ਪ੍ਰਾਈਵੇਟ ਦੀ ਤਰ੍ਹਾਂ ਸਰਕਾਰੀ ਸਕੂਲਾਂ ਦੇ ਅਧਿਆਪਕਾਂ ਲਈ ਵੀ ਆਈ-ਕਾਰਡ ਰੱਖਣਾ ਲਾਜ਼ਮੀ
01/30/2020 3:39:09 PM
ਅੰਮ੍ਰਿਤਸਰ (ਦਲਜੀਤ) : ਪ੍ਰਾਈਵੇਟ ਸਕੂਲਾਂ ਦੀ ਤਰ੍ਹਾਂ ਹੁਣ ਸਰਕਾਰੀ ਸਕੂਲਾਂ ਦੇ ਅਧਿਆਪਕਾਂ ਦੇ ਗਲ਼ 'ਚ ਵੀ ਆਈ-ਕਾਰਡ ਨਜ਼ਰ ਆਉਣਗੇ। ਪੰਜਾਬ ਦੇ ਸਿੱਖਿਆ ਵਿਭਾਗ ਵੱਲੋਂ ਸਰਕਾਰੀ ਸਕੂਲਾਂ ਦੇ ਅਧਿਆਪਕਾਂ ਨੂੰ ਆਈ-ਕਾਰਡ ਰੱਖਣਾ ਲਾਜ਼ਮੀ ਕਰ ਦਿੱਤਾ ਗਿਆ ਹੈ। ਵਿਭਾਗ ਵੱਲੋਂ ਜਾਰੀ ਨੋਟੀਫਿਕੇਸ਼ਨ ਅਨੁਸਾਰ ਹੁਣ ਪੰਜਾਬ ਸਮੇਤ ਅੰਮ੍ਰਿਤਸਰ ਦੇ ਸਾਰੇ ਸਰਕਾਰੀ ਸਕੂਲਾਂ ਦੇ ਅਧਿਆਪਕਾਂ ਵੱਲੋਂ ਆਈ-ਕਾਰਡ ਰੱਖਣਾ ਜ਼ਰੂਰੀ ਹੈ। ਇਸ ਲਈ ਸਿੱਖਿਆ ਵਿਭਾਗ ਨੇ ਪ੍ਰਤੀ ਅਧਿਆਪਕ 50 ਰੁਪਏ ਰਾਸ਼ੀ ਦਾ ਫੰਡ ਹਰ ਸਕੂਲ ਨੂੰ ਜਾਰੀ ਕਰ ਦਿੱਤਾ ਹੈ। ਇਸ ਵਿਚ ਐਲੀਮੈਂਟਰੀ, ਮਿਡਲ ਅਤੇ ਸੈਕੰਡਰੀ ਸਕੂਲਾਂ ਦੇ ਅਧਿਆਪਕ ਸ਼ਾਮਿਲ ਹਨ। ਅੰਮ੍ਰਿਤਸਰ ਜ਼ਿਲੇ 'ਚ ਐਲੀਮੈਂਟਰੀ ਟੀਚਰਾਂ ਦੀ ਸੰਖਿਆ 3109 ਹੈ, ਜਿਨ੍ਹਾਂ ਲਈ 15545 ਰੁਪਏ ਦਾ ਫੰਡ, ਜਦੋਂ ਕਿ 4269 ਸੈਕੰਡਰੀ ਟੀਚਰਾਂ ਲਈ 21345 ਰੁਪਏ ਦਾ ਫੰਡ ਜਾਰੀ ਕੀਤਾ ਗਿਆ ਹੈ।
ਵਿਭਾਗ ਤੋਂ ਪ੍ਰਾਪਤ ਨਿਰਦੇਸ਼ਾਂ ਅਨੁਸਾਰ ਅਧਿਆਪਕ ਈ-ਪੰਜਾਬ ਪੋਰਟਲ 'ਤੇ ਜਾ ਕੇ ਆਪਣੀ ਫੋਟੋ ਅਪਲੋਡ ਕਰ ਕੇ ਉਸ ਦਾ ਪ੍ਰਿੰਟ ਲੈ ਕੇ ਸਬੰਧਤ ਅਥਾਰਟੀ ਕੋਲੋਂ ਦਸਤਖਤ ਕਰਵਾ ਕੇ ਆਪਣਾ ਆਈ-ਕਾਰਡ ਬਣਵਾਏ। ਪ੍ਰਿੰਟ ਆਊਟ ਕਢਵਾਉਣ ਅਤੇ ਉਸ ਨੂੰ ਲੈਮੀਨੇਸ਼ਨ ਕਰਵਾਉਣ ਲਈ 50 ਰੁਪਏ ਤੱਕ ਦਾ ਖਰਚਾ ਕੀਤਾ ਜਾ ਸਕਦਾ ਹੈ। ਇਸ ਤਰ੍ਹਾਂ ਪੂਰੇ ਪੰਜਾਬ 