ਵੱਡੀ ਖਬਰ! IPL ਵਿਚਾਲੇ ਧਾਕੜ ਕ੍ਰਿਕਟਰ ਨੇ ਲਿਆ ਸੰਨਿਆਸ, ਖ਼ਤਮ ਹੋ ਗਿਆ ਕਰੀਅਰ

ਸਪੋਰਟਸ ਡੈਸਕ : ਇੰਗਲੈਂਡ ਦੇ 30 ਸਾਲਾ ਆਲਰਾਊਂਡਰ ਕੈਮਰੂਨ ਸਟੀਲ (Cameron Steel) ਨੇ ਕ੍ਰਿਕਟ ਪ੍ਰੇਮੀਆਂ ਨੂੰ ਹੈਰਾਨ ਕਰਦਿਆਂ ਪੇਸ਼ੇਵਰ ਕ੍ਰਿਕਟ ਦੇ ਸਾਰੇ ਫਾਰਮੈਟਾਂ ਤੋਂ ਸੰਨਿਆਸ ਲੈਣ ਦਾ ਐਲਾਨ ਕਰ ਦਿੱਤਾ ਹੈ। ਸਰੇ ਕਾਊਂਟੀ ਕ੍ਰਿਕਟ ਕਲੱਬ (Surrey County Cricket Club) ਦੇ ਇਸ ਖਿਡਾਰੀ ਨੂੰ ਗਿੱਟੇ ਦੀ ਗੰਭੀਰ ਸੱਟ ਕਾਰਨ ਇਹ ਦੁਖਦ ਫੈਸਲਾ ਲੈਣਾ ਪਿਆ।

ਸੱਟ ਅਤੇ ਨਿਰਾਸ਼ਾ ਨੇ ਕਰ ਦਿੱਤਾ ਮਜਬੂਰ 
ਕੈਮਰੂਨ ਸਟੀਲ ਲੰਬੇ ਸਮੇਂ ਤੋਂ ਸੱਟ ਨਾਲ ਜੂਝ ਰਹੇ ਸਨ ਅਤੇ ਪਿਛਲੇ ਕਈ ਮਹੀਨਿਆਂ ਤੋਂ ਮੈਦਾਨ ਤੋਂ ਦੂਰ ਸਨ। ਆਪਣੀ ਰਿਟਾਇਰਮੈਂਟ ਬਾਰੇ ਗੱਲ ਕਰਦਿਆਂ ਸਟੀਲ ਨੇ ਦੱਸਿਆ ਕਿ ਪਿਛਲੇ ਡੇਢ ਸਾਲ ਉਨ੍ਹਾਂ ਲਈ ਬਹੁਤ ਨਿਰਾਸ਼ਾਜਨਕ ਰਹੇ ਹਨ। ਉਨ੍ਹਾਂ ਨੇ ਮੈਦਾਨ 'ਤੇ ਵਾਪਸੀ ਲਈ ਸਖ਼ਤ ਮਿਹਨਤ ਕੀਤੀ, ਪਰ ਸਫਲਤਾ ਨਹੀਂ ਮਿਲੀ। ਸਟੀਲ ਨੇ ਭਾਵੁਕ ਹੁੰਦਿਆਂ ਕਿਹਾ ਕਿ ਹੁਣ ਇਹ ਖੇਡ ਉਨ੍ਹਾਂ ਲਈ ਸਿਰਫ਼ ਦੇਖਣ ਤੱਕ ਸੀਮਤ ਹੋ ਗਈ ਸੀ, ਜਿਸ ਕਾਰਨ ਉਨ੍ਹਾਂ ਨੂੰ ਖੇਡ ਨੂੰ ਅਲਵਿਦਾ ਕਹਿਣਾ ਪਿਆ।

