ਗੌਫ ਨੇ ਸਵਿਆਟੇਕ ਨੂੰ ਹਰਾ ਕੇ ਡਬਲਯੂਟੀਏ ਸੈਮੀਫਾਈਨਲ ''ਚ ਕੀਤਾ ਪ੍ਰਵੇਸ਼

ਰਿਆਦ- ਅਮਰੀਕਾ ਦੀ ਮਹਿਲਾ ਟੈਨਿਸ ਸਟਾਰ ਕੋਕੋ ਗੌਫ ਨੇ ਡਬਲਯੂ.ਟੀ.ਏ. ਫਾਈਨਲ 'ਚ ਮੌਜੂਦਾ ਚੈਂਪੀਅਨ ਇਗਾ ਸਵਿਆਟੇਕ ਨੂੰ ਸਿੱਧੇ ਸੈੱਟਾਂ 'ਚ ਹਰਾ ਕੇ ਸੈਮੀਫਾਈਨਲ 'ਚ ਜਗ੍ਹਾ ਬਣਾ ਲਈ ਹੈ। ਮੰਗਲਵਾਰ ਨੂੰ ਹੋਏ ਆਰੇਂਜ ਗਰੁੱਪ ਸਿੰਗਲਜ਼ ਦੇ ਦੂਜੇ ਗੇੜ ਦੇ ਮੈਚ ਵਿੱਚ, ਦੋਵੇਂ ਖਿਡਾਰੀਆਂ ਨੇ ਪਹਿਲੇ ਸੈੱਟ ਵਿੱਚ 3-3 ਦੀ ਬਰਾਬਰੀ ਕੀਤੀ। ਇਸ ਤੋਂ ਬਾਅਦ ਗੌਫ ਨੇ ਲਗਾਤਾਰ ਦੋ ਵਾਰ ਸਵਿਆਟੇਕ ਦੀ ਸਰਵਿਸ ਤੋੜੀ ਅਤੇ ਪਹਿਲਾ ਸੈੱਟ 6-3 ਨਾਲ ਜਿੱਤ ਲਿਆ। 

ਦੂਜੇ ਸੈੱਟ ਵਿੱਚ ਦੋਵਾਂ ਖਿਡਾਰੀਆਂ ਨੇ ਪਹਿਲੇ ਅੱਠ ਗੇਮਾਂ ਵਿੱਚ ਦੋ ਵਾਰ ਇੱਕ ਦੂਜੇ ਦੀ ਸਰਵਿਸ ਤੋੜੀ ਅਤੇ ਸਕੋਰ 4-4 ਤੱਕ ਪਹੁੰਚ ਗਿਆ। ਇਸ ਤੋਂ ਬਾਅਦ ਗੌਫ ਨੇ ਇਕ ਵਾਰ ਫਿਰ ਸਵਿਆਟੇਕ ਦੀ ਸਰਵਿਸ ਤੋੜ ਕੇ ਸੈੱਟ 6-4 ਨਾਲ ਜਿੱਤ ਲਿਆ। ਮੈਚ ਤੋਂ ਬਾਅਦ ਗੌਫ ਨੇ ਕਿਹਾ, ''ਇਹ ਯਕੀਨੀ ਤੌਰ 'ਤੇ ਅੱਜ ਮੇਰੇ ਲਈ ਚੰਗਾ ਮੈਚ ਸੀ। ਤੁਸੀਂ ਜਾਣਦੇ ਹੋ ਕਿ ਮੇਰੇ ਲਈ ਇਗਾ ਨਾਲ ਖੇਡਣਾ ਮੁਸ਼ਕਲ ਹੈ, ਪਰ ਮੈਂ ਸੱਚਮੁੱਚ ਖੁਸ਼ ਹਾਂ ਕਿ ਮੈਂ ਪੂਰਾ ਮੈਚ ਖੇਡਣ ਵਿਚ ਕਾਮਯਾਬ ਰਹੀ।'' ਇਕ ਹੋਰ ਮੈਚ ਵਿਚ ਚੈੱਕ ਗਣਰਾਜ ਦੀ ਬਾਰਬੋਰਾ ਕ੍ਰੇਜਿਕੋਵਾ ਨੇ ਅਮਰੀਕਾ ਦੀ ਜੈਸਿਕਾ ਪੇਗੁਲਾ ਨੂੰ ਇਕ ਘੰਟਾ 9 ਮਿੰਟ ਤਕ ਚਲੇ ਮੈਚ  ਵਿਚ 6-3, 6-3 ਨਾਲ ਹਰਾਇਆ।