ਏਸ਼ੀਅਨ ਗੇਮਸ 2026 ਦਾ ਸ਼ੁੱਭ ਆਰੰਭ, ਮਨੂ ਭਾਕਰ ਤੇ ਪਵਨ ਸਹਿਰਾਵਤ ਨੇ ਕੀਤੀ ਭਾਰਤੀ ਦਲ ਦੀ ਅਗਵਾਈ

ਨਾਗੋਯਾ : ਕਈ ਦਿਨਾਂ ਦੀਆਂ ਤਿਆਰੀਆਂ ਅਤੇ ਪ੍ਰਬੰਧਕੀ ਚੁਣੌਤੀਆਂ ਤੋਂ ਬਾਅਦ, ਸ਼ਨੀਵਾਰ ਨੂੰ ਮਿਜ਼ੂਹੋ ਪਾਰਕ ਐਥਲੇਟਿਕ ਸਟੇਡੀਅਮ ਵਿੱਚ ਇੱਕ ਰੰਗਾਰੰਗ ਅਤੇ ਹਾਈ-ਟੈਕ ਉਦਘਾਟਨੀ ਸਮਾਰੋਹ ਨਾਲ 20ਵੀਆਂ ਏਸ਼ੀਆਈ ਖੇਡਾਂ ਦੀ ਅਧਿਕਾਰਤ ਸ਼ੁਰੂਆਤ ਹੋ ਗਈ। ਜਾਪਾਨ ਦੇ ਸਮਰਾਟ ਨਾਰੂਹਿਤੋ ਨੇ ਮਹਾਰਾਣੀ ਮਸਾਕੋ, ਏਸ਼ੀਆਈ ਓਲੰਪਿਕ ਕੌਂਸਲ (OCA) ਦੇ ਪ੍ਰਧਾਨ ਸ਼ੇਖ ਜੋਆਨ ਬਿਨ ਹਮਦ ਅਲ ਥਾਨੀ ਅਤੇ ਅੰਤਰਰਾਸ਼ਟਰੀ ਓਲੰਪਿਕ ਕਮੇਟੀ (IOC) ਦੀ ਪ੍ਰਧਾਨ ਕਰਸਟੀ ਕੋਵੈਂਟਰੀ ਦੀ ਮੌਜੂਦਗੀ ਵਿੱਚ ਖੇਡਾਂ ਦੇ ਸ਼ੁਰੂ ਹੋਣ ਦਾ ਰਸਮੀ ਐਲਾਨ ਕੀਤਾ।

ਦੋ ਘੰਟੇ ਚੱਲੇ ਇਸ ਸਮਾਰੋਹ ਦੀ ਸ਼ੁਰੂਆਤ ਜਾਪਾਨ ਦੇ ਰਾਸ਼ਟਰੀ ਗੀਤ ਨਾਲ ਹੋਈ, ਜਿਸ ਤੋਂ ਬਾਅਦ ਜਾਪਾਨੀ ਸੈਲਫ-ਡਿਫੈਂਸ ਫੋਰਸਿਜ਼ ਦੇ ਜਵਾਨਾਂ ਵੱਲੋਂ ਝੰਡਾ ਫਹਿਰਾਇਆ ਗਿਆ। ਇਸ ਤੋਂ ਬਾਅਦ ਖਿਡਾਰੀਆਂ ਦੀ ਪਰੇਡ (ਮਾਰਚ ਪਾਸਟ) ਸ਼ੁਰੂ ਹੋਈ, ਜਿਸ ਵਿੱਚ 45 ਦੇਸ਼ਾਂ ਅਤੇ OCA ਰਿਫਿਊਜੀ ਟੀਮ ਸਮੇਤ ਕੁੱਲ 46 ਦਲਾਂ ਨੇ ਹਿੱਸਾ ਲਿਆ। ਅਫ਼ਗਾਨਿਸਤਾਨ ਦਾ ਦਲ ਸਭ ਤੋਂ ਪਹਿਲਾਂ ਆਇਆ, ਜਦਕਿ ਚੀਨ ਨੇ 800 ਤੋਂ ਵੱਧ ਐਥਲੀਟਾਂ ਦੇ ਵੱਡੇ ਦਲ ਨਾਲ ਸਭ ਦਾ ਧਿਆਨ ਖਿੱਚਿਆ।

