ਅਰਜਨਟੀਨਾ ਦੇ ਦਿੱਗਜ ਫੁੱਟਬਾਲਰ ਲਿਓਨੇਲ ਮੇਸੀ ਪੈਰਿਸ ਓਲੰਪਿਕ ''ਚ ਨਹੀਂ ਖੇਡਣਗੇ

ਬਿਊਨਸ ਆਇਰਸ- ਅਰਜਨਟੀਨਾ ਦੀ ਫੁੱਟਬਾਲ ਟੀਮ ਦੇ ਮਹਾਨ ਖਿਡਾਰੀ ਲਿਓਨੇਲ ਮੇਸੀ ਆਪਣੇ ਰੁਝੇਵਿਆਂ ਅਤੇ ਸਿਹਤ ਨੂੰ ਧਿਆਨ ਵਿੱਚ ਰੱਖਦੇ ਹੋਏ ਆਉਣ ਵਾਲੀਆਂ ਪੈਰਿਸ ਓਲੰਪਿਕ ਖੇਡਾਂ ਲਈ ਟੀਮ ਦਾ ਹਿੱਸਾ ਨਹੀਂ ਹੋਣਗੇ। ਅਰਜਨਟੀਨਾ ਦੇ ਅੰਡਰ-23 ਕੋਚ ਮਾਸਚੇਰਾਨੋ ਨਾਲ ਗੱਲ ਕਰਦੇ ਹੋਏ ਮੈਸੀ ਨੇ ਕਿਹਾ ਕਿ ਅਸੀਂ ਦੋਵੇਂ ਮੌਜੂਦਾ ਸਥਿਤੀ ਨੂੰ ਸਮਝਦੇ ਹਾਂ ਅਤੇ ਫਿਲਹਾਲ ਓਲੰਪਿਕ ਬਾਰੇ ਸੋਚਣਾ ਮੁਸ਼ਕਲ ਹੈ। ਉਸ ਨੇ ਕਿਹਾ ਕਿ ਇਹ ਦੋ-ਤਿੰਨ ਮਹੀਨੇ ਲਗਾਤਾਰ ਕਲੱਬ ਤੋਂ ਦੂਰ ਰਹਿਣ ਵਰਗਾ ਹੋਵੇਗਾ ਅਤੇ ਸਭ ਤੋਂ ਵੱਡੀ ਗੱਲ ਇਹ ਹੈ ਕਿ ਮੈਂ ਹੁਣ ਅਜਿਹੀ ਉਮਰ ਵਿਚ ਨਹੀਂ ਹਾਂ ਕਿ ਮੈਂ ਹਰ ਚੀਜ਼ ਵਿਚ ਹਿੱਸਾ ਲੈ ਸਕਾਂ।

ਇਹ ਬਹੁਤ ਮੁਸ਼ਕਲ ਫੈਸਲਾ ਸੀ, ਪਰ ਮੇਰੇ ਕਰੀਅਰ ਦੇ ਇਸ ਪੜਾਅ 'ਤੇ ਇਹ ਜ਼ਰੂਰੀ ਹੈ ਕਿ ਮੈਂ ਆਪਣੇ ਸਰੀਰ ਅਤੇ ਮਾਨਸਿਕ ਸਿਹਤ ਦਾ ਧਿਆਨ ਰੱਖਾਂ। ਉਨ੍ਹਾਂ ਨੇ ਕਿਹਾ ਕਿ ਮੈਨੂੰ ਜੋਖਮ ਤੋਂ ਬਚਣਾ ਹੋਵੇਗਾ। ਲਗਾਤਾਰ ਦੋ ਟੂਰਨਾਮੈਂਟ ਖੇਡਣਾ ਬਹੁਤ ਜ਼ਿਆਦਾ ਹੋਵੇਗਾ। ਉਨ੍ਹਾਂ ਨੇ ਕਿਹਾ ਕਿ ਕੋਪਾ ਅਮਰੀਕਾ ਤੋਂ ਬਾਅਦ ਮੈਨੂੰ ਆਪਣੇ ਕਲੱਬ ਇੰਟਰ ਮਿਆਮੀ ਲਈ ਵੀ ਖੇਡਣਾ ਹੈ ਅਤੇ ਇੰਨੇ ਲੰਬੇ ਸਮੇਂ ਤੱਕ ਖੇਡ ਤੋਂ ਦੂਰ ਰਹਿਣਾ ਆਸਾਨ ਨਹੀਂ ਹੈ। ਉਨ੍ਹਾਂ ਨੇ ਕਿਹਾ ਕਿ ਮੈਂ ਬਹੁਤ ਕਿਸਮਤ ਵਾਲਾ ਰਿਹਾ ਹਾਂ ਕਿ ਮੈਂ ਓਲੰਪਿਕ ਖੇਡਾਂ ਵਿਚ ਖੇਡਿਆ ਅਤੇ ਮਾਸ਼ੇ ਨਾਲ ਮਿਲ ਕੇ ਜਿੱਤਿਆ। ਇਹ ਫੁੱਟਬਾਲ ਪੱਧਰ 'ਤੇ ਬਹੁਤ ਵਧੀਆ ਅਨੁਭਵ ਸੀ।