ਹੈਰੀ ਕੇਨ ਨੇ ਚਾਰ ਗੋਲ ਕਰਕੇ ਵੈਨ ਰੂਨੀ ਦਾ ਤੋੜਿਆ ਰਿਕਾਰਡ

ਮਿਊਨਿਖ : ਹੈਰੀ ਕੇਨ ਨੇ ਬਾਇਰਨ ਮਿਊਨਿਖ ਦੀ ਡਿਨਾਮੋ ਜ਼ਾਗਰੇਬ ਉੱਤੇ ਧਮਾਕੇਦਾਰ ਜਿੱਤ ਵਿੱਚ ਚਾਰ ਗੋਲ ਕੀਤੇ, ਜਿਸ ਨਾਲ ਉਹ ਵੈਨ ਰੂਨੀ ਦਾ ਰਿਕਾਰਡ ਤੋੜਕੇ ਚੈਂਪੀਅਨਜ਼ ਲੀਗ ਫੁੱਟਬਾਲ ਮੁਕਾਬਲੇ ਵਿੱਚ ਸਭ ਤੋਂ ਜ਼ਿਆਦਾ ਗੋਲ ਕਰਨ ਵਾਲੇ ਇੰਗਲਿਸ਼ ਖਿਡਾਰੀ ਬਣ ਗਏ।  ਕੇਨ ਦੇ ਸ਼ਾਨਦਾਰ ਪ੍ਰਦਰਸ਼ਨ ਨਾਲ ਬਾਇਰਨ ਨੇ ਡਿਨਾਮੋ ਜ਼ਾਗਰੇਬ ਨੂੰ 9-2 ਨਾਲ ਕਰਾਰੀ ਹਾਰ ਦਿੱਤੀ। ਇਹ 2016 ਤੋਂ ਬਾਅਦ ਪਹਿਲੀ ਵਾਰ ਸੀ ਜਦੋਂ ਚੈਂਪੀਅਨਜ਼ ਲੀਗ ਦੇ ਕਿਸੇ ਇਕ ਮੈਚ ਵਿੱਚ ਇੰਨੇ ਜ਼ਿਆਦਾ ਗੋਲ ਹੋਏ ਸਨ। ਇਸ ਨਾਲ ਬਾਇਰਨ ਦੇ ਨਵੇਂ ਕੋਚ ਵਿਂਸੈਂਟ ਕੋਮਪਨੀ ਨੇ ਯੂਰਪੀ ਮੁਕਾਬਲੇ ਵਿੱਚ ਆਪਣੀ ਮੁਹਿੰਮ ਦੀ ਸ਼ਾਨਦਾਰ ਸ਼ੁਰੂਆਤ ਵੀ ਕੀਤੀ।
ਕੇਨ ਨੇ 19ਵੇਂ, 53ਵੇਂ, 73ਵੇਂ ਅਤੇ 78ਵੇਂ ਮਿੰਟ ਵਿੱਚ ਗੋਲ ਕਰਕੇ ਮੁਕਾਬਲੇ ਵਿੱਚ ਆਪਣੇ ਕੁੱਲ ਗੋਲਾਂ ਦੀ ਗਿਣਤੀ 33 ਤੱਕ ਪਹੁੰਚਾ ਲਈ, ਜੋ ਇੰਗਲੈਂਡ ਦੇ ਕਿਸੇ ਖਿਡਾਰੀ ਦਾ ਨਵਾਂ ਰਿਕਾਰਡ ਹੈ। ਉਨ੍ਹਾਂ ਨੇ ਰੂਨੀ ਦੇ 30 ਗੋਲਾਂ ਦੇ ਰਿਕਾਰਡ ਨੂੰ ਪਿੱਛੇ ਛੱਡ ਦਿੱਤਾ। ਕੇਨ ਨੇ ਤਿੰਨ ਗੋਲ ਪੈਨਲਟੀ 'ਤੇ ਕੀਤੇ। ਮੈਚ ਤੋਂ ਬਾਅਦ ਉਨ੍ਹਾਂ ਨੇ ਕਿਹਾ, "ਈਮਾਨਦਾਰੀ ਨਾਲ ਕਹਾਂ ਤਾਂ ਦੂਜੀ ਪੈਨਲਟੀ ਦੇ ਬਾਅਦ ਮੈਨੂੰ ਪਤਾ ਨਹੀਂ ਸੀ ਕਿ ਤੀਜੀ ਪੈਨਲਟੀ 'ਤੇ ਕੀ ਕਰਨਾ ਹੈ, ਪਰ ਮੈਨੂੰ ਖੁਸ਼ੀ ਹੈ ਕਿ ਮੈਂ ਇਸ 'ਤੇ ਵੀ ਗੋਲ ਕਰਨ ਵਿੱਚ ਸਫਲ ਹੋ ਗਿਆ।'' ਬੋਰੂਸੀਆ ਡਾਰਟਮੁੰਡ ਦੀ 2016 ਵਿੱਚ ਲੇਗੀਆ ਵਾਰਸਾ 'ਤੇ 8-4 ਦੀ ਜਿੱਤ ਤੋਂ ਬਾਅਦ ਇਹ ਚੈਂਪੀਅਨਜ਼ ਲੀਗ ਵਿੱਚ ਸਭ ਤੋਂ ਵੱਧ ਗੋਲਾਂ ਵਾਲਾ ਮੈਚ ਸੀ।