ਕਲਚ ਇੰਟਰਨੈਸ਼ਨਲ ਸ਼ਤਰੰਜ ਟੂਰਨਾਮੈਂਟ : ਕਾਰਲਸਨ ਸੈਮੀਫਾਈਨਲ ''ਚ

ਸੇਂਟ ਲੁਈਸ (ਅਮਰੀਕਾ) (ਨਿਕਲੇਸ਼ ਜੈਨ)- 2,50,000 ਅਮਰੀਕੀ ਡਾਲਰ ਦੀ ਇਨਾਮੀ ਰਾਸ਼ੀ ਵਾਲੇ ਆਨਲਾਈਨ ਕਲਚ ਇੰਟਰਨੈਸ਼ਨਲ ਸ਼ਤਰੰਜ ਟੂਰਨਾਮੈਂਟ ਵਿਚ ਵਿਸ਼ਵ ਚੈਂਪੀਅਨ ਨਾਰਵੇ ਦਾ ਮੈਗਨਸ ਕਾਰਲਸਨ ਕਿਸੇ ਤਰ੍ਹਾਂ ਅਮਰੀਕਾ ਦੇ ਨੌਜਵਾਨ ਖਿਡਾਰੀ ਜੇਫ੍ਰੀ ਜਿਆਂਗ ਨੂੰ ਹਰਾਉਂਦੇ ਹੋਏ ਸੈਮੀਫਾਈਨਲ ਵਿਚ ਪਹੁੰਚ ਗਿਆ ਹੈ, ਉੱਥੇ ਹੀ ਅਮਰੀਕਾ ਦੇ ਵੇਸਲੀ ਸ਼ੋਅ ਨੇ ਫਰਾਂਸ ਦੇ ਮੈਕਿਸਮ ਲਾਗ੍ਰੇਵ ਨੂੰ ਹਰਾਉਂਦੇ ਹੋਏ ਆਖਰੀ-4 ਵਿਚ ਜਗ੍ਹਾ ਬਣਾ ਲਈ। ਵਿਸ਼ਵ ਚੈਂਪੀਅਨ ਮੈਗਨਸ ਕਾਰਲਸਨ ਦੀ ਸ਼ੁਰੂਆਤ ਦਿਨ ਦਾ ਪਹਿਲਾ ਮੈਚ ਗੁਆਉਣ ਦੇ ਨਾਲ ਹੋਈ, ਜਿਸ ਨੇ ਸਵੀਕਾਰ ਕੀਤਾ ਕਿ ਵਾਕੇਈ ਅਮਰੀਕਾ ਦਾ ਨੌਜਵਾਨ ਜੇਫ੍ਰੀ ਉਸ ਤੋਂ ਜਿੱਤ ਵੀ ਸਕਦਾ ਸੀ ਪਰ ਕਿਸੇ ਤਰ੍ਹਾਂ ਆਖਰੀ ਕਲਚ ਗੇਮ ਵਿਚ 19 ਸਾਲਾ ਜੇਫ੍ਰੀ ਜਿਆਂਗ ਨੂੰ ਹਰਾਉਂਦੇ ਹੋਏ ਤੇ ਦੋਹਰੇ ਅੰਕ ਹਾਸਲ ਕਰਦੇ ਹੋਏ ਕਾਰਲਸਨ ਸੈਮੀਫਾਈਨਲ ਵਿਚ ਪਹੁੰਚ ਗਿਆ। ਦੋਵਾਂ ਵਿਚਾਲੇ ਆਖਰੀ ਸਕੋਰ 11.5-6.5 ਰਿਹਾ।

ਦੂਜੇ ਪਾਸੇ ਵੇਸਲੀ ਸੋ 13:5 ਦੇ ਸਕੋਰ ਨਾਲ ਮੈਕਿਸਮ ਲਾਗ੍ਰੇਵ ਵਿਰੁੱਧ ਇਕਪਾਸੜ ਜਿੱਤ ਦਰਜ ਕਰਦੇ ਹੋਏ ਸੈਮੀਫਾਈਨਲ ਵਿਚ ਪ੍ਰਵੇਸ਼ ਕਰ ਲਿਆ ਹਾਲਾਂਕਿ ਇਸ ਲਈ ਸਿਰਫ ਵੇਸਲੀ ਸੋ ਦੀ ਇਕ ਚੰਗੀ ਖੇਡ ਨਹੀਂ ਸਗੋਂ ਲਾਗ੍ਰੇਵ ਦੀ ਖਰਾਬ ਖੇਡ ਦੀ ਜ਼ਿੰਮੇਵਾਰ ਰਹੀ। ਕੁਆਰਟਰ ਫਾਈਨਲ ਦੇ ਦੂਜੇ ਪੜਾਅ ਦੀ ਸ਼ੁਰੂਆਤ ਲਗਾਤਾਰ ਦੋ ਡਰਾਅ ਦੇ ਨਾਲ ਹੋਈ ਪਰ ਉਸ ਤੋਂ ਬਾਅਦ ਤੀਜੇ ਮੈਚ ਵਿਚ ਲਾਗ੍ਰੇਵ ਜਿੱਤਿਆ ਤੇ ਇਹ ਉਸ ਦੀ ਆਖਰੀ ਜਿੱਤ ਰਹੀ। ਇਸ ਤੋਂ ਬਾਅਦ ਚੌਥਾ ਮੁਕਾਬਲਾ ਡਰਾਅ ਰਿਹਾ ਪਰ ਇਸ ਤੋਂ ਬਾਅਦ ਦੋਹਰੇ ਅੰਕ ਦੋਣ ਵਾਲੇ ਦੋਵੇਂ ਕਲਚ ਮੁਕਾਬਲੇ ਜਿੱਤ ਤੇ ਵੇਸਲੀ ਨੇ 7.5 ਦੇ ਫਰਕ ਨਾਲ ਸਕੋਰ ਸਿੱਧਾ 13-5 ਕਰ ਦਿੱਤਾ।