ਨੌਗੱਜਾ ਸਹਿਕਾਰੀ ਸਭਾ ''ਚ ਕਰੋੜਾਂ ਦਾ ਘਪਲਾ: ਸਕੱਤਰ ਤੇ ਪ੍ਰਧਾਨ ਸਣੇ 4 ਖ਼ਿਲਾਫ਼ ਕੇਸ ਦਰਜ, ਜਾਇਦਾਦਾਂ ਹੋਣਗੀਆਂ ਅਟੈਚ

ਕਿਸ਼ਨਗੜ੍ਹ (ਬੈਂਸ) : ਦੀ ਨੌਗੱਜਾ ਕੋ-ਆਪ ਐਗਰੀਕਲਚਰ ਬਹੁਮੰਤਵੀ ਸਰਵਿਸ ਸੋਸਾਇਟੀ ਲਿਮਟਿਡ, ਜੋ ਕਿ ਤਿੰਨ ਪਿੰਡਾਂ ਨੌਗੱਜਾ, ਕਾਲਾ ਬਾਹੀਆਂ ਤੇ ਮੰਡ ਮੌੜ ਦੀ ਸਾਂਝੀ ਸਹਿਕਾਰੀ ਸਭਾ ਹੈ। ਕਿਸਾਨ ਤੇ ਆਮ ਲੋਕ ਇਸ ਸੋਸਾਇਟੀ ’ਚ ਆਪਣੇ ਬੱਚਤ ਖਾਤਾ ਐੱਫ. ਡੀ., ਲਿਮਟਾਂ ਆਦਿ ਦਾ ਲੈਣ-ਦੇਣ ਪਿਛਲੇ ਲੰਮੇ ਸਮੇਂ ਤੋਂ ਕਰਦੇ ਆ ਰਹੇ ਸਨ। ਸਹਿਕਾਰੀ ਸਭਾ ’ਚ ਆਮ ਲੋਕਾਂ ਤੇ ਕਿਸਾਨਾਂ ਨੇ ਆਪਣੀਆਂ ਰਕਮਾਂ ਦੀਆਂ ਐੱਫ. ਡੀਆਂ ਬਣਾਈਆਂ ਹੋਈਆਂ ਸਨ। ਅਚਾਨਕ ਕਰੀਬ ਦੋ ਮਹੀਨੇ ਪਹਿਲਾਂ ਜਦੋਂ ਸਹਿਕਾਰੀ ਸਭਾ ਦਾ ਸਕੱਤਰ ਦਫਤਰ ਵਿਚੋਂ ਗੈਰ ਹਾਜ਼ਰ ਰਹਿਣ ਲੱਗਾ ਤਾਂ ਲੋਕਾਂ ਨੂੰ ਸ਼ੱਕ ਪੈਣ ’ਤੇ ਉਨ੍ਹਾਂ ਆਪਣੀਆਂ ਐੱਫ. ਡੀਜ਼ ਤੇ ਬੈਂਕ ਖਾਤੇ ਚੈੱਕ ਕਰਨੇ ਸ਼ੁਰੂ ਕਰ ਦਿੱਤੇ।

