ਰੋਨਾਲਡੋ ਦੇ ਗੋਲ ਦੇ ਬਾਵਜੂਦ ਏਸ਼ੀਅਨ ਚੈਂਪੀਅਨਜ਼ ਲੀਗ ਤੋਂ ਬਾਹਰ ਹੋਇਆ ਅਲ ਨਾਸਰ

ਰਿਆਦ (ਸਾਊਦੀ ਅਰਬ) : ਮਹਾਨ ਖਿਡਾਰੀ ਕ੍ਰਿਸਟੀਆਨੋ ਰੋਨਾਲਡੋ ਦੇ ਇਕ ਗੋਲ ਦੇ ਬਾਵਜੂਦ ਅਲ ਨਾਸਰ ਦੀ ਟੀਮ ਹਾਰ ਨਾਲ ਏਸ਼ੀਅਨ ਚੈਂਪੀਅਨਜ਼ ਲੀਗ ਫੁੱਟਬਾਲ ਟੂਰਨਾਮੈਂਟ ਦੇ ਕੁਆਰਟਰ ਫਾਈਨਲ ਤੋਂ ਬਾਹਰ ਹੋ ਗਈ। ਅਲ ਨਾਸਰ ਨੇ ਸੋਮਵਾਰ ਨੂੰ ਸੰਯੁਕਤ ਅਰਬ ਅਮੀਰਾਤ ਦੇ ਅਲ ਆਇਨ ਦੇ ਖਿਲਾਫ ਪਹਿਲੇ ਗੇੜ ਵਿੱਚ 0-1 ਦੀ ਹਾਰ ਤੋਂ ਬਾਅਦ ਦੂਜਾ ਗੇੜ 4-3 ਨਾਲ ਜਿੱਤ ਲਿਆ।

ਹਾਲਾਂਕਿ ਮੈਚ ਕੁੱਲ ਮਿਲਾ ਕੇ 4-4 ਨਾਲ ਬਰਾਬਰੀ 'ਤੇ ਰਹਿਣ ਤੋਂ ਬਾਅਦ ਅਲ ਨਾਸਰ ਨੂੰ ਪੈਨਲਟੀ ਸ਼ੂਟ ਆਊਟ 'ਚ 1-3 ਨਾਲ ਹਾਰ ਦਾ ਸਾਹਮਣਾ ਕਰਨਾ ਪਿਆ। ਸ਼ੂਟ ਆਊਟ ਵਿੱਚ ਮੇਜ਼ਬਾਨ ਟੀਮ ਲਈ ਸਿਰਫ਼ ਰੋਨਾਲਡੋ ਹੀ ਗੋਲ ਕਰ ਸਕਿਆ। ਰੋਨਾਲਡੋ ਨੇ ਨਿਯਮਤ ਸਮੇਂ 'ਚ ਕਈ ਮੌਕੇ ਗੁਆਏ। ਇਕ ਮੌਕੇ 'ਤੇ, ਉਹ ਸਿਰਫ ਦੋ ਮੀਟਰ ਦੀ ਦੂਰੀ ਤੋਂ ਗੇਂਦ ਨੂੰ ਗੋਲ ਵਿਚ ਪਾਉਣ ਵਿਚ ਅਸਫਲ ਰਿਹਾ ਜਦੋਂ ਕਿ ਅਲ ਆਇਨ ਗੋਲਕੀਪਰ ਖਾਲਿਦ ਈਸਾ ਮੈਦਾਨ 'ਤੇ ਡਿੱਗਿਆ ਹੋਇਆ ਸੀ।

ਅਲ ਨਾਸਰ ਲਈ ਅਬਦੁਲ ਰਹਿਮਾਨ ਘਰੀਬ (45 ਪਲੱਸ ਪੰਜ ਮਿੰਟ), ਐਲੇਕਸ ਟੈਲੇਸ (72ਵੇਂ ਮਿੰਟ) ਅਤੇ ਰੋਨਾਲਡੋ (118ਵੇਂ ਮਿੰਟ) ਨੇ ਨਿਯਮਤ ਸਮੇਂ 'ਚ ਗੋਲ ਕੀਤੇ ਜਦਕਿ ਖਾਲਿਦ ਨੇ 51ਵੇਂ ਮਿੰਟ 'ਚ ਖੁਦ ਦਾ ਗੋਲ ਕੀਤਾ। ਅਲ ਆਇਨ ਲਈ ਸੋਫੀਅਨ ਰਹੀਮੀ (28ਵੇਂ ਅਤੇ 45ਵੇਂ ਮਿੰਟ) ਅਤੇ ਸੁਲਤਾਨ ਅਲ ਸ਼ਮਸੀ (103ਵੇਂ ਮਿੰਟ) ਨੇ ਗੋਲ ਕੀਤੇ।