ਓਮਾਨ ਲਈ ਇਤਿਹਾਸਕ ਪਲ ਹੋਵੇਗਾ ਟੀ20 ਵਿਸ਼ਵ ਕੱਪ ਦੀ ਮੇਜ਼ਬਾਨੀ ਕਰਨਾ: ਪੰਕਜ ਖਿਮਜੀ

ਮੁੰਬਈ (ਭਾਸ਼ਾ) : ਓਮਾਨ ਕ੍ਰਿਕਟ ਸੰਘ ਦੇ ਪ੍ਰਧਾਨ ਪੰਕਜ ਖਿਮਜੀ ਨੇ ਕਿਹਾ ਹੈ ਕਿ ਅਕਤੂਬਰ ਵਿਚ ਟੀ20 ਵਿਸ਼ਵ ਕੱਪ ਦੀ ਸਹਿ ਮੇਜ਼ਬਾਨੀ ਕਰਨਾ ਓਮਾਨ ਕ੍ਰਿਕਟ ਲਈ ਹੀ ਨਹੀਂ ਸਗੋਂ ਦੇਸ਼ ਲਈ ਵੀ ਇਤਿਹਾਸਕ ਪਲ ਹੋਵੇਗਾ। ਟੀ20 ਵਿਸ਼ਵ ਕੱਪ 17 ਅਕਤੂਬਰ ਤੋਂ 14 ਨਵੰਬਰ ਤੱਕ ਸੰਯੁਕਤ ਅਰਬ ਅਮੀਰਾਤ ਅਤੇ ਓਮਾਨ ਵਿਚ ਖੇਡਿਆ ਜਾਏਗਾ। ਖਿਮਜੀ ਨੇ ਕਿਹਾ, ‘ਓਮਾਨ ਦੇ ਸਾਹਮਣੇ ਦੁਨੀਆ ਨੂੰ ਦਿਖਾਉਣ ਦਾ ਇਹ ਸੁਨਹਿਰੀ ਮੌਕਾ ਹੈ ਕਿ ਸੈਰ-ਸਪਾਟੇ ਦੀ ਦ੍ਰਿਸ਼ਟੀ ਤੋਂ ਇਹ ਕਿੰਨਾ ਖ਼ੁਸ਼ਹਾਲ ਹੈ। ਲੋਕਾਂ ਨੂੰ ਓਮਾਨ ਦੇ ਬਾਰੇ ਵਿਚ ਜ਼ਿਆਦਾ ਪਤਾ ਨਹੀਂ ਹੈ ਅਤੇ ਅਸੀਂ ਇਸ ਟੂਰਨਾਮੈਂਟ ਜ਼ਰੀਏ ਦੁਨੀਆ ਦੇ ਸਾਹਮਣੇ ਓਮਾਨ ਨੂੰ ਪੇਸ਼ ਕਰਾਂਗੇ।’ ਉਨ੍ਹਾਂ ਕਿਹਾ ਕਿ 3000 ਦਰਸ਼ਕਾਂ ਦੀ ਮੌਜੂਦਗੀ ਲਈ ਬੰਦੋਬਸਤ ਕੀਤੇ ਗਏ ਹਨ।

ਇਹ ਵੀ ਪੜ੍ਹੋ: ਪੈਰਾਲੰਪਿਕ ਜੇਤੂਆਂ ਦਾ ਭਾਰਤ ਪੁੱਜਣ ’ਤੇ ਅਵਿਨਾਸ਼ ਰਾਏ ਖੰਨਾ ਵੱਲੋਂ ਸੁਆਗਤ, ਕਿਹਾ-19 ਤਮਗੇ ਜਿੱਤ ਸਿਰਜਿਆ ਇਤਿਹਾਸ