ਤਿੰਨਾਂ ਪਿੰਡਾਂ ਦੇ ਖਾਤਾ ਧਾਰਕ ਕਿਸਾਨਾਂ ਤੇ ਮੋਹਤਵਾਰਾਂ ਨੇ ਜਦੋਂ ਇਹ ਮਾਮਲਾ ਚੁੱਕਿਆ ਤਾਂ ਬਾਅਦ ’ਚ ਵਿਭਾਗ ਦੇ ਇੰਸਪੈਕਟਰ ਵੱਲੋਂ ਸਭਾ ਦੇ ਦਫਤਰ ’ਚ ਪਹੁੰਚ ਕੇ ਰਿਕਾਰਡ ਚੈੱਕ ਕਰਨਾ ਸ਼ੁਰੂ ਕੀਤਾ ਤਾਂ ਉਸ ’ਚ ਘਪਲਾ ਹੋਣ ਦੀ ਸ਼ੰਕਾ ਪਿਆ। ਪਿਛਲੇ ਦਿਨਾਂ ਤੋਂ ਵਿਭਾਗ ਦੀ ਚੱਲ ਰਹੀ ਜਾਂਚ ਉਪਰੰਤ ਕੁਝ ਖਾਤਾ ਧਾਰਕਾਂ ਦੀ ਸ਼ਿਕਾਇਤ ’ਤੇ ਸਹਿਕਾਰੀ ਸਭਾ ਦੇ ਸਕੱਤਰ ਰਣਜੀਤ ਸਿੰਘ, ਸੇਲਜਮੈਨ ਕੁਲਦੀਪ ਕੁਮਾਰ ਤੇ ਪ੍ਰਧਾਨ ਗੁਰਮੀਤ ਸਿੰਘ, ਵਾਈਸ ਪ੍ਰਧਾਨ ਨਿਰਮਲ ਸਿੰਘ ਆਦਿ ’ਤੇ ਪੁਲਿਸ ਨੇ ਵੱਖ-ਵੱਖ ਧਰਾਵਾਂ ਤਹਿਤ ਮਾਮਲਾ ਦਰਜ ਕਰ ਲਿਆ ਗਿਆ ਹੈ। ਸਹਿਕਾਰਤਾ ਵਿਭਾਗ ਵੱਲੋਂ ਲੋਕਾਂ ਦੇ ਪੈਸਿਆਂ ਦੀ ਅਦਾਇਗੀ ਕਰਨ ਲਈ ਦੋਸ਼ੀਆਂ ਦੀਆਂ ਜਾਇਦਾਦਾਂ ਅਟੈਚ ਕਰਨ ਦੀ ਤਿਆਰੀ ਕੀਤੀ ਜਾ ਰਹੀ। ਇਸ ਸਬੰਧੀ ਅੱਜ ਸਹਿਕਾਰਤਾ ਵਿਭਾਗ ਵੱਲੋਂ ਸਹਿਕਾਰੀ ਸਭਾ ਨੌਗੱਜਾ ’ਚ ਆਮ ਇਜਲਾਸ ਸੱਦਿਆ ਗਿਆ ਸੀ, ਜਿਸ ’ਚ ਵਿਭਾਗ ਦੇ ਇੰਸਪੈਕਟਰ ਰੋਹਿਨ ਜੌਨ ਆਪਣੀ ਟੀਮ ਸਮੇਤ ਪੁੱਜੇ, ਜਿੱਥੇ ਭਾਰੀ ਗਿਣਤੀ ’ਚ ਤਿੰਨਾਂ ਪਿੰਡਾਂ ਦੇ ਖਾਤਾ ਧਾਰਕਾਂ ਵੱਲੋਂ ਆਪਣੀਆਂ ਬੈਂਕ ਕਾਪੀਆਂ ਤੇ ਐੱਫ. ਡੀਜ਼ ਲੈ ਕੇ ਪਹੁੰਚੇ, ਜਿਨ੍ਹਾਂ ਵਿਭਾਗ ਦੇ ਅਧਿਕਾਰੀਆਂ ਨੂੰ ਆਪਣੇ ਸਾਰੇ ਵੇਰਵੇ ਨੋਟ ਕਰਵਾਏ ਗਏ ਹਨ। ਇਸ ਮੌਕੇ ਪੰਜ ਮੈਂਬਰੀ ਸਬ ਕਮੇਟੀ ਦਾ ਗਠਨ ਕੀਤਾ ਗਿਆ ਹੈ ਤਾਂ ਜੋ ਸਹਿਕਾਰੀ ਸਭਾ ਨੂੰ ਮੁੜ ਤੋਂ ਚਾਲੂ ਕੀਤਾ ਜਾ ਸਕੇ।

