 2025 ਨੂੰ ਵਿਦੇਸ਼ੀ ਮੈਦਾਨ 'ਤੇ ਮੈਚ ਖੇਡੇਗੀ। ਭਾਰਤੀ ਟੀਮ ਫਿਰ 18 ਨਵੰਬਰ 2025 ਨੂੰ ਮੈਚ ਲਈ ਬੰਗਲਾਦੇਸ਼ ਦਾ ਦੌਰਾ ਕਰੇਗੀ ਅਤੇ ਫਿਰ 31 ਮਾਰਚ 2026 ਨੂੰ ਆਪਣੇ ਘਰੇਲੂ ਮੈਦਾਨ 'ਤੇ ਹਾਂਗਕਾਂਗ ਵਿਰੁੱਧ ਫਾਈਨਲ ਮੈਚ ਖੇਡੇਗੀ।