ਓਲੰਪਿਕ ਦੀ ਤਿਆਰੀ ''ਚ ਲੱਗੇ ਨਡਾਲ ਦੀ ਆਸਾਨ ਜਿੱਤ

ਬਸਟਾਡ (ਸਵੀਡਨ), (ਭਾਸ਼ਾ) ਓਲੰਪਿਕ ਦੀ ਤਿਆਰੀ ਕਰ ਰਹੇ ਰਾਫੇਲ ਨਡਾਲ ਨੇ ਨੋਰਡੀਆ ਓਪਨ ਟੈਨਿਸ ਟੂਰਨਾਮੈਂਟ ਦੇ ਸਿੰਗਲਜ਼ ਦੇ ਪਹਿਲੇ ਦੌਰ ਵਿੱਚ ਸਵੀਡਨ ਦੇ ਦਿੱਗਜ ਖਿਡਾਰੀ ਬਯੋਰਨ ਬੋਰਗ ਦੇ 21 ਸਾਲਾ ਪੁੱਤਰ ਲਿਓ ਬੋਰਗ ਨੂੰ ਸਿੱਧੇ ਸੈੱਟਾਂ ਵਿੱਚ 6-3, 6-4 ਨਾਲ ਹਰਾਇਆ। ਨਡਾਲ ਨੇ ਮੈਚ ਤੋਂ ਬਾਅਦ ਆਪਣੇ 21 ਸਾਲਾ ਵਿਰੋਧੀ ਬਾਰੇ ਕਿਹਾ, ''ਸਾਡੀ ਖੇਡ ਇਤਿਹਾਸ ਦੇ ਮਹਾਨ ਖਿਡਾਰੀਆਂ ਵਿੱਚੋਂ ਇੱਕ ਦੇ ਪੁੱਤਰ ਦੇ ਖਿਲਾਫ ਖੇਡਣਾ ਮੇਰੇ ਲਈ ਸਨਮਾਨ ਦੀ ਗੱਲ ਹੈ। ਮੈਨੂੰ ਲੱਗਦਾ ਹੈ ਕਿ ਉਸ ਨੇ ਚੰਗਾ ਪ੍ਰਦਰਸ਼ਨ ਕੀਤਾ। ਉਸ ਦੇ ਅੱਗੇ ਅਜੇ ਵੀ ਲੰਬਾ ਕਰੀਅਰ ਹੈ ਅਤੇ ਮੈਂ ਉਸ ਨੂੰ ਸ਼ੁਭਕਾਮਨਾਵਾਂ ਦਿੰਦਾ ਹਾਂ।''

 ਨਡਾਲ ਨੇ ਇੱਥੇ 2005 ਵਿੱਚ 19 ਸਾਲ ਦੀ ਉਮਰ ਵਿੱਚ ਖ਼ਿਤਾਬ ਜਿੱਤਿਆ ਸੀ। ਇਸ ਤੋਂ ਬਾਅਦ ਉਹ ਪਹਿਲੀ ਵਾਰ ਇਸ ਟੂਰਨਾਮੈਂਟ ਵਿੱਚ ਹਿੱਸਾ ਲੈ ਰਿਹਾ ਹੈ। ਓਲੰਪਿਕ ਦੌਰਾਨ ਰੋਲਾ ਗਰਾਨ ਦੇ ਕਲੇ ਕੋਰਟ 'ਤੇ ਟੈਨਿਸ ਮੈਚ ਖੇਡੇ ਜਾਣਗੇ ਅਤੇ ਇਸ ਦੀ ਤਿਆਰੀ ਦੇ ਸਿਲਸਿਲੇ 'ਚ ਨਡਾਲ ਇਸ ਟੂਰਨਾਮੈਂਟ 'ਚ ਖੇਡ ਰਿਹਾ ਹੈ। ਨਡਾਲ ਨੇ ਫਰੈਂਚ ਓਪਨ ਦੇ ਪਹਿਲੇ ਦੌਰ 'ਚ ਬਾਹਰ ਹੋਣ ਤੋਂ ਬਾਅਦ ਪਹਿਲੀ ਵਾਰ ਸਿੰਗਲਜ਼ ਮੈਚ ਖੇਡਿਆ। ਉਸ ਦੀ ਅਗਲੀ ਟੱਕਰ ਬਰਤਾਨੀਆ ਦੇ ਕੈਮਰਨ ਨੋਰੀ ਨਾਲ ਹੋਵੇਗੀ।