‘ਬੋ ਕਾਟਾ ਰੇ’ ਦੀਆਂ ਆਵਾਜ਼ਾਂ ਨਾਲ ਗੂੰਜਿਆ ਆਕਾਸ਼

ਸੰਗਰੂਰ (ਜੈਨ)- ਅੱਜ ਬਸੰਤ ਪੰਚਮੀ ਮੌਕੇ ਪਤੰਗਬਾਜ਼ੀ ਦੇ ਸ਼ੌਕੀਨਾਂ ਨੇ ਜੰਮ ਕੇ ਪਤੰਗਬਾਜ਼ੀ ਦਾ ਮਜ਼ਾ ਮਾਣਿਆ ਅਤੇ ਪੂਰਾ ਦਿਨ ਆਕਾਸ਼ ਰੰਗ-ਬਿਰੰਗੀਆਂ ਪਤੰਗਾਂ ਨਾਲ ਭਰਿਆ ਹੋਇਆ ਹੀ ਨਜ਼ਰ ਆਇਆ। ਬਿਨਾਂ ਕੋਈ ਉਮਰ ਦਾ ਲਿਹਾਜ਼ ਕੀਤੇ ਨੌਜਵਾਨ ਲਡ਼ਕੇ, ਲਡ਼ਕੀਆਂ ਅਤੇ ਵੱਡੀ ਉਮਰ ਦੇ ਲੋਕ ਵੀ ਪਤੰਗਬਾਜ਼ੀ ਦਾ ਸ਼ੌਕ ਫਰਮਾਉਂਦੇ ਹੋਏ ਨਜ਼ਰ ਆਏ। ਇਸ ਦੌਰਾਨ ਜਿਥੇ ਹਰ ਕਿਸੇ ਵਿਚ ਆਪਣੀ ਪਤੰਗ ਹੋਰਨਾਂ ਨਾਲੋਂ ਉੱਚੀ ਉਡਾਉਣ ਦੀ ਹੋਡ਼ ਲੱਗੀ ਹੋਈ ਸੀ, ਉਥੇ ਹੀ ਉਹ ਇਕ ਦੂਜੇ ਨਾਲ ਪੇਚੇ ਲਡ਼ਾ ਕੇ ਇਕ-ਦੂਸਰੇ ਦੀ ਪਤੰਗ ਕੱਟਣ ਦੀ ਹੋਡ਼ ’ਚ ਸੀ। ਪਤੰਗਬਾਜ਼ੀ ਦੇ ਨਾਲ-ਨਾਲ ਉੱਚੀ ਆਵਾਜ਼ ’ਚ ਛੱਤਾਂ ਉਪਰ ਲਾਏ ਗਏ ਮਿਊਜ਼ਿਕ ਸਿਸਟਮ ਰਾਹੀਂ ਸੰਗੀਤ ਦਾ ਵੀ ਆਨੰਦ ਲੈ ਰਹੇ ਪਤੰਗਬਾਜ਼ ਜਦ ਕਿਸੇ ਦੀ ਪਤੰਗ ਕੱਟ ਦਿੰਦੇ ਸੀ ਤਾਂ ਉਹ ਖੁਸ਼ੀ ਨਾਲ ‘ਬੋ ਕਾਟਾ ਰੇ’ ਆਖ ਕੇ ਆਪਣੀ ਖੁਸ਼ੀ ਹੋਰਨਾਂ ਨਾਲ ਸਾਂਝੀ ਕਰ ਰਹੇ ਸੀ। ਹਰ ਕੁਝ ਸੈਕਿੰਡਾਂ ਬਾਅਦ ਹੀ ਹਰ ਪਾਸਿਓਂ ‘ਬੋ ਕਾਟਾ ਰੇ’ ਦੀ ਆਵਾਜ਼ ਹੀ ਸੁਣਾਈ ਦੇ ਰਹੀ ਸੀ। ਐਤਵਾਰ ਦਾ ਦਿਨ ਹੋਣ ਦੇ ਕਾਰਨ ਪਤੰਗਬਾਜ਼ ਬੇਹੱਦ ਉਤਸ਼ਾਹ ਨਾਲ ਪਤੰਗਾਂ ਉਡਾ ਰਹੇ ਸੀ। ਛੋਟੇ ਬੱਚੇ ਜਿਨ੍ਹਾਂ ਨੂੰ ਪਤੰਗ ਉਡਾਉਣਾ ਨਹੀਂ ਸੀ ਆਉਂਦਾ, ਨੇ ਵੀ ਗੈਸੀ ਗੁਬਾਰੇ ਆਦਿ ਉਡਾ ਕੇ ਇਸ ਤਿਉਹਾਰ ਦਾ ਆਨੰਦ ਮਾਣਿਆ।