ਆਰਸੇਨਲ ਦੇ ਇੱਕ ਹੋਰ ਡਰਾਅ ਨਾਲ ਈਪੀਐਲ ਵਿੱਚ ਖਿਤਾਬ ਦੀ ਦੌੜ ਬਣੀ ਰੋਮਾਂਚਕ

ਨਾਟਿੰਘਮ- ਇੰਗਲਿਸ਼ ਪ੍ਰੀਮੀਅਰ ਲੀਗ (ਈਪੀਐਲ) ਫੁੱਟਬਾਲ ਮੁਕਾਬਲੇ ਵਿੱਚ ਚੋਟੀ ਦੀ ਰੈਂਕਿੰਗ ਵਾਲੀ ਆਰਸੇਨਲ ਦੇ ਲਗਾਤਾਰ ਦੂਜਾ ਮੈਚ ਡਰਾਅ ਕਰਨ ਤੋਂ ਬਾਅਦ ਖਿਤਾਬ ਦੀ ਦੌੜ ਰੋਮਾਂਚਕ ਹੋ ਗਈ ਹੈ। ਆਰਸੇਨਲ ਦੋ ਗੋਲਾਂ ਦੀ ਬੜ੍ਹਤ ਦਾ ਫਾਇਦਾ ਉਠਾਉਣ ਵਿੱਚ ਫਿਰ ਅਸਮਰੱਥ ਰਿਹਾ ਅਤੇ ਉਸ ਨੇ ਵੈਸਟ ਹੈਮ ਦੇ ਖਿਲਾਫ 2-2 ਨਾਲ ਡਰਾਅ ਖੇਡਿਆ। 

ਪਿਛਲੇ ਹਫਤੇ ਉਸ ਨੇ ਲਿਵਰਪੂਲ ਖਿਲਾਫ ਵੀ ਇਸੇ ਫਰਕ ਨਾਲ ਡਰਾਅ ਖੇਡਿਆ ਸੀ। ਇਸ ਨਾਲ ਹੁਣ ਉਨ੍ਹਾਂ ਅਤੇ ਦੂਜੇ ਸਥਾਨ 'ਤੇ ਰਹੀ ਮਾਨਚੈਸਟਰ ਸਿਟੀ ਵਿਚਾਲੇ ਸਿਰਫ ਚਾਰ ਅੰਕਾਂ ਦਾ ਫਰਕ ਰਹਿ ਗਿਆ ਹੈ। ਸਿਟੀ ਨੇ ਸ਼ਨੀਵਾਰ ਨੂੰ ਲੀਸਟਰ ਨੂੰ 3-1 ਨਾਲ ਹਰਾਇਆ। ਆਰਸੇਨਲ ਦੇ ਹੁਣ 31 ਮੈਚਾਂ ਵਿੱਚ 74 ਅੰਕ ਹਨ ਜਦਕਿ ਸਿਟੀ ਦੇ 30 ਮੈਚਾਂ ਵਿੱਚ 70 ਅੰਕ ਹਨ। 

ਮਾਨਚੈਸਟਰ ਯੂਨਾਈਟਿਡ 30 ਮੈਚਾਂ 'ਚ 59 ਅੰਕਾਂ ਨਾਲ ਤੀਜੇ ਸਥਾਨ 'ਤੇ ਪਹੁੰਚ ਗਿਆ ਹੈ। ਉਨ੍ਹਾਂ ਨੇ ਐਤਵਾਰ ਨੂੰ ਨਾਟਿੰਘਮ ਫੋਰੈਸਟ ਨੂੰ 2-0 ਨਾਲ ਹਰਾਇਆ। ਵੈਸਟ ਹੈਮ ਦੇ ਖਿਲਾਫ, ਗੈਬਰੀਅਲ ਜੀਸਸ ਅਤੇ ਕਪਤਾਨ ਮਾਰਟਿਨ ਓਡੇਗਾਰਡ ਨੇ 10 ਮਿੰਟ ਦੇ ਅੰਦਰ ਆਰਸੇਨਲ ਨੂੰ 2-0 ਨਾਲ ਅੱਗੇ ਕਰ ਦਿੱਤਾ। ਬੈਨਰਹਾਮਾ ਨੇ 33ਵੇਂ ਮਿੰਟ ਵਿੱਚ ਪੈਨਲਟੀ ਤੋਂ ਵੈਸਟ ਹੈਮ ਲਈ ਗੋਲ ਦੀ ਸ਼ੁਰੂਆਤ ਕੀਤੀ, ਜਦੋਂ ਕਿ ਜੈਰੋਡ ਬੋਵੇਨ ਨੇ 54ਵੇਂ ਮਿੰਟ ਵਿੱਚ ਬਰਾਬਰੀ ਕੀਤੀ। ਇਸ ਦੌਰਾਨ, ਬੁਕਾਯੋ ਸਾਕਾ ਆਰਸੇਨਲ ਲਈ ਪੈਨਲਟੀ ਨੂੰ ਬਦਲਣ ਵਿੱਚ ਅਸਫਲ ਰਿਹਾ।