ਆਸ਼ਿਕ ਨਾਲ ਮਿਲ ਔਰਤ ਨੇ ਕਰ 'ਤਾ ਵੱਡਾ ਕਾਂਡ, ਪੂਰਾ ਮਾਮਲਾ ਜਾਣ ਲੱਗੇਗਾ ਝਟਕਾ

ਭਵਾਨੀਗੜ੍ਹ (ਵਿਕਾਸ ਮਿੱਤਲ) : ਨੇੜਲੇ ਪਿੰਡ ਰੇਤਗੜ੍ਹ ਵਿਖੇ ਇਕ ਸਨਸਨੀਖੇਜ਼ ਮਾਮਲਾ ਸਾਹਮਣੇ ਆਇਆ ਹੈ ਜਿੱਥੇ ਦੋ ਬੱਚਿਆਂ ਦੀ ਮਾਂ ਨੇ ਆਪਣੇ ਪ੍ਰੇਮੀ ਨਾਲ ਮਿਲ ਕੇ ਕਥਿਤ ਤੌਰ 'ਤੇ ਆਪਣੇ ਹੀ ਪਤੀ ਨੂੰ ਕਤਲ ਕਰਵਾਉਣ ਦੀ ਮਨਸ਼ਾ ਨਾਲ ਅਗਵਾ ਕਰਵਾ ਦਿੱਤਾ। ਫਿਲਹਾਲ ਪੁਲਸ ਮਾਮਲੇ ਦੀ ਜਾਂਚ ਕਰਨ ਵਿਚ ਜੁਟੀ ਹੋਈ ਹੈ। ਪੁਲਸ ਨੇ ਕੇਸ ਦਰਜ ਕਰਕੇ ਔਰਤ ਨੂੰ ਗ੍ਰਿਫ਼ਤਾਰ ਕਰ ਲਿਆ ਹੈ ਜਦਕਿ ਪ੍ਰੇਮੀ ਫਰਾਰ ਦੱਸਿਆ ਜਾ ਰਿਹਾ ਹੈ। ਮਾਮਲੇ ਸਬੰਧੀ ਸ਼ਿੰਦਰਪਾਲ ਸਿੰਘ ਵਾਸੀ ਰਤੀਆ ਨੇ ਭਵਾਨੀਗੜ੍ਹ ਪੁਲਸ ਕੋਲ ਬਿਆਨ ਦਰਜ ਕਰਵਾਏ ਕਿ ਉਸਦਾ ਵਿਆਹ 2017 ਵਿਚ ਬੱਗਾ ਸਿੰਘ (50) ਵਾਸੀ ਰੇਤਗੜ੍ਹ ਦੀ ਲੜਕੀ ਕਿਰਨਪਾਲ ਕੌਰ ਨਾਲ ਹੋਇਆ ਸੀ। ਉਸਦਾ ਸਹੁਰਾ ਬੱਗਾ ਸਿੰਘ ਭਾਦਸੋਂ ਨੇੜੇ ਇਕ ਭੱਠੇ 'ਤੇ ਟਰੈਕਟਰ ਚਲਾਉਣ ਦਾ ਕੰਮ ਕਰਦਾ ਸੀ, ਸਾਲਾ ਵਿਦੇਸ਼ ਰਹਿੰਦਾ ਹੈ ਜਦੋਂਕਿ ਉਸਦੀ ਸੱਸ ਬੇਅੰਤ ਕੌਰ ਰੇਤਗੜ੍ਹ ਵਿਖੇ ਘਰ ਇਕੱਲੀ ਰਹਿੰਦੀ ਸੀ ਜਿਸਦੇ ਕਾਫੀ ਸਮਾਂ ਪਹਿਲਾਂ ਸਤਨਾਮ ਸਿੰਘ ਵਾਸੀ ਬਿਜਲਪੁਰ ਨਾਲ ਸੰਬੰਧ ਬਣ ਗਏ ਸਨ। 

