ਬਾਬਾ ਰੋਡੂ ਬਸਤੀ ''ਚ 13 ਸਾਲਾਂ ਬੱਚੇ ਦੇ ਵਾਲ ਕੱਟੇ ਜਾਣ ਦੀ ਘਟਨਾ ਆਈ ਸਾਹਮਣੇ
08/12/2017 1:53:53 AM
ਬਾਘਾਪੁਰਾਣਾ, (ਚਟਾਨੀ, ਮੁਨੀਸ਼)- ਸਥਾਨਕ ਸ਼ਹਿਰ ਦੀ ਬਾਬਾ ਰੋਡੂ ਬਸਤੀ 'ਚ ਇਕ 13 ਸਾਲਾਂ ਲੜਕੇ ਕੁਲਵਿੰਦਰ ਸਿੰਘ ਦੇ ਵਾਲ ਕੱਟੇ ਜਾਣ ਦੀ ਖਬਰ ਹੈ। ਘਟਨਾ ਉਸ ਵੇਲੇ ਵਾਪਰੀ, ਜਦ ਕੁਲਵਿੰਦਰ ਸਵੇਰੇ ਨਹਾ ਰਿਹਾ ਸੀ। ਵਿਹੜੇ 'ਚ ਬੈਠੇ ਉਸ ਦੇ ਪਰਿਵਾਰਕ ਮੈਂਬਰਾਂ ਨੇ ਗੁਸਲਖਾਨੇ 'ਚੋਂ ਬੱਚੇ ਦੀ ਚੀਕ ਸੁਣ ਕੇ ਜਦ ਦਰਵਾਜ਼ਾ ਖੋਲ੍ਹਿਆ ਤਾਂ ਕੁਲਵਿੰਦਰ ਬੇਹੋਸ਼ੀ ਦੀ ਹਾਲਤ 'ਚ ਫਰਸ਼ 'ਤੇ ਪਿਆ ਸੀ, ਜਿਸ ਦੇ ਸਿਰ ਤੋਂ ਬਿਲਕੁੱਲ ਨਾ ਮਾਤਰ ਵਾਲ ਕੱਟੇ ਹੋਏ ਮਿਲੇ। ਕੁਲਵਿੰਦਰ ਨੂੰ ਪਰਿਵਾਰਕ ਮੈਂਬਰਾਂ ਵੱਲੋਂ ਹਸਪਤਾਲ 'ਚ ਚੁੱਕ ਕੇ ਲਿਜਾਇਆ ਗਿਆ। ਨਿੱਜੀ ਹਸਪਤਾਲ ਦੇ ਡਾਕਟਰ ਨੇ ਦੱਸਿਆ ਕਿ ਬੱਚੇ 'ਚ ਉਨ੍ਹਾਂ ਨੂੰ ਕੋਈ ਬੇਹੋਸ਼ੀ ਵਾਲੀ ਗੱਲ ਨਹੀਂ ਲੱਗੀ ਪਰ ਫਿਰ ਵੀ ਉਨ੍ਹਾਂ ਨੇ ਉਸ ਨੂੰ ਦਵਾਈ ਦੇ ਦਿੱਤੀ ਹੈ ਪਰ ਬੱਚਾ ਬਿਲਕੁੱਲ ਆਮ ਅਵਸਥਾ 'ਚ ਹੈ। ਕੁਲਵਿੰਦਰ ਜੋ ਕਿ ਸੱਤਵੀਂ ਜਮਾਤ ਦਾ ਵਿਦਿਆਰਥੀ ਹੈ, ਘਟਨਾ ਬਾਰੇ ਪੁੱਛੇ ਜਾਣ 'ਤੇ ਉਸ ਨੇ ਕਿਹਾ ਕਿ ਸੰਤਰੀ ਰੰਗ ਦੇ ਕੱਪੜਿਆਂ ਵਾਲਾ ਇਕ ਮੋਨਾ ਵਿਅਕਤੀ ਗੁਸਲਖਾਨੇ 'ਚ ਆਇਆ ਅਤੇ ਉਸ ਦੇ ਵਾਲ ਕੱਟ ਕੇ ਚਲਾ ਗਿਆ ਪਰ ਜਦ ਉਸ ਨੂੰ ਕਿਹਾ ਕਿ ਬਾਹਰ ਵਿਹੜੇ 'ਚ ਤਾਂ ਤੁਹਾਡਾ ਸਾਰਾ ਪਰਿਵਾਰ ਬੈਠਾ ਸੀ ਤਾਂ ਉਹ ਵਿਅਕਤੀ ਕਿਵੇਂ ਆਇਆ ਅਤੇ ਕਿਵੇਂ ਵਾਪਸ ਚਲਾ ਗਿਆ। ਇਸ ਗੱਲ ਦਾ ਉਸ ਕੋਲ ਕੋਈ ਜਵਾਬ ਨਹੀਂ ਸੀ, ਉਹ ਚੁੱਪ-ਚਾਪ ਬੈਠਾ ਰਿਹਾ।
ਸੂਝਵਾਨ ਲੋਕ ਇਸ ਨੂੰ ਬੀਮਾਰ ਮਾਨਸਿਕਤਾ ਦੀ ਉਪਜ ਕਹਿ ਰਹੇ ਹਨ ਅਤੇ ਕੁੱਝ ਇਸ ਨੂੰ ਸਿਰਫ ਇਕ ਸ਼ਰਾਰਤ ਕਹਿ ਰਹੇ ਹਨ ਪਰ ਲੜਕੇ ਦੇ ਪਿਤਾ ਜਸਵੀਰ ਸਿੰਘ ਅਤੇ ਘਰ ਦੀਆਂ ਸੁਆਣੀਆਂ ਇਸ ਗੱਲ ਨੂੰ ਲੈ ਕੇ ਸਹਿਮੇ ਹੋਏ ਹਨ। ਵਿਗਿਆਨਿਕ ਵਿਚਾਰਧਾਰਾ ਦੇ ਧਾਰਨੀ ਲੋਕਾਂ ਤੋਂ ਇਲਾਵਾ ਪੁਲਸ ਵੀ ਅਜਿਹੀਆਂ ਘਟਨਾਵਾਂ ਪਿੱਛੇ ਕਿਸੇ ਤਰ੍ਹਾਂ ਦੀ ਗੈਬੀ ਸ਼ਕਤੀ ਹੋਣ ਦੀ ਗੱਲ ਨੂੰ ਮੁੱਢੋਂ ਰੱਦ ਕਰ ਰਹੇ ਹਨ ਅਤੇ ਲੋਕਾਂ ਨੂੰ ਅਜਿਹੀਆਂ ਬੇਤਰਕ ਘਟਨਾਵਾਂ 'ਤੇ ਵਿਸ਼ਵਾਸ ਨਾ ਕਰਨ ਦੀ ਅਪੀਲ ਕਰ ਰਹੇ ਹਨ।
