ਜੈਸਵਾਲ ਤੇ ਰਹਾਣੇ ਨੂੰ ਨਵੀਆਂ ਟੀਮਾਂ ਨੇ ਖਰੀਦਿਆ! IPL ਵਿਚਾਲੇ ਹੋਇਆ ਵੱਡਾ ਐਲਾਨ

ਸਪੋਰਟਸ ਡੈਸਕ- ਆਈ.ਪੀ.ਐਲ. 2026 ਦੇ ਰੋਮਾਂਚਕ ਮੁਕਾਬਲਿਆਂ ਦੇ ਵਿਚਕਾਰ ਕ੍ਰਿਕਟ ਪ੍ਰੇਮੀਆਂ ਲਈ ਇੱਕ ਵੱਡੀ ਖਬਰ ਸਾਹਮਣੇ ਆਈ ਹੈ। ਟੀਮ ਇੰਡੀਆ ਦੇ ਸਟਾਰ ਬੱਲੇਬਾਜ਼ ਯਸ਼ਸਵੀ ਜੈਸਵਾਲ ਅਤੇ ਅਜਿੰਕਯ ਰਹਾਣੇ ਨੂੰ ਮੁੰਬਈ ਟੀ-20 ਲੀਗ ਦੀਆਂ ਨਵੀਆਂ ਟੀਮਾਂ ਨੇ ਆਪਣੀ ਝੋਲੀ ਵਿੱਚ ਪਾ ਲਿਆ ਹੈ।

ਤਾਜ਼ਾ ਐਲਾਨ ਅਨੁਸਾਰ, ਸ਼ਾਨਦਾਰ ਫਾਰਮ ਵਿੱਚ ਚੱਲ ਰਹੇ ਯਸ਼ਸਵੀ ਜੈਸਵਾਲ ਨੂੰ 'ਬਾਂਦਰਾ ਬਲਾਸਟਰਸ' ਨੇ ਆਪਣੀ ਟੀਮ ਵਿੱਚ ਸ਼ਾਮਲ ਕੀਤਾ ਹੈ। ਦੂਜੇ ਪਾਸੇ, ਤਜ਼ਰਬੇਕਾਰ ਬੱਲੇਬਾਜ਼ ਅਜਿੰਕਯ ਰਹਾਣੇ 'ਨੋਰਥ ਮੁੰਬਈ ਪੈਂਥਰਸ' ਵੱਲੋਂ ਖੇਡਦੇ ਨਜ਼ਰ ਆਉਣਗੇ। ਜ਼ਿਕਰਯੋਗ ਹੈ ਕਿ ਰਹਾਣੇ ਮੌਜੂਦਾ ਆਈ.ਪੀ.ਐਲ. ਸੀਜ਼ਨ ਵਿੱਚ ਕੋਲਕਾਤਾ ਨਾਈਟ ਰਾਈਡਰਜ਼ ਦੀ ਕਪਤਾਨੀ ਕਰ ਰਹੇ ਹਨ।

ਯਸ਼ਸਵੀ ਜੈਸਵਾਲ ਆਈ.ਪੀ.ਐਲ. 2026 ਵਿੱਚ ਬੱਲੇ ਨਾਲ ਕਹਿਰ ਮਚਾ ਰਹੇ ਹਨ। ਉਨ੍ਹਾਂ ਨੇ ਹੁਣ ਤੱਕ 7 ਮੈਚਾਂ ਵਿੱਚ 49 ਦੀ ਔਸਤ ਨਾਲ 245 ਦੌੜਾਂ ਬਣਾਈਆਂ ਹਨ। ਇਸ ਦੌਰਾਨ ਉਨ੍ਹਾਂ ਦਾ ਸਟ੍ਰਾਈਕ ਰੇਟ 150 ਤੋਂ ਉੱਪਰ ਰਿਹਾ ਹੈ ਅਤੇ ਉਹ 2 ਅਰਧ ਸੈਂਕੜੇ, 12 ਛੱਕੇ ਅਤੇ 27 ਚੌਕੇ ਜੜ ਚੁੱਕੇ ਹਨ।

ਭਾਵੇਂ ਬਾਂਦਰਾ ਬਲਾਸਟਰਸ ਨੇ ਜੈਸਵਾਲ ਨੂੰ ਖਰੀਦ ਲਿਆ ਹੈ, ਪਰ ਉਨ੍ਹਾਂ ਦਾ ਇਸ ਲੀਗ ਵਿੱਚ ਖੇਡਣਾ ਮੁਸ਼ਕਿਲ ਜਾਪ ਰਿਹਾ ਹੈ। ਇਸ ਦਾ ਮੁੱਖ ਕਾਰਨ ਇਹ ਹੈ ਕਿ 6 ਜੂਨ ਤੋਂ ਭਾਰਤ ਅਤੇ ਅਫਗਾਨਿਸਤਾਨ ਵਿਚਾਲੇ ਇੱਕ ਟੈਸਟ ਮੈਚ ਖੇਡਿਆ ਜਾਣਾ ਹੈ, ਜਿਸ ਵਿੱਚ ਜੈਸਵਾਲ ਭਾਰਤੀ ਟੀਮ ਲਈ ਓਪਨਿੰਗ ਕਰਦੇ ਨਜ਼ਰ ਆਉਣਗੇ। ਕੌਮੀ ਜ਼ਿੰਮੇਵਾਰੀ ਦੇ ਚਲਦਿਆਂ ਉਨ੍ਹਾਂ ਦਾ ਮੁੰਬਈ ਟੀ-20 ਲੀਗ ਵਿੱਚ ਹਿੱਸਾ ਲੈਣਾ ਲਗਭਗ ਅਸੰਭਵ ਮੰਨਿਆ ਜਾ ਰਿਹਾ ਹੈ।

ਸੂਤਰਾਂ ਅਨੁਸਾਰ ਇਸ ਲੀਗ ਵਿੱਚ ਕੁੱਲ 8 ਟੀਮਾਂ ਹਿੱਸਾ ਲੈਂਦੀਆਂ ਹਨ। ਇਨ੍ਹਾਂ ਵਿੱਚ ਆਕਾਸ਼ ਟਾਈਗਰਸ, ਆਰਕਸ ਅੰਧੇਰੀ, ਬਾਂਦਰਾ ਬਲਾਸਟਰਸ, ਈਗਲ ਠਾਣੇ ਸਟ੍ਰਾਈਕਰਸ, ਮਰਾਠਾ ਰਾਇਲਜ਼, ਮੁੰਬਈ ਪੈਂਥਰਸ, ਸੋਬੋ ਮੁੰਬਈ ਫਾਲਕਨਸ ਅਤੇ ਟਰਾਇੰਫ ਨਾਈਟਸ ਸ਼ਾਮਲ।