62 ਚੌਕੇ, 10 ਛੱਕੇ.. ਬੱਲੇਬਾਜ਼ ਨੇ ਇਕੱਲੇ ਹੀ ਬਣਾਈਆਂ 501 ਦੌੜਾਂ, ਗੇਂਦਬਾਜ਼ਾਂ ਦੀ ਕਰਾਈ ਤੌਬਾ-ਤੌਬਾ

ਨਵੀਂ ਦਿੱਲੀ : ਕ੍ਰਿਕਟ ਜਗਤ ਵਿੱਚ ਜਦੋਂ ਵੀ ਸਭ ਤੋਂ ਲੰਬੀਆਂ ਅਤੇ ਯਾਦਗਾਰ ਪਾਰੀਆਂ ਦੀ ਗੱਲ ਹੁੰਦੀ ਹੈ, ਤਾਂ ਵੈਸਟਇੰਡੀਜ਼ ਦੇ ਮਹਾਨ ਬੱਲੇਬਾਜ਼ ਬ੍ਰਾਇਨ ਲਾਰਾ ਦਾ ਨਾਮ ਸਭ ਤੋਂ ਪਹਿਲਾਂ ਯਾਦ ਆਉਂਦਾ ਹੈ। ਅੱਜ ਤੋਂ ਲਗਭਗ 30 ਸਾਲ ਪਹਿਲਾਂ, 1994 ਵਿੱਚ ਵਾਰਵਿਕਸ਼ਾਇਰ ਅਤੇ ਡਰਹਮ ਵਿਚਕਾਰ ਖੇਡੇ ਗਏ ਇੱਕ ਫਸਟ-ਕਲਾਸ ਮੈਚ ਵਿੱਚ ਲਾਰਾ ਨੇ 501 ਦੌੜਾਂ ਦੀ ਅਜੇਤੂ ਪਾਰੀ ਖੇਡ ਕੇ ਇਤਿਹਾਸ ਰਚ ਦਿੱਤਾ ਸੀ। ਇਹ ਕ੍ਰਿਕਟ ਇਤਿਹਾਸ ਵਿੱਚ ਪਹਿਲੀ ਵਾਰ ਸੀ ਜਦੋਂ ਕਿਸੇ ਬੱਲੇਬਾਜ਼ ਨੇ ਫਸਟ-ਕਲਾਸ ਮੈਚ ਵਿੱਚ 500 ਦੌੜਾਂ ਦਾ ਅੰਕੜਾ ਪਾਰ ਕੀਤਾ ਹੋਵੇ। ਇਸ ਤੋਂ ਪਹਿਲਾਂ ਇਹ ਰਿਕਾਰਡ ਪਾਕਿਸਤਾਨ ਦੇ ਹਨੀਫ ਮੁਹੰਮਦ (499 ਦੌੜਾਂ) ਦੇ ਨਾਮ ਸੀ।

ਮਹਿਜ਼ 427 ਗੇਂਦਾਂ ਵਿੱਚ ਮਾਰਿਆ 'ਪੰਜਾ'
ਬ੍ਰਾਇਨ ਲਾਰਾ ਉਸ ਸਮੇਂ ਬੱਲੇਬਾਜ਼ੀ ਕਰਨ ਆਏ ਜਦੋਂ ਉਨ੍ਹਾਂ ਦੀ ਟੀਮ ਦਾ ਸਕੋਰ ਸਿਰਫ਼ 8 ਦੌੜਾਂ 'ਤੇ ਇੱਕ ਵਿਕਟ ਸੀ। ਇਸ ਤੋਂ ਬਾਅਦ ਉਨ੍ਹਾਂ ਨੇ ਅਜਿਹੀ ਤੂਫਾਨੀ ਬੱਲੇਬਾਜ਼ੀ ਕੀਤੀ ਕਿ ਵਿਰੋਧੀ ਗੇਂਦਬਾਜ਼ਾਂ ਦੇ ਛੱਕੇ ਛੁਡਾ ਦਿੱਤੇ। ਲਾਰਾ ਨੇ ਆਪਣੀ 501 ਦੌੜਾਂ ਦੀ ਪਾਰੀ ਵਿੱਚ 62 ਚੌਕੇ ਅਤੇ 10 ਛੱਕੇ ਜੜੇ। ਹੈਰਾਨੀ ਦੀ ਗੱਲ ਇਹ ਹੈ ਕਿ ਜਿੱਥੇ ਡਰਹਮ ਦੀ ਪੂਰੀ ਟੀਮ ਨੇ ਮਿਲ ਕੇ 76 ਬਾਊਂਡਰੀਆਂ ਲਗਾਈਆਂ ਸਨ, ਉੱਥੇ ਲਾਰਾ ਨੇ ਇਕੱਲਿਆਂ ਹੀ 72 ਬਾਊਂਡਰੀਆਂ (ਚੌਕੇ+ਛੱਕੇ) ਮਾਰੀਆਂ ਸਨ। ਇਸ ਪਾਰੀ ਸਦਕਾ ਵਾਰਵਿਕਸ਼ਾਇਰ ਨੇ 4 ਵਿਕਟਾਂ ਦੇ ਨੁਕਸਾਨ 'ਤੇ 810 ਦੌੜਾਂ ਦਾ ਵਿਸ਼ਾਲ ਸਕੋਰ ਖੜ੍ਹਾ ਕੀਤਾ ਸੀ।

ਟੈਸਟ ਕ੍ਰਿਕਟ ਵਿੱਚ ਵੀ ਲਾਰਾ ਦਾ ਦਬਦਬਾ
ਲਾਰਾ ਦੀ ਤੁਲਨਾ ਅਕਸਰ ਭਾਰਤ ਦੇ ਮਹਾਨ ਬੱਲੇਬਾਜ਼ ਸਚਿਨ ਤੇਂਦੁਲਕਰ ਨਾਲ ਕੀਤੀ ਜਾਂਦੀ ਰਹੀ ਹੈ, ਪਰ ਲੰਬੀਆਂ ਪਾਰੀਆਂ ਖੇਡਣ ਦੇ ਮਾਮਲੇ ਵਿੱਚ ਲਾਰਾ ਸਚਿਨ ਤੋਂ ਵੀ ਅੱਗੇ ਨਿਕਲ ਗਏ। ਫਸਟ-ਕਲਾਸ ਦੇ ਸਭ ਤੋਂ ਵੱਡੇ ਸਕੋਰ ਤੋਂ ਇਲਾਵਾ, ਟੈਸਟ ਕ੍ਰਿਕਟ ਵਿੱਚ ਸਭ ਤੋਂ ਵੱਡੀ ਪਾਰੀ (400 ਅਜੇਤੂ) ਖੇਡਣ ਦਾ ਵਿਸ਼ਵ ਰਿਕਾਰਡ ਵੀ ਅੱਜ ਵੀ ਬ੍ਰਾਇਨ ਲਾਰਾ ਦੇ ਨਾਮ ਹੀ ਹੈ, ਜੋ ਉਨ੍ਹਾਂ ਨੇ 2004 ਵਿੱਚ ਇੰਗਲੈਂਡ ਵਿਰੁੱਧ ਬਣਾਇਆ ਸੀ। ਲਾਰਾ ਨੇ ਆਪਣੇ 131 ਟੈਸਟ ਮੈਚਾਂ ਦੇ ਕਰੀਅਰ ਵਿੱਚ 34 ਸੈਂਕੜਿਆਂ ਦੀ ਮਦਦ ਨਾਲ 11,953 ਦੌੜਾਂ ਬਣਾਈਆਂ ਹਨ।