ਉਨ੍ਹਾਂ ਅੱਗੇ ਕਿਹਾ, ‘ਓਮਾਨ ਕੋਲ ਸੁੰਦਰ ਹਰਾ ਭਰਿਆ ਮੈਦਾਨ ਹੈ। ਅਸੀਂ 3000 ਦਰਸ਼ਕਾਂ ਲਈ ਇੰਤਜ਼ਾਮ ਕਰ ਰਹੇ ਹਾਂ, ਜਿਨ੍ਹਾਂ ਵਿਚੋਂ 500 ਕਾਰਪੋਰੇਟ ਬਕਸੇ ਵਿਚ ਹੋਣਗੇ। ਅਸੀਂ ਖ਼ੂਬਸੂਰਤ ਪ੍ਰੈਸ ਬਾਕਸ ਅਤੇ ਮੀਡੀਆ ਸੈਂਟਰ ਵੀ ਬਣਾ ਰਹੇ ਹਾਂ। ਸਾਡੇ ਲਈ ਇਹ ਸਿੱਖਣ ਦਾ ਮੌਕਾ ਹੈ।’ ਖਿਮਜੀ ਨੇ ਕਿਹਾ ਕਿ ਇਹ ਸਧਾਰਨ ਵਿਸ਼ਵ ਕੱਪ ਨਹੀਂ ਹੋਵੇਗਾ, ਕਿਉਂਕਿ ਇਹ ਕੋਰੋਨਾ ਕਾਲ ਵਿਚ ਹੋ ਰਿਹਾ ਹੈ। ਉਨ੍ਹਾਂ ਕਿਹਾ, ‘ਸਾਨੂੰ ਜੈਵ ਸੁਰੱਖਿਅਤ ਪ੍ਰੋਟੋਕਾਲ ਬਣਾਉਣੇ ਹੋਣਗੇ। ਇਹ ਸਧਾਰਨ ਵਿਸ਼ਵ ਕੱਪ ਨਹੀਂ ਹੈ। ਇਹ ਕੋਰੋਨਾ ਕਾਲ ਵਿਚ ਹੋ ਰਿਹਾ ਹੈ ਅਤੇ ਵੱਖ ਤਰ੍ਹਾਂ ਦਾ ਹੈ। ਇਹ ਵੱਡੀ ਚੁਣੌਤੀ ਹੈ ਪਰ ਇਸ ਵਿਚ ਮਜ਼ਾ ਆ ਰਿਹਾ ਹੈ।’

ਇਹ ਵੀ ਪੜ੍ਹੋ: ਪੈਰਾਲੰਪਿਕ ਚਾਂਦੀ ਤਮਗਾ ਜੇਤੂ ਨਿਸ਼ਾਦ ਕੁਮਾਰ ਨੂੰ ਹਿਮਾਚਲ ਦੇ ਰਾਜਪਾਲ ਅਤੇ ਮੁੱਖ ਮੰਤਰੀ ਨੇ ਕੀਤਾ ਸਨਮਾਨਿਤ

ਉਨ੍ਹਾਂ ਕਿਹਾ, ‘ਬੀ.ਬੀ.ਸੀ.ਆਈ. ਮੇਜ਼ਬਾਨ ਹੈ। ਅਸੀਂ ਤਿੰਨ-ਪੱਖੀ ਸਮਝੌਤਾ ਕੀਤਾ ਹੈ ਅਤੇ ਓਮਾਨ ਸਰਕਾਰ ਸਾਡੀ ਰੱਖਿਅਕ ਹੈ। ਓਮਾਨ ਸਰਕਾਰ ਇਸ ਦੇ ਆਯੋਜਨ ਵਿਚ ਪੂਰੀ ਮਦਦ ਕਰ ਰਹੀ ਹੈ ਅਤੇ ਅਸੀਂ ਮਿੰਟਾਂ ਵਿਚ 30 ਤੋਂ 40 ਵੀਜ਼ਾ ਜਾਰੀ ਕਰ ਰਹੇ ਹਾਂ। ਆਈ.ਸੀ.ਸੀ. ਕਾਫ਼ੀ ਮਦਦ ਕਰ ਰਹੀ ਹੈ।’

ਨੋਟ : ਇਸ ਖ਼ਬਰ ਬਾਰੇ ਕੀ ਹੈ ਤੁਹਾਡੀ ਰਾਏ, ਕੁਮੈਂਟ ਕਰਕੇ ਦਿਓ ਜਵਾਬ।