T20 WC ''ਚ ਡਿਕਾਕ ਤੇ ਯਾਨਸੇਨ ਦਾ ਪ੍ਰਦਰਸ਼ਨ ਰਹੇਗਾ ਮਹੱਤਵਪੂਰਨ : ਡੁਮਿਨੀ

ਨਵੀਂ ਦਿੱਲੀ : ਭਾਰਤ ਅਤੇ ਸ਼੍ਰੀਲੰਕਾ ਦੀ ਸਾਂਝੀ ਮੇਜ਼ਬਾਨੀ ਵਿੱਚ 7 ਫਰਵਰੀ 2026 ਤੋਂ ਸ਼ੁਰੂ ਹੋਣ ਵਾਲੇ ਆਈਸੀਸੀ ਟੀ-20 ਵਿਸ਼ਵ ਕੱਪ ਲਈ ਦੱਖਣੀ ਅਫਰੀਕਾ ਨੇ ਆਪਣੀਆਂ ਤਿਆਰੀਆਂ ਤੇਜ਼ ਕਰ ਦਿੱਤੀਆਂ ਹਨ। ਸਾਬਕਾ ਸਟਾਰ ਬੱਲੇਬਾਜ਼ ਜੇਪੀ ਡੁਮਿਨੀ ਦਾ ਮੰਨਣਾ ਹੈ ਕਿ ਇਸ ਵੱਕਾਰੀ ਟੂਰਨਾਮੈਂਟ ਵਿੱਚ ਵਿਕਟਕੀਪਰ ਬੱਲੇਬਾਜ਼ ਕੁਇੰਟਨ ਡੀ ਕੌਕ ਅਤੇ ਆਲਰਾਊਂਡਰ ਮਾਰਕੋ ਯਾਨਸੇਨ ਦਾ ਪ੍ਰਦਰਸ਼ਨ ਦੱਖਣੀ ਅਫਰੀਕਾ ਦੀ ਕਿਸਮਤ ਦਾ ਫੈਸਲਾ ਕਰੇਗਾ। ਡੁਮਿਨੀ ਅਨੁਸਾਰ, ਡੀ ਕੌਕ ਵਰਗੇ ਤਜ਼ਰਬੇਕਾਰ ਖਿਡਾਰੀ ਦੀ ਫਾਰਮ ਟੀਮ ਦੇ ਮਨੋਬਲ ਅਤੇ ਆਤਮ-ਵਿਸ਼ਵਾਸ ਨੂੰ ਵਧਾਉਣ ਲਈ ਬੇਹੱਦ ਜ਼ਰੂਰੀ ਹੈ।

ਵਰਤਮਾਨ ਵਿੱਚ ਦੱਖਣੀ ਅਫਰੀਕਾ ਵਿੱਚ ਚੱਲ ਰਹੀ SA20 ਲੀਗ (26 ਦਸੰਬਰ 2025 - 25 ਜਨਵਰੀ 2026) ਖਿਡਾਰੀਆਂ ਲਈ ਲੈਅ ਹਾਸਲ ਕਰਨ ਦਾ ਇੱਕ ਸ਼ਾਨਦਾਰ ਪਲੇਟਫਾਰਮ ਸਾਬਤ ਹੋ ਰਹੀ ਹੈ। ਡੀ ਕੌਕ ਇਸ ਲੀਗ ਵਿੱਚ 205 ਦੌੜਾਂ ਬਣਾ ਕੇ ਦੂਜੇ ਸਭ ਤੋਂ ਸਫਲ ਬੱਲੇਬਾਜ਼ ਵਜੋਂ ਉਭਰੇ ਹਨ। ਦੂਜੇ ਪਾਸੇ, ਮਾਰਕੋ ਯਾਨਸੇਨ ਨੇ ਭਾਰਤ ਵਿੱਚ ਹੋਈ ਪਿਛਲੀ ਸੀਮਤ ਓਵਰਾਂ ਦੀ ਲੜੀ ਵਿੱਚ ਆਪਣੀ ਬੱਲੇਬਾਜ਼ੀ ਅਤੇ ਗੇਂਦਬਾਜ਼ੀ ਨਾਲ ਸਭ ਨੂੰ ਪ੍ਰਭਾਵਿਤ ਕੀਤਾ ਹੈ। ਡੁਮਿਨੀ ਦਾ ਕਹਿਣਾ ਹੈ ਕਿ ਯਾਨਸੇਨ ਵਿੱਚ ਸਰਵੋਤਮ ਆਲਰਾਊਂਡਰ ਬਣਨ ਦੇ ਸਾਰੇ ਗੁਣ ਹਨ ਅਤੇ ਉਸ ਦੀ ਮੌਜੂਦਗੀ ਟੀਮ ਦੇ ਸੁਮੇਲ ਨੂੰ ਮਜ਼ਬੂਤ ਕਰਦੀ ਹੈ।

 ਟੀ-20 ਵਿਸ਼ਵ ਕੱਪ ਤੋਂ ਠੀਕ ਪਹਿਲਾਂ ਦੱਖਣੀ ਅਫਰੀਕਾ ਦੀ ਟੀਮ ਵੈਸਟਇੰਡੀਜ਼ ਵਿਰੁੱਧ ਤਿੰਨ ਮੈਚਾਂ ਦੀ ਟੀ-20 ਸੀਰੀਜ਼ ਖੇਡੇਗੀ, ਜੋ ਤਿਆਰੀਆਂ ਨੂੰ ਅੰਤਿਮ ਰੂਪ ਦੇਣ ਲਈ ਅਹਿਮ ਹੋਵੇਗੀ। ਡੁਮਿਨੀ ਨੇ ਇਹ ਵੀ ਜ਼ਿਕਰ ਕੀਤਾ ਕਿ ਭਾਵੇਂ SA20 ਦੇ ਸਭ ਤੋਂ ਸਫਲ ਗੇਂਦਬਾਜ਼ ਓਟਨੀਲ ਬਾਰਟਮੈਨ (11 ਵਿਕਟਾਂ) ਵਿਸ਼ਵ ਕੱਪ ਟੀਮ ਵਿੱਚ ਜਗ੍ਹਾ ਨਹੀਂ ਬਣਾ ਸਕੇ, ਪਰ ਉਨ੍ਹਾਂ ਦਾ ਜਜ਼ਬਾ ਕਾਬਿਲੇ-ਤਾਰੀਫ਼ ਹੈ।