ਇਸ ਮੌਕੇ ਖਾਤਾ ਧਾਰਕ ਕੁਲਵੰਤ ਸਿੰਘ ਪੁੱਤਰ ਕਰਮ ਸਿੰਘ ਨਿਵਾਸੀ ਨੌਗੱਜਾ, ਜਿਸ ਦੀ 34 ਲੱਖ ਰੁਪਏ ਦੀ ਐੱਫ. ਡੀ., ਤ੍ਰਿਲੋਕ ਸਿੰਘ ਪੁੱਤਰ ਕਾਬਲ ਸਿੰਘ ਨਿਵਾਸੀ ਮੰਡ ਮੌੜ ਦੀ 29 ਲੱਖ ਰੁਪਏ ਦੀ ਐੱਫ. ਡੀ., ਸੁਖਜਿੰਦਰ ਸਿੰਘ ਪੁੱਤਰ ਮਲਕੀਤ ਸਿੰਘ ਨਿਵਾਸੀ ਮੰਡ ਮੌੜ ਦੇ 11 ਲੱਖ ਰੁਪਏ, ਅਵਤਾਰ ਸਿੰਘ ਪੁੱਤਰ ਦਰਸ਼ਨ ਸਿੰਘ ਜਿਸ ਦੀ ਇਕ ਕਰੋੜ 62 ਲੱਖ ਰੁਪਏ ਦੀ ਐੱਫ. ਡੀ., ਹਰਬੰਸ ਕੌਰ ਪਤਨੀ ਅਵਤਾਰ ਸਿੰਘ ਨਿਵਾਸੀ ਨੌਗੱਜਾ, ਜਿਸ ਦੀ ਇਕ ਕਰੋੜ 25 ਲੱਖ ਰੁਪਏ ਦੀ ਐੱਫ. ਡੀ., ਕੁਲਵਿੰਦਰ ਸਿੰਘ ਪੁੱਤਰ ਗੁਰਦਿਆਲ ਸਿੰਘ ਨਿਵਾਸੀ ਮੰਡ ਮੌੜ 5 ਲੱਖ ਰੁਪਏ, ਭਜਨ ਸਿੰਘ ਪੁੱਤਰ ਅਮਰ ਸਿੰਘ ਨਿਵਾਸੀ ਮੰਡ ਮੌੜ 12 ਲੱਖ ਰੁਪਏ, ਕੁਲਦੀਪ ਸਿੰਘ ਪੁੱਤਰ ਭਜਨ ਸਿੰਘ ਨਿਵਾਸੀ ਮੰਡ ਮੌੜ 2 ਲੱਖ, ਕਸ਼ਮੀਰ ਸਿੰਘ ਪੁੱਤਰ ਤੇਜਾ ਸਿੰਘ ਨਿਵਾਸੀ ਮੰਡ ਮੌੜ 2 ਲੱਖ ਰੁਪਏ, ਸਰਬਜੀਤ ਕੁਮਾਰ ਪੁੱਤਰ ਰਾਮ ਸ਼ਰਨ ਨੌਗੱਜਾ ਇਕ ਲੱਖ ਰੁਪਏ, ਰਘਵੀਰ ਸਿੰਘ ਪੁੱਤਰ ਸਾਧੂ ਸਿੰਘ ਨਿਵਾਸੀ ਨੌਗੱਜਾ 19 ਲੱਖ, ਗੁਰਦੁਆਰਾ ਰਾਮਗੜੀਆ ਸਾਹਿਬ ਨੌਗੱਜਾ ਦੇ 2 ਲੱਖ 65 ਹਜ਼ਾਰ ਰੁਪਏ, ਗੁਰਪਾਲ ਸਿੰਘ ਪੁੱਤਰ ਤਰਸੇਮ ਸਿੰਘ ਨਿਵਾਸੀ ਕਾਲਾ ਬਾਹੀਆਂ 10 ਲੱਖ ਰੁਪਏ ਆਦਿ ਤੋਂ ਇਲਾਵਾ ਹੋਰ ਵੀ ਖਾਤਾ ਧਾਰਕਾਂ ਦੀਆਂ ਐੱਫ. ਡੀਜ਼ ਤੇ ਬੱਚਤ ਖਾਤਿਆਂ ਦਾ ਵੇਰਵਾ ਹੈ।

