ਸ਼ਤਰੰਜ : ਹਾਰੀ ਬਾਜ਼ੀ ਜਿੱਤ ਕੇ ਜੂ ਵੇਂਜੂਨ ਨੇ ਕੀਤੀ ਵਾਪਸੀ
01/20/2020 12:55:09 AM
ਬਲਾਦਿਵੋਸਟੋਕ (ਰੂਸ) (ਨਿਕਲੇਸ਼ ਜੈਨ)— ਫਿਡੇ ਮਹਿਲਾ ਵਿਸ਼ਵ ਸ਼ਤਰੰਜ ਚੈਂਪੀਅਨਸ਼ਿਪ 'ਚ ਜਿੱਤ ਦੇ ਨੇੜੇ ਜਾ ਕੇ ਵੀ ਰੂਸ ਦੀ 21 ਸਾਲਾ ਖਿਡਾਰਨ ਅਲੈਕਸਾਂਦ੍ਰਾ ਗੋਰਯਾਚਕਿਨਾ ਖੇਡ 'ਤੇ ਕੰਟਰੋਲ ਗੁਆ ਬੈਠੀ ਤੇ ਮੌਕੇ ਦਾ ਫਾਇਦਾ ਚੁੱਕ ਕੇ ਚੀਨ ਦੀ ਮੌਜੂਦਾ ਵਿਸ਼ਵ ਚੈਂਪੀਅਨ ਜੂ ਵੇਂਜੂਨ ਨੇ ਜਿੱਤ ਦਰਜ ਕਰਦਿਆਂ ਸਕੋਰ ਇਕ ਵਾਰ ਫਿਰ ਬਰਾਬਰ ਕਰ ਦਿੱਤਾ। ਹੁਣ 9 ਰਾਊਂਡਜ਼ ਤੋਂ ਬਾਅਦ ਦੋਵੇਂ ਖਿਡਾਰਨਾਂ 4.5-4.5 ਅੰਕਾਂ 'ਤੇ ਪਹੁੰਚ ਗਈਆਂ ਹਨ।
ਸਫੈਦ ਮੋਹਰਿਆਂ ਨਾਲ ਖੇਡ ਰਹੀ ਵੇਂਜੂਨ ਨੇ ਰੇਟੀ ਓਪਨਿੰਗ ਨਾਲ ਖੇਡ ਦੀ ਸ਼ੁਰੂਆਤ ਕੀਤੀ ਪਰ ਉਸ ਦੇ ਖੁਦ ਦੇ ਰਾਜਾ ਨੂੰ ਜ਼ਿਆਦਾ ਸਮੇਂ ਤਕ ਕੇਂਦਰ ਵਿਚ ਰੱਖਣਾ ਗਲਤ ਫੈਸਲਾ ਸਾਬਤ ਹੋਇਆ। ਕਿਲੇਬੰਦੀ ਤੋਂ ਬਾਅਦ ਉਸ ਦੇ ਰਾਜਾ ਉੱਪਰ ਗੋਰਯਾਚਕਿਨਾ ਨੇ ਲਗਾਤਾਰ ਹਮਲਾ ਕਰਦਿਆਂ ਖੇਡ ਨੂੰ ਲੱਗਭਗ ਜਿੱਤ ਲਿਆ ਸੀ। 27ਵੀਂ ਚਾਲ ਵਿਚ ਇਕ ਆਸਾਨ ਜਿੱਤ ਤੋਂ ਖੁੰਝਣ 'ਤੇ ਗੋਰਯਾਚਕਿਨਾ ਨੇ ਲਗਾਤਾਰ ਗਲਤੀਆਂ ਕੀਤੀਆਂ ਤੇ ਐਂਡਗੇਮ ਵਿਚ ਵੇਂਜੂਨ ਨੇ ਬਿਹਤਰੀਨ ਖੇਡ ਦਿਖਾਉਂਦੇ ਹੋਏ 62 ਚਾਲਾਂ 'ਚ ਖੇਡ ਜਿੱਤ ਲਈ।