ਕਰੀਅਰ ਦੀ ਵੱਡੀ ਪ੍ਰਾਪਤੀ : 21 ਸਾਲ ਦੀ ਉਮਰ 'ਚ ਲਗਾਇਆ ਦੋਹਰਾ ਸੈਂਕੜਾ 
ਸਟੀਲ ਨੇ ਸਾਲ 2014 ਵਿੱਚ ਫਰਸਟ-ਕਲਾਸ ਕ੍ਰਿਕਟ ਵਿੱਚ ਡੈਬਿਊ ਕੀਤਾ ਸੀ। ਉਹ ਬਹੁਤ ਜਲਦੀ ਉਦੋਂ ਚਰਚਾ ਵਿੱਚ ਆਏ ਜਦੋਂ ਉਨ੍ਹਾਂ ਨੇ ਮਹਿਜ਼ 21 ਸਾਲ ਦੀ ਉਮਰ ਵਿੱਚ ਲੀਸੇਸਟਰਸ਼ਾਇਰ ਵਿਰੁੱਧ 224 ਦੌੜਾਂ ਦੀ ਸ਼ਾਨਦਾਰ ਪਾਰੀ ਖੇਡੀ ਸੀ। ਇਹ ਉਨ੍ਹਾਂ ਦੇ ਕਰੀਅਰ ਦੀ ਸਭ ਤੋਂ ਵੱਡੀ ਪ੍ਰਾਪਤੀ ਮੰਨੀ ਜਾਂਦੀ ਹੈ। ਸਾਲ 2021 ਵਿੱਚ ਉਹ ਸਰੇ ਕਲੱਬ ਨਾਲ ਜੁੜੇ, ਜਿੱਥੇ ਉਨ੍ਹਾਂ ਨੇ ਆਪਣੀ ਟੀਮ ਲਈ ਅਹਿਮ ਯੋਗਦਾਨ ਪਾਇਆ।

ਘਰੇਲੂ ਕ੍ਰਿਕਟ ਵਿੱਚ ਸ਼ਾਨਦਾਰ ਅੰਕੜੇ 
ਕੈਮਰੂਨ ਸਟੀਲ ਦਾ 11 ਸਾਲਾਂ ਦਾ ਘਰੇਲੂ ਕਰੀਅਰ ਕਾਫੀ ਪ੍ਰਭਾਵਸ਼ਾਲੀ ਰਿਹਾ ਹੈ:
ਫਰਸਟ ਕਲਾਸ: 66 ਮੈਚਾਂ ਵਿੱਚ 2,733 ਦੌੜਾਂ (4 ਸੈਂਕੜੇ, 13 ਅਰਧ ਸੈਂਕੜੇ) ਅਤੇ 60 ਵਿਕਟਾਂ।
ਲਿਸਟ A: 39 ਪਾਰੀਆਂ ਵਿੱਚ 666 ਦੌੜਾਂ ਅਤੇ 45 ਵਿਕਟਾਂ।
T20: 16 ਪਾਰੀਆਂ ਵਿੱਚ 165 ਦੌੜਾਂ ਅਤੇ 12 ਵਿਕਟਾਂ। 
ਕੁੱਲ ਮਿਲਾ ਕੇ ਉਨ੍ਹਾਂ ਨੇ ਆਪਣੇ ਕਰੀਅਰ ਵਿੱਚ 3,564 ਦੌੜਾਂ ਬਣਾਈਆਂ ਅਤੇ 117 ਵਿਕਟਾਂ ਝਟਕਾਈਆਂ।

ਟੀਮ ਅਤੇ ਪ੍ਰਬੰਧਕਾਂ ਨੇ ਜਤਾਇਆ ਦੁੱਖ 
ਸਰੇ ਦੇ ਕਪਤਾਨ ਰੋਰੀ ਬਰਨਸ ਨੇ ਸਟੀਲ ਦੇ ਸੰਨਿਆਸ 'ਤੇ ਅਫਸੋਸ ਜਤਾਉਂਦਿਆਂ ਕਿਹਾ ਕਿ ਉਨ੍ਹਾਂ ਨੇ ਵਾਪਸੀ ਲਈ ਬਹੁਤ ਕੋਸ਼ਿਸ਼ ਕੀਤੀ, ਪਰ ਕਿਸਮਤ ਨੇ ਸਾਥ ਨਹੀਂ ਦਿੱਤਾ। ਕਲੱਬ ਦੇ ਡਾਇਰੈਕਟਰ ਐਲੇਕ ਸਟੀਵਰਟ ਨੇ ਸਟੀਲ ਨੂੰ ਟੀਮ ਦਾ ਅਹਿਮ ਹਿੱਸਾ ਦੱਸਿਆ ਅਤੇ ਕਿਹਾ ਕਿ ਸੱਟ ਕਾਰਨ ਕਿਸੇ ਖਿਡਾਰੀ ਦਾ ਕਰੀਅਰ ਇਸ ਤਰ੍ਹਾਂ ਖਤਮ ਹੋਣਾ ਬਹੁਤ ਮੰਦਭਾਗਾ ਹੈ।