ਜੋਸ਼ 'ਚ ਹੋਸ਼ ਖੋ ਰਿਹੈ ਅਫਰੀਕੀ ਤੇਜ਼ ਗੇਂਦਬਾਜ਼, ਲੱਗ ਸਕਦਾ ਹੈ ਬੈਨ (ਵੀਡੀਓ)

ਪੋਰਟ ਐਲੀਜਾਬੇਥ (ਬਿਊਰੋ)— ਦੱਖਣ ਅਫਰੀਕਾ ਦੇ ਤੇਜ਼ ਗੇਂਦਬਾਜ਼ ਕਾਗਿਸੋ ਰਬਾਡਾ (5/96) ਦੀ ਜ਼ਬਰਦਸਤ ਗੇਂਦਬਾਜ਼ੀ ਅੱਗੇ ਆਸਟਰੇਲੀਆਈ ਟੀਮ ਸੀਰੀਜ਼ ਦੇ ਦੂਜੇ ਟੈਸਟ ਮੈਚ ਦੇ ਪਹਿਲੇ ਹੀ ਦਿਨ ਬਿਖਰ ਗਈ। ਟਾਸ ਜਿੱਤ ਕੇ ਸੇਂਟ ਜਾਰਜ ਪਾਰਕ ਵਿਚ ਬੱਲੇਬਾਜ਼ੀ ਕਰਨ ਉਤਰੀ ਮਹਿਮਾਨ ਟੀਮ ਆਪਣੀ ਪਹਿਲੀ ਪਾਰੀ ਵਿਚ 243 ਦੌੜਾਂ ਉੱਤੇ ਸਿਮਟ ਗਈ।

ਪੋਰਟ ਐਲੀਜਾਬੇਥ ਟੈਸਟ ਮੈਚ ਦੇ ਪਹਿਲੇ ਦਿਨ ਰਬਾਡਾ ਆਪਣੇ ਪ੍ਰਦਰਸ਼ਨ ਤੋਂ ਜ਼ਿਆਦਾ ਆਪਣੀ ਆਕਰਾਮਕਤਾ ਦੀ ਵਜ੍ਹਾ ਨਾਲ ਸੁਰਖੀਆਂ ਵਿਚ ਰਹੇ, ਜੋ ਉਨ੍ਹਾਂ ਨੂੰ ਮਹਿੰਗੀ ਪੈ ਸਕਦੀ ਹੈ। ਰਬਾਡਾ ਉੱਤੇ ਦੋ ਟੈਸਟ ਮੈਚਾਂ ਦੀ ਪਾਬੰਦੀ ਦੀ ਤਲਵਾਰ ਲਟਕ ਰਹੀ ਹੈ। ਦਰਅਸਲ, ਸਟੀਵ ਸਮਿਥ ਨੂੰ ਐਲ.ਬੀ.ਡਬਲਿਊ. ਕਰਨ ਦੇ ਬਾਅਦ ਉਨ੍ਹਾਂ ਦੇ ਜਸ਼ਨ ਮਨਾਉਣ ਦੇ ਤਰੀਕੇ ਉੱਤੇ ਆਈ.ਸੀ.ਸੀ. ਦੀ ਨਜ਼ਰ ਹੈ। ਉਹ ਇਸ ਦੌਰਾਨ ਆਸਟਰੇਲੀਆਈ ਕਪਤਾਨ ਦੇ ਬਿਲਕੁੱਲ ਕਰੀਬ ਜਾ ਪੁੱਜੇ ਸਨ ਅਤੇ ਉਨ੍ਹਾਂ ਨੂੰ ਭੜਕਾਉਣ ਦੀ ਕੋਸ਼ਿਸ਼ ਕੀਤੀ, ਪਰ ਸਮਿਥ ਨੇ ਆਪਣਾ ਆਪਾ ਨਹੀਂ ਖੋਇਆ।

22 ਸਾਲ ਦੇ ਰਬਾਡਾ ਦੇ ਨਾਮ ਪਹਿਲੇ ਹੀ 5 ਡੀਮੈਰਿਟ ਪੁਆਇੰਟ ਜੁੜ ਚੁੱਕੇ ਹਨ। ਤਿੰਨ ਹੋਰ ਡੀਮੈਰਿਟ ਪੁਆਇੰਟ ਮਿਲਦੇ ਹੀ ਉਨ੍ਹਾਂ ਉੱਤੇ ਦੋ ਟੈਸਟ ਮੈਚਾਂ ਦੀ ਪਾਬੰਦੀ ਲੱਗ ਸਕਦੀ ਹੈ। ਆਈ.ਸੀ.ਸੀ. ਨਿਯਮਾਂ ਮੁਤਾਬਕ 24 ਮਹੀਨੇ ਦੇ ਅੰਦਰ 8 ਡੀਮੈਰਿਟ ਪੁਆਇੰਟ ਮਿਲਣ ਨਾਲ ਅਜਿਹਾ ਸੰਭਵ ਹੈ।
ਇਸ ਸਾਲ ਪਿਛਲੇ ਮਹੀਨੇ ਭਾਰਤ ਖਿਲਾਫ ਸੇਂਟ ਜਾਰਜ ਪਾਰਕ ਵਨਡੇ ਵਿਚ ਰਬਾਡਾ ਦੇ ਡੀਮੈਰਿਟ ਪੁਆਇੰਟ ਦੀ ਗਿਣਤੀ 5 ਹੋ ਗਈ ਸੀ। ਤੱਦ ਰਬਾਡਾ ਨੇ ਪੈਵੀਲੀਅਨ ਪਰਤ ਰਹੇ ਸ਼ਿਖਰ ਧਵਨ ਨੂੰ ਬਾਏ-ਬਾਏ ਦਾ ਇਸ਼ਾਰਾ ਕੀਤਾ ਸੀ।