ਇਹ ਵੀ ਪੜ੍ਹੋ : ਨਗਰ ਨਿਗਮ ਨੇ ਕਾਰਾਬਾਰਾ ਰੋਡ 'ਤੇ ਛੇ ਗੈਰ-ਕਾਨੂੰਨੀ ਦੁਕਾਨਾਂ ਕੀਤੀਆਂ ਸੀਲ

ਮੌਕੇ ’ਤੇ ਹਾਜ਼ਰੀਨ ਵਿਚੋਂ ਕੁਝ ਵਿਅਕਤੀਆਂ ਨੇ ਦੱਸਿਆ ਕਿ ਕਰੀਬ ਲੋਕਾਂ ਦੀਆਂ 12 ਕਰੋੜ ਰੁਪਏ ਦੀਆਂ ਐੱਫ. ਡੀਜ਼ ਹਨ, ਜੋ ਉਨ੍ਹਾਂ ਨੇ ਸਹਿਕਾਰੀ ਸਭਾ ’ਚ ਪੈਸੇ ਜਮ੍ਹਾ ਕਰਵਾ ਕੇ ਬਣਵਾਈਆਂ ਹਨ ਅਤੇ ਪੰਜ ਕਰੋੜ ਦੇ ਕਰੀਬ ਸਹਿਕਾਰੀ ਸਭਾ ਦਾ ਕਿਸਾਨਾਂ ਵੱਲ ਲਿਮਟਾਂ ਦੇ ਰੂਪ ’ਚ ਵਿਆਜ ਹੋਇਆ ਹੈ। ਉਨ੍ਹਾਂ ਕਿਹਾ ਕਿ ਅੱਠ ਕਰੋੜ ਰੁਪਏ ਤੋਂ ਵੱਧ ਦਾ ਗਬਨ ਹੋਣ ਦੀ ਸ਼ੰਕਾ ਹੈ। ਇਸ ਮੌਕੇ ਕਿਸਾਨਾਂ ਨੇ ਕਿਹਾ ਕਿ 21 ਅਗਸਤ ਨੂੰ ਮਾਮਲਾ ਦਰਜ ਕੀਤਾ ਗਿਆ ਸੀ ਲੇਕਿਨ ਅਜੇ ਤੱਕ ਕੋਈ ਵੀ ਪੁਲਸ ਵੱਲੋਂ ਕਾਰਵਾਈ ਨਹੀਂ ਕੀਤੀ ਗਈ। ਇਸ ਸਾਰੇ ਮਾਮਲੇ ਸਬੰਧੀ ਜਦੋਂ ਸਹਿਕਾਰਤਾ ਵਿਭਾਗ ਦੇ ਇੰਸਪੈਕਟਰ ਰੋਹਨ ਜੌਨ ਨਾਲ ਗੱਲਬਾਤ ਕੀਤੀ ਤਾਂ ਉਨ੍ਹਾਂ ਕਿਹਾ ਕਿ ਹੁਣ ਤੱਕ ਪੰਜ ਕਰੋੜ 78 ਲੱਖ ਰੁਪਏ ਦਾ ਗਬਨ ਸਾਹਮਣੇ ਆ ਚੁੱਕਾ ਹੈ ਤੇ ਜਾਂਚ ਚੱਲ ਰਹੀ ਹੈ ਤੇ ਗਵਨ ਦੀ ਰਕਮ ਹੋਰ ਵੀ ਵੱਧ ਸਕਦੀ ਹੈ। ਉਨ੍ਹਾਂ ਅੱਗੇ ਕਿਹਾ ਕਿ ਦੋਸ਼ੀਆਂ ਦੀਆਂ ਜਾਇਦਾਦਾਂ ਨੂੰ ਵੀ ਅਟੈਚ ਕੀਤਾ ਜਾ ਰਿਹਾ ਹੈ, ਜਿਸ ਤੋਂ ਜਿਹੜੇ ਖਾਤਾ ਧਾਰਕਾਂ ਦਾ ਰਿਕਾਰਡ ਵਿਭਾਗ ਦੇ ਖਾਤੇ ਨਾਲ ਮੇਲ ਖਾ ਰਿਹਾ ਹੈ। ਉਨ੍ਹਾਂ ਨੂੰ ਇਕ ਇਕ ਪੈਸਾ ਵਾਪਸ ਕਰਾਉਣ ਲਈ ਉਹ ਯਤਨਸ਼ੀਲ ਹਨ। ਜਦੋਂ ਸਹਿਕਾਰੀ ਸਭਾ ਨੌਗੱਜਾ ਦੇ ਪ੍ਰਧਾਨ ਤੇ ਸਕੱਤਰ ਦਾ ਪੱਖ ਜਾਨਣ ਲਈ ਫੋਨ ਕੀਤਾ ਗਿਆ ਤਾਂ ਉਨ੍ਹਾਂ ਵੱਲੋਂ ਫੋਨ ਨਹੀਂ ਚੁੱਕਿਆ ਗਿਆ।

