ਫਾਤਿਮਾ ਸਨਾ ਹੋਵੇਗੀ ਮਹਿਲਾ ਟੀ-20 ਵਿਸ਼ਵ ਕੱਪ ਲਈ ਪਾਕਿਸਤਾਨ ਦੀ ਕਪਤਾਨ

ਕਰਾਚੀ- ਪਾਕਿਸਤਾਨ ਕ੍ਰਿਕਟ ਬੋਰਡ (ਪੀ.ਸੀ.ਬੀ.) ਨੇ 22 ਸਾਲਾਂ ਫਾਤਿਮਾ ਸਨਾ ਨੂੰ ਤਿੰਨ ਤੋਂ 20 ਅਕਤੂਬਰ ਤੱਕ ਸੰਯੁਕਤ ਅਰਬ ਅਮੀਰਾਤ 'ਚ ਹੋਣ ਵਾਲੇ ਆਗਾਮੀ ਮਹਿਲਾ ਟੀ-20 ਵਿਸ਼ਵ ਕੱਪ ਲਈ ਨਿਦਾ ਡਾਰ ਦੀ ਜਗ੍ਹਾ ਕਪਤਾਨ ਨਿਯੁਕਤ ਕੀਤਾ ਹੈ। ਨਿਦਾ (37 ਸਾਲ) ਇਸ ਸਮੇਂ ਖਰਾਬ ਫਾਰਮ 'ਚੋਂ ਗੁਜ਼ਰ ਰਹੀ ਹੈ। ਉਨ੍ਹਾਂ ਦੀ ਅਗਵਾਈ ਵਾਲੀ ਟੀਮ ਨੂੰ ਇੰਗਲੈਂਡ 'ਚ ਟੀ-20 ਅਤੇ ਵਨਡੇ ਸੀਰੀਜ਼ 'ਚ ਹਾਰ ਦਾ ਸਾਹਮਣਾ ਕਰਨਾ ਪਿਆ ਸੀ ਅਤੇ ਪਿਛਲੇ ਮਹੀਨੇ ਮਹਿਲਾ ਏਸ਼ੀਆ ਕੱਪ ਦੇ ਸੈਮੀਫਾਈਨਲ 'ਚ ਵੀ ਹਾਰ ਦਾ ਸਾਹਮਣਾ ਕਰਨਾ ਪਿਆ ਸੀ।
ਚੋਣਕਾਰਾਂ ਨੇ ਹਾਲਾਂਕਿ ਨਿਦਾ ਨੂੰ ਟੀਮ ਵਿੱਚ ਬਰਕਰਾਰ ਰੱਖਿਆ ਹੈ ਜਿਸ ਵਿੱਚ ਘੱਟੋ-ਘੱਟ 10 ਖਿਡਾਰੀ ਹਨ ਜੋ ਪਿਛਲੇ ਵਿਸ਼ਵ ਕੱਪ ਵਿੱਚ ਖੇਡ ਚੁੱਕੇ ਹਨ।
ਗੇਂਦਬਾਜ਼ੀ ਆਲਰਾਊਂਡਰ ਫਾਤਿਮਾ ਇਸ ਤੋਂ ਪਹਿਲਾਂ ਪਾਕਿਸਤਾਨ ਦੀਆਂ ਉਭਰਦੀਆਂ ਅਤੇ ਘਰੇਲੂ ਟੀਮਾਂ ਦੀ ਅਗਵਾਈ ਕਰ ਚੁੱਕੀ ਹੈ। ਉਨ੍ਹਾਂ ਨੇ 41 ਵਨਡੇ ਅਤੇ 40 ਟੀ-20 ਮੈਚ ਖੇਡੇ ਹਨ। ਉਹ ਦਸੰਬਰ 2023 ਵਿੱਚ ਕ੍ਰਾਈਸਟਚਰਚ ਵਿੱਚ ਨਿਊਜ਼ੀਲੈਂਡ ਦੇ ਖਿਲਾਫ ਵਨਡੇ ਵਿੱਚ ਵੀ ਟੀਮ ਦੀ ਕਪਤਾਨ ਸੀ ਜਿਸ ਨੂੰ ਉਨ੍ਹਾਂ ਨੇ ਸੁਪਰ ਓਵਰ ਵਿੱਚ ਜਿੱਤਿਆ ਸੀ। ਪਾਕਿਸਤਾਨ ਨੂੰ ਆਸਟ੍ਰੇਲੀਆ, ਭਾਰਤ, ਨਿਊਜ਼ੀਲੈਂਡ ਅਤੇ ਸ਼੍ਰੀਲੰਕਾ ਦੇ ਨਾਲ ਗਰੁੱਪ ਏ 'ਚ ਰੱਖਿਆ ਗਿਆ ਹੈ।
ਚੋਣਕਾਰਾਂ ਨੇ ਵਿਕਟਕੀਪਰ-ਬੱਲੇਬਾਜ਼ ਨਜ਼ੀਹਾ ਅਲਵੀ ਦੀ ਥਾਂ 'ਤੇ ਸੱਜੇ ਹੱਥ ਦੇ ਬੱਲੇਬਾਜ਼ ਸਦਾਫ ਸ਼ਮਾਸ ਨੂੰ ਵੀ ਵਾਪਸ ਕਰਵਾਈ ਹੈ ਜੋ ਦੱਖਣੀ ਅਫਰੀਕਾ ਵਿੱਚ ਆਈਸੀਸੀ ਮਹਿਲਾ ਟੀ-20 ਵਿਸ਼ਵ ਕੱਪ 2023 ਦਾ ਵੀ ਹਿੱਸਾ ਸੀ ਅਤੇ ਇੱਕ ਰਿਜ਼ਰਵ ਖਿਡਾਰੀ ਵਜੋਂ ਯਾਤਰਾ ਕਰੇਗੀ।
ਟੀਮ ਇਸ ਪ੍ਰਕਾਰ ਹੈ:
ਫਾਤਿਮਾ ਸਨਾ (ਕਪਤਾਨ), ਆਲੀਆ ਰਿਆਜ਼, ਡਾਇਨਾ ਬੇਗ, ਗੁਲ ਫਿਰੋਜ਼ਾ, ਇਰਮ ਜਾਵੇਦ, ਮੁਨੀਬਾ ਅਲੀ (ਵਿਕਟਕੀਪਰ), ਨਸ਼ਰਾ ਸੰਧੂ, ਨਿਦਾ ਡਾਰ, ਓਮਾਇਨਾ ਸੋਹੇਲ, ਸਦਫ ਸ਼ਮਾਸ, ਸਾਦੀਆ ਇਕਬਾਲ (ਫਿੱਟ ਹੋਣ 'ਤੇ), ਸਿਦਰਾ ਅਮੀਨ, ਸਈਦਾ ਅਰੁਬ ਸ਼ਾਹ, ਤਸਮੀਆ ਰੁਬਾਬ ਅਤੇ ਤੁਬਾ ਹਸਨ
ਰਿਜ਼ਰਵ: ਨਜ਼ੀਹਾ ਅਲਵੀ (ਵਿਕਟਕੀਪਰ)।