ਮਨੂ ਭਾਕਰ ਅਤੇ ਪਵਨ ਸਹਿਰਾਵਤ ਨੇ ਕੀਤੀ ਭਾਰਤੀ ਦਲ ਦੀ ਅਗਵਾਈ:
ਪੈਰਿਸ ਓਲੰਪਿਕ 2024 ਦੀ ਦੋਹਰੀ ਮੈਡਲ ਜੇਤੂ ਨਿਸ਼ਾਨੇਬਾਜ਼ ਮਨੂ ਭਾਕਰ ਅਤੇ ਕਬੱਡੀ ਖਿਡਾਰੀ ਪਵਨ ਸਹਿਰਾਵਤ ਨੇ ਮਾਰਚ ਪਾਸਟ ਦੌਰਾਨ ਭਾਰਤੀ ਦਲ ਦੀ ਅਗਵਾਈ ਕੀਤੀ। ਖਿਡਾਰੀਆਂ ਨੇ ਨੇਵੀ-ਬਲੂ  ਪੋਸ਼ਾਕ ਵਿੱਚ ਮਾਣ ਨਾਲ ਰਾਸ਼ਟਰੀ ਝੰਡਾ ਥੰਮ੍ਹਿਆ ਹੋਇਆ ਸੀ। ਸ਼ਾਟ ਪੁੱਟ ਖਿਡਾਰੀ ਤਜਿੰਦਰਪਾਲ ਸਿੰਘ ਤੂਰ ਦੀ ਰਸਮੀ ਕਿੱਟ ਸਮੇਂ ਸਿਰ ਨਾ ਪਹੁੰਚਣ ਕਾਰਨ ਪਵਨ ਸਹਿਰਾਵਤ ਨੂੰ ਉਨ੍ਹਾਂ ਦੀ ਜਗ੍ਹਾ ਝੰਡਾਬਰਦਾਰ ਬਣਾਇਆ ਗਿਆ।

POV : You’re walking out along with our flag bearers at the Opening Cermony. 🥹🥹

The incredible moments as our contingent marches during the Opening Ceremony! As the @asiangames_2026 are officially open, here’s wishing our contingent the very best on a successful games ahead.… pic.twitter.com/Kipe4elYGv

— Team India (@WeAreTeamIndia) September 19, 2026

501 ਮੈਂਬਰੀ ਭਾਰਤੀ ਦਲ ਤੋਂ ਵੱਡੀਆਂ ਉਮੀਦਾਂ:
ਭਾਰਤ ਦਾ 501 ਮੈਂਬਰੀ ਦਲ 2023 ਦੀਆਂ ਹਾਂਗਝੂ ਏਸ਼ੀਆਈ ਖੇਡਾਂ ਦੇ ਆਪਣੇ ਸਰਵੋਤਮ ਪ੍ਰਦਰਸ਼ਨ (28 ਸੋਨ ਤਗਮਿਆਂ ਸਮੇਤ ਕੁੱਲ 106 ਮੈਡਲ) ਨੂੰ ਪਿੱਛੇ ਛੱਡਣ ਦੇ ਇਰਾਦੇ ਨਾਲ ਉੱਤਰ ਰਿਹਾ ਹੈ।

ਉਦਘਾਟਨੀ ਸਮਾਰੋਹ ਤੋਂ ਪਹਿਲਾਂ ਹੀ ਕੁਝ ਮੁਕਾਬਲੇ ਸ਼ੁਰੂ ਹੋ ਚੁੱਕੇ ਹਨ। ਮਹਿਲਾ ਕ੍ਰਿਕਟ ਵਿੱਚ ਹਰਮਨਪ੍ਰੀਤ ਕੌਰ ਦੀ ਅਗਵਾਈ ਵਾਲੀ ਭਾਰਤੀ ਟੀਮ ਨੇ ਸ਼ੁੱਕਰਵਾਰ ਨੂੰ ਮੇਜ਼ਬਾਨ ਜਾਪਾਨ ਨੂੰ 8 ਵਿਕਟਾਂ ਨਾਲ ਹਰਾ ਕੇ ਸੈਮੀਫਾਈਨਲ 'ਚ ਜਗ੍ਹਾ ਬਣਾ ਲਈ ਹੈ। ਇਸ ਤੋਂ ਇਲਾਵਾ, ਪਹਿਲੀ ਵਾਰ ਏਸ਼ੀਆਈ ਖੇਡਾਂ 'ਚ ਸ਼ਾਮਲ ਕੀਤੇ ਗਏ 'ਟੇਕਬਾਲ' (Techball) ਵਿੱਚ ਵੀ ਭਾਰਤ ਦੀਆਂ ਕਾਂਸੀ ਦੇ ਤਗਮੇ ਦੀਆਂ ਉਮੀਦਾਂ ਬਰਕਰਾਰ ਹਨ।

ਏਸ਼ੀਆਈ ਖੇਡਾਂ 19 ਸਤੰਬਰ ਤੋਂ 4 ਅਕਤੂਬਰ ਤੱਕ ਚੱਲਣਗੀਆਂ, ਜਿੱਥੇ 45 ਦੇਸ਼ਾਂ ਦੇ ਲਗਭਗ 11,000 ਐਥਲੀਟ 43 ਖੇਡਾਂ ਦੇ 469 ਸੋਨ ਤਗਮਿਆਂ ਲਈ ਆਪਸ ਵਿੱਚ ਭਿੜਨਗੇ।