ਜਲੰਧਰ ਤੋਂ ਮਾਹੀ ਅਨੁਸਾਰ-ਇਸ ਮਾਮਲੇ ’ਚ ਥਾਣਾ ਕਰਤਾਰਪੁਰ ਦੇ ਇੰਚਾਰਜ ਸਬ ਇੰਸਪੈਕਟਰ ਗੁਰਪ੍ਰੀਤ ਸਿੰਘ ਨੇ ਦੱਸਿਆ ਕਿ ਇਸ ਮਾਮਲੇ ’ਚ ਚਾਰ ਦੋਸ਼ੀਆਂ ਦੇ ਖ਼ਿਲਾਫ਼ ਐੱਫ. ਆਈ. ਆਰ. ਦਰਜ ਕੀਤੀ ਹੈ। ਉਨ੍ਹਾਂ ਨੇ ਸਪੱਸ਼ਟ ਕੀਤਾ ਕਿ ਖੇਤਰ ’ਚ ਕਾਨੂੰਨ-ਵਿਵਸਥਾ ਬਣਾਏ ਰੱਖਣ ਅਤੇ ਅਪਰਾਧ ’ਤੇ ਲਗਾਮ ਲਗਾਉਣ ਲਈ ਪੁਲਸ ਪੂਰੀ ਤਰ੍ਹਾਂ ਨਾਲ ਵਚਨਬੱਧ ਹੈ। ਹੁਣ ਇਸ ਮਾਮਲੇ ਦੀ ਜਾਂਚ ਡਿਊਟੀ ਅਫ਼ਸਰ ਹਰਦੀਪ ਸਿੰਘ ਨੂੰ ਸੌਂਪੀ ਗਈ ਹੈ। ਹਰਦੀਪ ਸਿੰਘ ਦੀ ਅਗਵਾਈ ’ਚ ਪੁਲਸ ਦੀਆਂ ਵਿਸ਼ੇਸ਼ ਟੀਮਾਂ ਚਾਰੋਂ ਨਾਮਜ਼ਦ ਦੋਸ਼ੀਆਂ ਦੀ ਭਾਲ ’ਚ ਲਗਾਤਾਰ ਵੱਖ-ਵੱਖ ਥਾਵਾਂ ’ਤੇ ਛਾਪੇਮਾਰੀ ਕਰ ਰਹੀਆਂ ਹਨ।

ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ

For Android:- https://play.google.com/store/apps/details?id=com.jagbani&hl=en

For IOS:- https://itunes.apple.com/in/app/id538323711?mt=8

For Whatsapp:- https://whatsapp.com/channel/0029Va94hsaHAdNVur4L170e