ਬੋਪੰਨਾ-ਦਿਵਿਜ ਸ਼ਰਣ ਸੋਨ ਤਮਗੇ ਦੇ ਮੈਚ ''ਚ; ਪ੍ਰਜਨੇਸ਼ ਦਾ ਤਮਗਾ ਪੱਕਾ

ਜਕਾਰਤਾ— ਭਾਰਤ ਦੇ ਰੋਹਨ ਬੋਪੰਨਾ ਤੇ ਦਿਵਿਜ ਸ਼ਰਣ ਦੀ ਚੋਟੀ ਦਰਜਾ ਪ੍ਰਾਪਤ ਜੋੜੀ ਨੇ ਏਸ਼ੀਆਡ ਵਿਚ ਟੈਨਿਸ ਪ੍ਰਤੀਯੋਗਿਤਾ ਵਿਚ ਆਪਣੇ ਪੁਰਸ਼ ਡਬਲਜ਼ ਸੈਮੀਫਾਈਨਲ ਮੈਚ ਨੂੰ 2-1 ਨਾਲ ਜਿੱਤ ਕੇ ਸੋਨ ਤਮਗੇ ਮੁਕਾਬਲੇ ਵਿਚ ਪ੍ਰਵੇਸ਼ ਕਰ ਲਿਆ।
ਮਹਿਲਾ ਸਿੰਗਲਜ਼ ਖਿਡਾਰੀ ਅਹਿਮਦਾਬਾਦ ਦੀ ਅੰਕਿਤਾ ਰੈਨਾ ਨੂੰ ਸੈਮੀਫਾਈਨਲ ਵਿਚ 0-2 ਨਾਲ ਹਾਰ ਝੱਲਣ ਤੋਂ ਬਾਅਦ ਕਾਂਸੀ ਤਮਗੇ ਨਾਲ ਸਬਰ ਕਰਨਾ ਪਿਆ ਜਦਕਿ ਪ੍ਰਜਨੇਸ਼ ਗੁਣੇਸ਼ਵਰਨ ਨੇ ਪੁਰਸ਼ ਸਿੰਗਲਜ਼ ਦੇ ਸੈਮੀਫਾਈਨਲ ਵਿਚ ਪ੍ਰਵੇਸ਼ ਕਰ ਕੇ ਦੇਸ਼ ਲਈ ਇਕ ਹੋਰ ਤਮਗਾ ਪੱਕਾ ਕਰ ਲਿਆ। ਬੋਪੰਨਾ ਤੇ ਦਿਵਿਜ ਦੀ ਤਜਰਬੇਕਾਰ ਜੋੜੀ ਨੇ ਪੁਰਸ਼ ਡਬਲਜ਼ ਸੈਮੀਫਾਈਨਲ ਮੈਚ ਵਿਚ ਜਾਪਾਨ ਦੇ ਕਾਇਤੋ ਸੁਸੂਗੀ ਤੇ ਸ਼ੋ ਸ਼ਿਮਾਬੁਕਰੋ ਨੂੰ 4-6, 6-3, 10-8 ਨਾਲ ਹਰਾ ਕੇ ਫਾਈਨਲ ਵਿਚ ਪ੍ਰਵੇਸ਼ ਕਰ ਲਿਆ।
ਅੰਕਿਤਾ ਸਾਹਮਣੇ ਚੀਨੀ ਖਿਡਾਰੀ ਸ਼ੁਆਈ ਝਾਂਗ ਦਾ ਤਜਰਬਾ ਕੰਮ ਆਇਆ, ਜਿਸ ਨੇ ਲਗਾਤਾਰ ਕਈ ਮੌਕਿਆਂ  'ਤੇ ਅੰਕਿਤਾ ਤੋਂ ਸਖਤ ਟੱਕਰ ਮਿਲਣ ਦੇ ਬਾਵਜੂਦ 6-4, 7-6 ਨਾਲ ਦੋ ਘੰਟੇ 11 ਮਿੰਟ ਵਿਚ ਜਿੱਤ ਆਪਣੇ ਨਾਂ ਕਰ ਕੇ ਫਾਈਨਲ ਵਿਚ ਜਗ੍ਹਾ ਬਣਾ ਲਈ। ਭਾਰਤੀ ਖਿਡਾਰੀ ਨੂੰ ਸੈਮੀਫਾਈਨਲ ਮੈਚ ਵਿਚ ਹਾਰ ਦੇ ਨਾਲ ਹੁਣ ਕਾਂਸੀ ਤਮਗੇ ਨਾਲ ਸਬਰ ਕਰਨਾ ਪਿਆ। ਪ੍ਰਜਨੇਸ਼ ਨੇ ਸਿੰਗਲਜ਼ ਵਿਚ ਭਾਰਤੀ ਮੁਹਿੰਮ ਨੂੰ ਬਰਕਰਾਰ ਰੱਖਦਿਆਂ ਕੋਰੀਆ ਦੇ ਸੂਨਵ ਕਵੋਨ ਨੂੰ 6-7, 6-4, 7-6 ਨਾਲ ਹਰਾ ਕੇ ਸੈਮੀਫਾਈਨਲ ਵਿਚ ਜਗ੍ਹਾ ਬਣਾਈ।