ਇਹ ਵੀ ਪੜ੍ਹੋ : ਰਾਸ਼ਨ ਕਾਰਡ ਨੂੰ ਲੈ ਕੇ ਪੰਜਾਬ ਸਰਕਾਰ ਵੱਲੋਂ ਨਵੇਂ ਹੁਕਮ ਜਾਰੀ

ਸ਼ਿਕਾਇਤਕਰਤਾ ਅਨੁਸਾਰ ਉਕਤ ਸਤਨਾਮ ਸਿੰਘ ਸਹੁਰੇ ਦੀ ਗੈਰ ਮੌਜੂਦਗੀ ਵਿਚ ਸਹੁਰੇ ਘਰ ਆਉਂਦਾ ਸੀ ਜਿਸ ਬਾਰੇ ਪਤਾ ਲੱਗਣ 'ਤੇ ਉਸਦੇ ਸਹੁਰੇ ਨੇ ਬੇਅੰਤ ਕੌਰ ਨੂੰ ਕਾਫੀ ਸਮਝਾਉਣ ਦੀ ਕੋਸ਼ਿਸ਼ ਕੀਤੀ ਪਰੰਤੂ ਬੇਅੰਤ ਕੌਰ ਨੇ ਸਤਨਾਮ ਸਿੰਘ ਨੂੰ ਘਰ ਬਲਾਉਣਾ ਬੰਦ ਨਹੀਂ ਕੀਤਾ। ਸ਼ਿੰਦਰਪਾਲ ਸਿੰਘ ਨੇ ਸ਼ਿਕਾਇਤ 'ਚ ਦੱਸਿਆ ਕਿ ਬੀਤੀ 21 ਤਾਰੀਖ ਨੂੰ ਉਸਦਾ ਸਹੁਰਾ ਬੱਗਾ ਸਿੰਘ ਘਰੋਂ ਗਿਆ ਸੀ ਪਰੰਤੂ ਘਰ ਵਾਪਸ ਨਹੀਂ ਆਇਆ ਜਿਸ ਬਾਰੇ ਪਤਾ ਲੱਗਣ 'ਤੇ ਜਦੋਂ ਬੇਅੰਤ ਕੌਰ ਨੂੰ ਪੁੱਛਿਆ ਗਿਆ ਤਾਂ ਉਹ ਵਾਰ-ਵਾਰ ਆਪਣੀ ਗੱਲ ਬਦਲਦੀ ਰਹੀ ਜਿਸ ਕਰਕੇ ਸਾਨੂੰ ਯਕੀਨ ਹੈ ਬੇਅੰਤ ਕੌਰ ਨੇ ਉਕਤ ਸਤਨਾਮ ਸਿੰਘ ਨੂੰ ਸ਼ਹਿ ਦੇ ਕੇ ਉਸਦੇ ਸਹੁਰੇ ਬੱਗਾ ਸਿੰਘ ਨੂੰ ਮਰਵਾਉਣ ਦੇ ਮਕਸਦ ਨਾਲ ਅਗਵਾ ਕਰਵਾਇਆ ਹੈ।

 ਇਹ ਵੀ ਪੜ੍ਹੋ : ਪੰਜਾਬ ਮੰਤਰੀ ਮੰਡਲ ਦੀ ਮੀਟਿੰਗ 'ਚ ਵੱਡੇ ਐਲਾਨ, ਸੂਬੇ ਵਿਚ ਇਸ ਐਕਟ ਨੂੰ ਲਾਗੂ ਕਰਨ ਨੂੰ ਮਨਜ਼ੂਰੀ

ਮਾਮਲੇ ਸਬੰਧੀ ਪੁਲਸ ਦੇ ਜਾਂਚ ਅਧਿਕਾਰੀ ਐੱਸ.ਆਈ. ਜਸਵੀਰ ਸਿੰਘ ਨੇ ਦੱਸਿਆ ਕਿ ਸ਼ਿੰਦਰਪਾਲ ਸਿੰਘ ਦੇ ਬਿਆਨਾਂ 'ਤੇ ਪੁਲਸ ਨੇ ਬੇਅੰਤ ਕੌਰ 'ਤੇ ਸਤਨਾਮ ਸਿੰਘ ਖਿਲਾਫ਼ ਪਰਚਾ ਦਰਜ ਕਰ ਲਿਆ ਹੈ। ਪੁਲਸ ਵੱਲੋਂ ਔਰਤ ਨੂੰ ਗ੍ਰਿਫ਼ਤਾਰ ਕਰਕੇ ਮਾਮਲੇ ਦੀ ਹਰੇਕ ਪੱਖ ਤੋਂ ਗੰਭੀਰਤਾ ਨਾਲ ਜਾਂਚ ਕੀਤੀ ਜਾ ਰਹੀ ਹੈ। ਫਿਲਹਾਲ ਬੁੱਧਵਾਰ ਦੁਪਹਿਰ ਤੱਕ ਬੱਗਾ ਸਿੰਘ ਦਾ ਕੋਈ ਸੁਰਾਗ ਨਹੀਂ ਮਿਲ ਸਕਿਆ ਸੀ।