ਸਪੋਰਟਸ ਕਿੰਗ ਸ਼ੋਅਰੂਮ ''ਚੋਂ ਨਕਦੀ ਤੇ ਹੋਰ ਸਾਮਾਨ ਚੋਰੀ

ਗੁਰਦਾਸਪੁਰ,   (ਵਿਨੋਦ, ਦੀਪਕ)-  ਚੋਰਾਂ ਨੇ ਅੱਜ ਰਾਤ ਜੇਲ ਰੋਡ ਸਥਿਤ ਸਪੋਰਟਸ ਕਿੰਗ ਸ਼ੋਅਰੂਮ 'ਚੋਂ ਨਕਦੀ ਤੇ ਹੋਰ ਸਾਮਾਨ ਚੋਰੀ ਕਰ ਲਿਆ ਹੈ। ਸਪੋਰਟਸ ਕਿੰਗ ਸ਼ੋਅਰੂਮ ਦੇ ਮੈਨੇਜਰ ਸਤਬੀਰ ਸਿੰਘ ਨੇ ਦੱਸਿਆ ਕਿ ਬੀਤੀ ਰਾਤ ਉਹ ਸ਼ੋਅਰੂਮ ਨੂੰ ਬੰਦ ਕਰ ਕੇ ਗਏ ਸੀ ਅਤੇ ਸਵੇਰੇ ਜਦ ਸ਼ੋਅਰੂਮ ਖੋਲ੍ਹਿਆ ਤਾਂ ਵੇਖਿਆ ਕਿ ਸ਼ੋਅਰੂਮ ਦੀ ਸੇਫ ਖੁੱਲ੍ਹੀ ਹੋਈ ਸੀ ਅਤੇ ਉਸ ਵਿਚ ਰੱਖੇ 70 ਹਜ਼ਾਰ ਰੁਪਏ ਚੋਰੀ ਹੋ ਚੁੱਕੇ ਸਨ। ਮੈਨੇਜਰ ਅਨੁਸਾਰ ਹੋਰ ਕੀ ਕੀ ਸਾਮਾਨ ਚੋਰੀ ਹੋਇਆ ਹੈ ਇਹ ਤਾਂ ਜਾਂਚ ਦੇ ਬਾਅਦ ਹੀ ਪਤਾ ਲੱਗੇਗਾ। ਸੂਚਨਾ ਮਿਲਦੇ ਹੀ ਡਾਂਗ ਸਕੁਐਡ ਸਮੇਤ ਮੌਕੇ 'ਤੇ ਪਹੁੰਚੇ ਇੰਸਪੈਕਟਰ ਸ਼ਾਮ ਲਾਲ ਨੇ ਦੱਸਿਆ ਕਿ ਹੁਣ ਤੱਕ ਕੀਤੀ ਜਾਂਚ ਤੋਂ ਪਤਾ ਲੱਗਦਾ ਹੈ ਕਿ ਚੋਰ ਸ਼ੋਅਰੂਮ ਦੇ ਨਾਲ ਲੱਗਦੇ ਪੈਟਰੋਲ ਪੰਪ ਦੇ ਰਸਤੇ ਪੌੜੀ ਰਾਹੀਂ ਛੱਤ ਤੋਂ ਸ਼ੋਅਰੂਮ ਵਿਚ ਆਏ। ਚੋਰ ਨਿਕਾਸ ਫੈਨ ਨੂੰ ਤੋੜ ਕੇ ਵਾਸ਼ਰੂਮ ਵਿਚ ਦਾਖਲ ਹੋਏ। ਉਨ੍ਹਾਂ ਦੱਸਿਆ ਕਿ ਹੁਣ ਤੱਕ ਦੀ ਕੀਤੀ ਜਾਂਚ 'ਚ ਇਹ ਗੱਲ ਸਾਹਮਣੇ ਆਈ ਹੈ ਕਿ ਮੈਨੇਜਰ ਸੇਫ ਦੀ ਚਾਬੀਆਂ ਸ਼ੋਅਰੂਮ ਵਿਚ ਹੀ ਛੱਡ ਜਾਂਦੇ ਸੀ। ਉਨ੍ਹਾਂ ਕਿਹਾ ਕਿ ਇਸ ਸਬੰਧੀ ਕੇਸ ਦਰਜ ਕਰ ਕੇ ਜਾਂਚ ਸ਼ੁਰੂ ਕਰ ਦਿੱਤੀ ਹੈ।