ਪਛਾਣ ਹੀ ਨਹੀਂ ਦਿੰਦੀ, ਧਨ ਵੀ ਵਰਸਾਉਂਦੀ ਹੈ ''ਮਾਂ ਬੋਲੀ''

*ਪੰਜਾਬੀ ਦੀਆਂ 5 ਫਿਲਮਾਂ ਨੇ ਕੀਤੀ 30 ਕਰੋੜ ਤੋਂ ਜ਼ਿਆਦਾ ਦੀ ਕਮਾਈ

ਮਾਂ ਦੀ ਕੁੱਖੋਂ ਪੈਦਾ ਹੋਣ ਤੋਂ ਬਾਅਦ ਸਿੱਖੀ ਜਾਣ ਵਾਲੀ ਪਹਿਲੀ ਭਾਸ਼ਾ ਯਾਨੀ ਤੁਹਾਡੀ ਮਾਂ ਬੋਲੀ ਤੁਹਾਨੂੰ ਦੁਨੀਆ ਭਰ ਵਿਚ ਪਛਾਣ ਹੀ ਨਹੀਂ ਦਿਵਾਉਂਦੀ ਬਲਕਿ ਇਹੋ ਬੋਲੀ ਅੱਗੇ ਚੱਲ ਕੇ ਤੁਹਾਡੀ ਆਮਦਨ ਦਾ ਸਾਧਨ ਬਣਦੀ ਹੈ ਅਤੇ ਜੇਕਰ ਤੁਸੀਂ ਬੋਲੀ ਰਾਹੀਂ ਕਲਾਕਾਰ ਬਣਦੇ ਹੋ ਤਾਂ ਇਹੋ ਬੋਲੀ ਤੁਹਾਡੀ ਝੋਲੀ ਵੀ ਧਨ ਨਾਲ ਭਰ ਦਿੰਦੀ ਹੈ। ਪੰਜਾਬੀ ਸਿਨੇਮਾ ਇਸ ਦੀ ਜਿਊਂਦੀ ਜਾਗਦੀ ਮਿਸਾਲ ਹੈ। 20ਵੀਂ ਸਦੀ ਦੇ ਆਖਰੀ ਦੌਰ ਵਿਚ ਦਮ ਤੋੜ ਚੁੱਕੇ ਪੰਜਾਬੀ ਸਿਨੇਮਾ ਨੇ 21ਵੀਂ ਸਦੀ ਵਿਚ ਆਉਂਦਿਆਂ ਹੀ ਮੁੜ ਤੋਂ ਲੰਮੀਆਂ ਪੁਲਾਂਘਾਂ ਪੁੱਟਣੀਆਂ ਸ਼ੁਰੂ ਕੀਤੀਆਂ ਅਤੇ ਪੰਜਾਬੀ ਵਿਚ ਬਣੀਆਂ ਫਿਲਮਾਂ ਕਮਾਈ ਦੇ ਮਾਮਲੇ ਵਿਚ ਕਈ ਵੱਡੀਆਂ ਪੰਜਾਬੀ ਫਿਲਮਾਂ ਦੇ ਰਿਕਾਰਡ ਤੋੜ ਰਹੀਆਂ ਹਨ। ਮਾਂ ਬੋਲੀ ਦਿਵਸ 'ਤੇ ਅੱਜ ਕਮਾਈ ਦੇ ਪੱਖੋਂ ਸਭ ਤੋਂ ਅੱਗੇ ਰਹੀਆਂ ਪੰਜ ਪੰਜਾਬੀ ਫਿਲਮਾਂ ਦੀ ਕਮਾਈ 'ਤੇ ਵੀ ਇਕ ਨਜ਼ਰ ਮਾਰਦੇ ਹਾਂ।

ਫਿਲਮ ਦਾ ਨਾਂ                             ਕਮਾਈ
ਚਾਰ ਸਾਹਿਬਜ਼ਾਦੇ                       72 ਕਰੋੜ
ਮੰਜੇ ਬਿਸਤਰੇ                            46 ਕਰੋੜ
ਜੱਟ ਐਂਡ ਜੂਲੀਅਟ                     44 ਕਰੋੜ 
ਜੱਟ ਐਂਡ ਜੂਲੀਅਟ 2                 36 ਕਰੋੜ
ਪੰਜਾਬ 1984                           34 ਕਰੋੜ 

ਪਾਕਿਸਤਾਨ ਦੇ ਹਾਲਾਤ ਚਿੰਤਾਜਨਕ

ਚੜ੍ਹਦੇ ਪੰਜਾਬ ਦੀਆਂ ਪੰਜਾਬੀ ਫਿਲਮਾਂ ਦੁਨੀਆ ਭਰ ਵਿਚ ਧੁੰਮਾਂ ਪਾ ਰਹੀਆਂ ਹਨ ਅਤੇ ਇਹ ਫਿਲਮਾਂ ਲਾਹੌਰ ਦੇ ਥਿਏਟਰਾਂ ਵਿਚ ਵੀ ਦਰਸ਼ਕਾਂ ਨੂੰ ਓਨੀਆਂ ਹੀ ਪਸੰਦ ਆਉਂਦੀਆਂ ਹਨ, ਜਿੰਨੀਆਂ ਇਹ ਲੁਧਿਆਣਾ ਜਾਂ ਅੰਮ੍ਰਿਤਸਰ ਵਿਚ ਪਸੰਦ ਕੀਤੀਆਂ ਜਾਂਦੀਆਂ ਹਨ ਪਰ ਇਸ ਦੇ ਮੁਕਾਬਲੇ ਪਾਕਿਸਤਾਨੀ ਪੰਜਾਬੀ ਸਿਨੇਮਾ ਯਾਨੀ ਲੌਲੀਵੁੱਡ ਦਮ ਤੋੜਦਾ ਨਜ਼ਰ ਆ ਰਿਹਾ ਹੈ। ਪਾਕਿਸਤਾਨ ਦੀਆਂ ਪੰਜਾਬੀ ਫਿਲਮਾਂ ਨਾ ਤਾਂ ਨਿਰਮਾਣ ਦੀ ਤਕਨੀਕ ਅਤੇ ਫਿਲਮ ਦੀ ਕੁਆਲਿਟੀ ਦੇ ਪੱਖੋਂ ਚੜ੍ਹਦੇ ਪੰਜਾਬ ਦੀਆਂ ਪੰਜਾਬੀ ਫਿਲਮਾਂ ਦਾ ਮੁਕਾਬਲਾ ਕਰ ਪਾਉਂਦੀਆਂ ਹਨ ਅਤੇ ਨਾ ਹੀ ਕਮਾਈ ਦੇ ਪੱਖੋਂ ਇਹ ਫਿਲਮਾਂ ਦਮ-ਖਮ ਦਿਖਾ ਪਾਉਂਦੀਆਂ ਹਨ।