ਮੀਂਹ ਕਾਰਨ ਫਗਵਾੜਾ ਹੋਇਅਾ ਜਲ-ਥਲ

ਫਗਵਾਡ਼ਾ, (ਹਰਜੋਤ, ਜਲੋਟਾ)- ਅੱਤ ਦੀ ਗਰਮੀ ਤੋਂ ਬਾਅਦ ਅੱਜ ਦੇਰ ਸ਼ਾਮ ਹੋਈ ਬਾਰਿਸ਼ ਨਾਲ ਸ਼ਹਿਰ ਪੂਰੀ ਤਰ੍ਹਾਂ ਪਾਣੀ ਨਾਲ ਜਲ- ਥੱਲ ਹੋ ਗਿਆ। ਲੋਕਾਂ ਨੇ ਮੀਂਹ ਨਾਲ ਗਰਮੀ ਤੋਂ ਤਾਂ ਰਾਹਤ ਮਹਿਸੂਸ ਕੀਤੀ ਪਰ ਮੀਂਹ ਦੇ ਇਕੱਠੇ ਹੋਏ ਪਾਣੀ ਨੇ ਲੋਕਾਂ ਨੂੰ ਵਖਤ ਪਾ ਦਿੱਤਾ। ਦੁਕਾਨਦਾਰ ਤੇ ਘਰਾਂ ਵਾਲੇ ਆਪਣੇ ਘਰਾਂ ’ਚ ਪਾਣੀ ਨੂੰ ਰੋਕਣ ਲਈ ਪ੍ਰਬੰਧ ਕਰਨ ਲੱਗ ਪਏ ਪਰ ਪਾਣੀ ਇੰਨਾ ਜ਼ਿਆਦਾ ਹੋ ਗਿਆ ਕਿ ਲੋਕਾਂ ਦੇ ਘਰ ਅਤੇ ਦੁਕਾਨਾਂ ’ਚ ਜਾ ਵਡ਼ਿਆ। ਸ਼ਹਿਰ ’ਚ ਰੇਲਵੇ ਰੋਡ, ਬੰਗਾ ਰੋਡ, ਗਊਸ਼ਾਲਾ ਰੋਡ, ਹਰਗੋਬਿੰਦ ਨਗਰ, ਸੁਭਾਸ਼ ਨਗਰ, ਗੁਡ਼ ਮੰਡੀ ਰੋਡ, ਗੋਲ ਚੌਕ, ਜੋਸ਼ੀਆਂ ਮੁਹੱਲਾ, ਡਾਕਘਰ ਰੋਡ, ਅਰਬਨ ਅਸਟੇਟ, ਮਾਡਲ ਟਾਊਨ, ਨਿਊ ਮਾਡਲ ਟਾਊਨ, ਲੋਹਾ ਮੰਡੀ, ਬਾਂਸਾ ਬਾਜ਼ਾਰ, ਸ਼ਿਵ ਮੰਦਰ, ਪੱਕਾ ਬਾਗ ਬੁਰੀ ਤਰ੍ਹਾਂ ਪਾਣੀ ਨਾਲ ਭਰ ਗਏ। ਸ਼ਹਿਰ ’ਚ ਪਾਣੀ ਦੀ ਨਿਕਾਸੀ ਨਾ ਹੋਣ ਕਰ ਕੇ ਲੋਕਾਂ ਨੂੰ ਖਡ਼੍ਹੇ ਪਾਣੀ ’ਚੋਂ ਹੀ ਗੁਜ਼ਰਨਾ ਪਿਆ। ਬੱਸ ਸਟੈਂਡ ਨੂੰ ਜਾਣ ਵਾਲੇ ਲੋਕਾਂ ਨੂੰ ਚੱਢਾ ਮਾਰਕੀਟ ਦੇ ਗੰਦੇ ਪਾਣੀ ’ਚੋਂ ਹੀ ਗੁਜ਼ਰਨਾ ਪਿਆ। ਸ਼ਹਿਰ ’ਚ ਪਾਣੀ ਦੀ ਨਿਕਾਸੀ ਦਾ ਕਿਤੇ ਵੀ ਯੋਗ ਪ੍ਰਬੰਧ ਨਹੀਂ ਨਜ਼ਰ ਆ ਰਿਹਾ ਸੀ। ਇਥੋਂ ਤਕ ਕਿ ਕੱਪਡ਼ਿਆਂ ਦੀਅਾਂ ਦੁਕਾਨਾਂ ਅਤੇ ਹੋਰ ਦੁਕਾਨਾਂ ਦੇ ਅੰਦਰ ਪਾਣੀ ਵੀ ਜਾ ਵਡ਼ਿਆ। ਇਸੇ ਤਰ੍ਹਾਂ ਇਥੋਂ ਦੀ ਸਬ ਜੇਲ ਦੇ ਅੰਦਰ ਵੀ ਪਾਣੀ ਜਾ ਵਡ਼ਿਆ। ਸ਼ਹਿਰ ’ਚ ਥਾਂ-ਥਾਂ ਸਡ਼ਕਾਂ ’ਚ ਟੋਏ ਪਏ ਹੋਏ ਸਨ, ਜਿਸ ਕਾਰਨ ਹਾਦਸੇ ਵਾਪਰਨ ਦਾ ਵੀ ਖ਼ਦਸ਼ਾ ਬਣਿਆ ਰਿਹਾ। ਇਥੋਂ ਤਕ ਕਿ ਲੋਕਾਂ ਦੇ ਘਰਾਂ ’ਚ ਸੀਵਰੇਜ ਦੇ ਪਾਈਪ ਰਾਹੀਂ ਪਾਣੀ ਜਾ ਵਡ਼ਿਆ।
 ਕੀ ਕਹਿੰਦੇ ਹਨ ਲੋਕ
 ਇਸ ਸਬੰਧੀ ਜਦ ਲੋਕਾਂ ਨਾਲ ਗੱਲਬਾਤ ਕੀਤੀ ਗਈ ਤਾਂ ਉਨ੍ਹਾਂ ਦਾ ਕਹਿਣਾ ਸੀ ਕਿ ਨਾਲੀਅਾਂ ਬੰਦ ਪਈਆਂ ਹਨ ਤੇ ਪਾਣੀ ਦੀ ਕਿਸੇ ਵੀ ਪਾਸੇ ਨਿਕਾਸੀ ਨਹੀਂ ਹੈ। ਲੋਕਾਂ ਨੇ ਨਗਰ ਨਿਗਮ ਤੋਂ ਮੰਗ ਕੀਤੀ ਕਿ ਸ਼ਹਿਰ ’ਚ ਪਾਣੀ ਦੀ ਨਿਕਾਸੀ ਦਾ ਯੋਗ ਪ੍ਰਬੰਧ ਕੀਤਾ ਜਾਵੇ ਤਾਂ ਜੋ ਬਰਸਾਤ ਦੇ ਦਿਨਾਂ ’ਚ ਅਜਿਹੀ ਸਮੱਸਿਆ ਦਾ ਸਾਹਮਣਾ ਨਾ ਕਰਨਾ ਪਵੇ।