'ਚ 101439 ਅਧਿਆਪਕਾਂ ਲਈ 295985 ਰੁਪਏ ਦਾ ਫੰਡ ਆਈ-ਕਾਰਡ ਲਈ ਜਾਰੀ ਕੀਤਾ ਜਾ ਚੁੱਕਾ ਹੈ। ਜਾਣਕਾਰੀ ਅਨੁਸਾਰ ਇਸ ਤੋਂ ਪਹਿਲਾਂ ਸਿੱਖਿਆ ਵਿਭਾਗ ਅਧਿਆਪਕਾਂ ਲਈ ਵਰਦੀ ਜ਼ਰੂਰੀ ਦੇ ਹੁਕਮ ਵੀ ਦੇ ਚੁੱਕਾ ਹੈ ਪਰ ਵਿਭਾਗ ਦੇ ਇਹ ਹੁਕਮ ਹੇਠਲੇ ਪੱਧਰ ਤੱਕ ਲਾਗੂ ਨਹੀਂ ਹੋ ਸਕੇ ਸਨ ਅਤੇ ਹੁਣ ਵਿਭਾਗ ਵੱਲੋਂ ਅਧਿਆਪਕਾਂ ਲਈ ਆਈ-ਕਾਰਡ ਲਾਜ਼ਮੀ ਕੀਤੇ ਗਏ ਹਨ। ਹੁਣ ਦੇਖਣਾ ਹੈ ਕਿ ਵਿਭਾਗ ਦੇ ਨਵੇਂ ਹੁਕਮ ਦਾ ਅਧਿਆਪਕ ਕਿੰਨਾ ਪਾਲਣ ਕਰਦੇ ਹਨ।
1 ਲੱਖ ਦੇ ਕਰੀਬ ਅਧਿਆਪਕਾਂ ਦੇ ਬਣਨਗੇ ਆਈ-ਕਾਰਡ
ਜ਼ਿਲਾ | ਐਲੀਮੈਂਟਰੀ | ਸੈਕੰਡਰੀ |
ਅੰਮ੍ਰਿਤਸਰ | 3109 | 4269 |
ਬਰਨਾਲਾ | 796 | 1304 |
ਬਠਿੰਡਾ | 2123 | 3318 |
ਫਰੀਦਕੋਟ | 1127 | 1697 |
ਫਤਿਹਗੜ੍ਹ ਸਾਹਿਬ | 1085 | 1581 |
ਫਾਜ਼ਿਲਕਾ | 1978 | 2692 |
ਫਿਰੋਜ਼ਪੁਰ | 1686 | 1745 |
ਗੁਰਦਾਸਪੁਰ | 2993 | 3924 |
ਹੁਸ਼ਿਆਰਪੁਰ | 2989 | 4025 |
ਜਲੰਧਰ | 2745 | 3812 |
ਕਪੂਰਥਲਾ | 1354 | 1706 |
ਲੁਧਿਆਣਾ | 3793 | 5487 |
ਮਾਨਸਾ | 1352 | 1925 |
ਮੋਗਾ | 1493 | 2339 |
ਮੁਕਤਸਰ | 1629 | 2339 |
ਪਠਾਨਕੋਟ | 1134 | 1486 |
ਪਟਿਆਲਾ | 2941 | 4191 |
ਰੂਪਨਗਰ | 1243 | 1798 |
ਐੱਸ. ਬੀ. ਐੱਸ. ਨਗਰ | 944 | 1266 |
ਸੰਗਰੂਰ | 2436 | 3858 |
ਸ. ਸ. ਨਗਰ | 1672 | 2179 |
ਤਰਨਤਾਰਨ | 1620 | 2390 |
ਕੁਲ | 42242 | 59197 |
ਕੁਲ 42242 59197